Yelemis 36:11-26
Nqe cim:
“Thaum nws nyeem cov lus ntawd tas, lawv ntshai heev ib leeg saib ib leeg thiab lawv hais rau Npalus hais tias: ‘Peb yuav tsum mus qhia zaj no rau vajntxwv paub’… Tiamsis tsis pom vajntxwv thiab nws cov nomtswv ntshai lossis nyuaj siab txog tej uas lawv hnov ntawd li” (Yelemis 36:16, 24).
Lus nug rau sawvdaws xav:
- Thaum hnov tus Tswv tej lus hauv thooj ntawv, muaj ob tes haujlwm sib txawv twg?
- Kawm txog qhov no pab peb ncaj ncees tshajtawm tus Tswv txojkev hlub licas?
Tomqab uas sau tiav thoooj ntawv lawm, Npalus ua raws li tus cev lus Yelemis hais, coj thooj ntawv sau tus Tswv tej lus mus nyeem rau cov pejxeem mloog thaum lawv tuaj yoo mov hauv lub Tuamtsev raws li kevcai (nqe 9-10). Lub sijhawm ntawd cov Npanpiloos txeeb tau cov Yixalayees ntau lub nroog lawm, thiab yeebncuab tabtom tuaj ze lub nroog Yeluxalees, yog li ntawd thiaj nqua hu cov pejxeem yoo mov kom tus Tswv tsis chim thiab cawm lawv dim.
Tomqab uas Npalus nyeem Tus Tswv tej lus, muaj ob tes haujlwm sib txawv tshwmsim. Thaum Mikayas hnov nyeem tas lawm, nws txawm mus hauv vajntxwv lub loog piav qhia tej uas nws hnov rau tej nomtswv nyob ntawd mloog. Thaum hnov tas lawm, lawv thiaj hu Npalus tuaj nyeem rau lawv mloog dua, lawv txhua tus ntseeg tus Tswv tej lus sau hauv thooj ntawv thiab ntshai kawg li. Lawv txawm sib npaj hais tias yuav qhia zaj no rau vajntxwv, thiab lawv kuj hais kom Npalus thiab Yelemis mus khiav nkaum kom tsis raug tus vajntxwv siab phem rau txim. Thaum tej nomtswv qhia txhua yam rau vajntxwv lawm, vajntxwv kuj hais kom coj thooj ntawv tuaj nyeem rau nws mloog, tiamsis nws tes haujlwm txawv cov nomtswv tes haujlwm. “Thaum Yehudis nyeem tas peb plaub ntus lawm, vajntxwv txawm muab chais hlais tej ntus uas nyeem tas lawm pov hlawv. Nws pheej hlais ib ntus zuj zus li ntawd pov hlawv mus txog thaum thooj ntawv ntawd tas” (nqe 23). Vajntxwv ua li ntawd vim “tsis pom vajntxwv thiab nws cov nomtswv ntshai lossis nyuaj siab txog tej uas lawv hnov ntawd li” (nqe 24). Tsis tas li ntawd xwb, vajntxwv tseem txib neeg mus ntes Yelemis thiab Npalus tiamsis tus Tswv muab nkawd zais lawm (nqe 26).
Vajtswv Txojlus tau tshajtawm kom cov uas mloog paub txog lawv tus kheej thiab tso kev txhaum tseg, tig los cuag tus Tswv. Tiamsis, cov uas hnov tus Tswv tej lus ceebtoom tau ua tej yam sib txawv. Niaj hnub nimno los ib yam nkaus, tus Tswv Txojmoo Zoo cawmdim twb tau tus Tswv Pawg Ntseeg thiab tus Tswv cov menyuam siv ntau txoj haukev tshajtawm lawm. Muaj ntau tug mloog thiab txais yuav, tiamsis kuj muaj ntau tug mloog thiab tsis quavntsej lossis tseem tawmtsam thiab ntes tus Tswv cov tubtxib. Kawm txog qhov no, tsis ua rau peb qaug zog, tiamsis txhawb peb ncaj ncees tshajtawm tus Tswv txojkev hlub txawm yog muaj zoo sijhawm thiab tsis muaj zoo sijhawm. Qhov tshwjxeeb, yog thov tus Tswv pab peb muaj tswvyim qhia tus Tswv lub npe thaum tsis muaj zoo sijhawm.
Thaum lwm tus hnov Txojmoo Zoo uas peb qhia, lawv ua licas? Tej uas lawv ua ntawd ua rau peb xav licas?
Vajtswv! Thov pab nyuam yaus ua siab tawv thaum muaj neeg tawmtsam Koj txojkev hlub. Thov pab nyuam yaus muaj tswvyim txais yuav Koj tej lus qhuab ntuas tus kheej thiab ncaj ncees tshajtawm Koj txojkev cawmdim rau lwm tus txhua lub sijhawm. Amees.
Nyeem Vajluskub hauv peb lub xyoos: Phau Ntawv Nkauj 140:1-141:10
Kênh Youtube BHKTHN:
