Klei Aê Diê Blŭ: Y-Yêrêmi 36: 11-26.
Êlan kliăng: “Tơdah diñu hmư̆ jih jang klei blŭ, diñu bi wir dlăng hdơ̆ng diñu hŏng klei huĭ; leh anăn diñu lač kơ Y-Baruk, “Hmei srăng hưn jih klei blŭ anei kơ mtao… Ƀiădah mtao amâodah phung dĭng buăl ñu hmư̆ jih klei blŭ anei amâo huĭ ôh, kăn hiêk rei čhiăm ao diñu”(Y-Yêrêmi 36:16, 24).
Klei êmuh ksiêm mĭn: Leh hmư̆ klei Aê Diê hưn êlâo hlăm hdruôm hră, si dua klei ngă wĭt mdê mdê? Hriăm kơ klei anei si drei sĭt suôr hiu hưn klei khăp Aê Diê?
Hlue si klei Khua pô hưn êlâo Y-Yêrêmi mtă sĭt leh čih hdruôm hră, Y-Baruk ba dlăng Klei Yêhôwa Blŭ kơ jih jang phung ƀuôn sang hmư̆ ƀri gưl jih jang phung ƀuôn sang bi kƀĭn ti Yêrusalem hlăm gưl kăm ƀơ̆ng huă (êlan 9-10). Ti anăp klei phung Ƀaƀilôn ksŭng ngă, lu ƀuôn prŏng Israel arăng bi rai, leh anăn phung roh dôk nao giăm truh Yêrusalem, kyua anăn phung ƀuôn sang iêô mthưr kăm ƀơ̆ng huă hŏng klei čang hmăng Yêhôwa srăng jih klei ngêñ leh anăn bi mtlaih diñu.
Leh Y-Baruk dlăng Klei Yêhôwa blŭ snăn mâo dua klei ngă bi mklă. Leh hmư̆ Y-Mika nao ti sang mtao lŏ hưn kơ klei anăn hŏng phung khua sang mtao dôk tinăn. Leh diñu hmư̆ iêô Y-Baruk lŏ dlăng wĭt kơ diñu hmư̆, grăp čô đăo kơ klei hưn êlâo Yêhôwa čih leh hlăm hdruôm hră anăn huĭ hyưt leh anăn bi trông hưn klei anei hŏng mtao, mbĭt anăn diñu ăt lač kơ Y-Baruk leh anăn Khua pô hưn êlâo Y-Yêrêmi đuê̆ êjai huĭ kơ mtao ƀai bi kmhal. Leh phung khua hưn kơ mtao hmư̆, mtao ăt lač ba arăng dlăng hdruôm hră anăn, ƀiădah klei mtao ngă jing mklăk hŏng phung khua sang mtao, “Êjai Y-Jêhudi dlăng tlâo amâodah pă kdrêč, mtao khăt hĕ kdrêč anăn hŏng dhŏng leh anăn hwiê gơ̆ hlăm kpur pui, tơl pui hlăm kpur ƀơ̆ng jih ênŭm hră klĭt anăn” (êlan 23). Mtao ngă snăn kyua “Ƀiădah mtao amâodah phung dĭng buăl ñu hmư̆ jih klei blŭ anei amâo huĭ ôh, kăn hiêk rei čhiăm ao diñu” (êlan 24). Amâo djŏ knŏng dŭm năn ôh, mtao lŏ lač brei mă Khua pô hưn êlâo Y-Yêrêmi leh anăn Y-Baruk ƀiădah Yêhôwa mdăp leh diñu dua (êlan 26).
Klei Aê Diê Blŭ dưi hiu hưn čiăng hlei pô hmư̆ srăng thâo kơ klei soh pô leh anăn kmhal lŏ wĭt hŏng Aê Diê. Khădah snăn, mâo dŭm klei ngă wĭt mdê mdê mơ̆ng phung dưi hmư̆ klei Yêhôwa hưn brei răng. Hruê anei ăt msĕ mơh, Klei Mrâo Mrang Jăk bi mtlaih mơ̆ng Aê Diê mâo Sang Aê Diê leh anăn phung ƀuôn sang Aê Diê jih ai tiê hiu hưn hŏng lu hdră. Mâo phung hmư̆ leh anăn hlue ngă, ƀiădah ăt mâo mơh lu mnuih ngă ngơi mang amâodah bi kdơ̆ng, boh nik lŏ ngă jhat kơ phung dĭng buăl Aê Diê. Hriăm kơ klei anei đru drei amâo êdu ai ôh, sĭt suôr gưt asăp Aê Diê hiu hưn klei Ñu khăp wăt tơdah mông găl amâodah dleh dlan. Boh nik akâo kơ Aê Diê brei kơ drei klei thâo mĭn čiăng thâo si srăng ngă sĭt hiu hưn Anăn Ñu hlăm klei dleh dlan.
Ya klei ngă drei tuôm găn leh sĭt hiu hưn klei Aê Diê khăp? Si klei anei hmaĭ kơ drei?
Wah lač: Ơ Aê Diê! Akâo kơ Ih đru kâo kjăp ai tiê sĭt ƀuh klei khăp yuôm bhăn Ih brei ƀiădah ăt mâo lu mnuih bi kdơ̆ng. Akâo kơ Ih brei kơ kâo klei thâo mĭn čiăng thâo mă klei Ih ƀuah mkra kơ kâo, leh anăn sĭt suôr nanao hiu hưn klei Ih bi mtlaih hlăm djăp boh klei.
Dlăng Klei Aê Diê Blŭ hlăm tlâo thŭn: Klei Mmuñ Hđăp 140:1-13; 141:1-10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
