Mathais 6:22-23
Nqe cim:
“Ob lub qhovmuag yog lub teeb uas ci rau lub cev pom kev. Yog nej ob lub qhovmuag pom kev tseeb, tagnrho nej lub cev yuav pom kev kaj nrig” (Mathais 6:22).
Lus nug rau sawvdaws xav:
– Tswv Yexus siv tus duab “ob lub qhovmuag” qhia txog yam dab tsi?
– Kev ntshaw nyiaj txiag thiab kev paub ntawm sab ntsujplig sib ntsigtxog li cas?
– Koj sab ntsujplig zoo li cas, dhau ntawm tus “tshim ntsuas” no?
Muab Mathais 6 nqe 22 thiab nqe 23 los sib piv ces lub siab yog “ob lub qhovmuag” ntawm sab ntsujplig ntag. Nqe 21 qhia txog tej “qhov txhia chaw nyob qhov twg, nej lub siab yeej yuav nyob qhov ntawd”, yog xav hais txog peb kev saib nyiaj txiag thiab kev npluanuj li cas yog los ntawm “ob lub qhovmuag” sab ntsujplig.
Muaj ob lub tsamthawj ntawm “ob lub qhovmuag siab”. Tim ib, tsamthawj “pom kev tseeb”, yog xav hais txog “pom qhov tseeb, pom qhov zoo”. “Ob lub qhovmuag pom kev tseeb” lossis “ntsia pom qhov tseeb” yog hais txog ib tus tibneeg siv zog ua haujlwm rau ib lub homphiaj xwb. Tus uas khaws qhov txhia chaw cia saum ntuj yog tus uas tsis muab nws lub siab rau lub ntiajteb no thiab tsis ntshaw ua raws txhua yam uas yog ntiajteb li. Tus ntawd muaj lub siab siv zog ua haujlwm rau Vajtswv, nrhiav Vajtswv tas siab thiab txaus siab muab yam uas nws muaj pub dawb rau lwm tus, tsis tos kom luag pauj rov qab rau nws. Tim ob, ob lub qhovmuag uas “pom tsis tseeb” xav hais txog tus neeg “dag thiab ntshaw” (Pajlug 28:22). Tus uas muaj “ob lub qhovmuag pom tsis tseeb” yog tus uas muaj lub neej ntshaw plias rau txhua yam uas yog khoom ntiajteb li, xav tau ntau, khib, qia dub thiab tsis paub txog sab ntsujplig, vim tsis tau txais qhov kaj tseeb. Tus ntawd xav hais tias nws twb muaj qhov kaj lawm tiamsis tseeb tiag twb tsis muaj li, nws cim civ rov dag nws xwb. Yam uas txaus ntshai tshaj plaws hauv peb lub neej yog qhov uas pheej xav hais tias, yus ob lub qhovmuag tseem pom kev tiamsis tseeb tiag lub neej tsuas yog kev tsaus ntuj nti xwb. “Yog hais tias qhov pom kev uas peb muaj tsaus lawm, qhov tsaus ntawd tsuas muaj yuav tsaus heev zuj zus ntxiv xwb!” (nqe 23b).
Dhau los ntawm tus duab ob lub qhovmuag pom kev thiab tsis pom, Tswv Yexus xav hais txog peb kev ua neej: Thaum ib tus tibneeg qaug rau txhua yam uas qhovmuag pom hauv lub ntiajteb no, nrhiav kev vam meej thiab tso siab rau tej nyiaj txiag qhov txhia chaw, ces tus ntawm kev sib txuas nrog lwm tus tsuas yog pom muaj kev khib thiab tsis txaus siab rau yam nws muaj xwb. Tus ntawd muaj lub siab xav kom tau tagnrho txhua yam los ua nws tug, ua neeg qia dub thiab tsis xav pub ib yam dab tsi rau lwm tus li. Tus muaj lub siab zoo li ntawd yog neeg muaj lub siab phem, siab tsaus ntuj uas saib tsis pom qhov tseeb thiab tsis paub txhua yam uas muaj nqis tseeb. Tiamsis tus uas nrhiav txhua yam muaj nqis rau sab ntsujjplig thiab ua raws li Vajtswv lub siab nyiam, ces nws muaj lub siab dav fo rau kev ua zoo, tsis muaj ib yam khoom qhov txhia chaw uas yog ntiajteb li yuav khi tau nws, nws txaus siab faib txhua yam uas nws muaj rau lwm tus, rau qhov nws yog tus uas saib pom qhov tseeb thiab paub txhua yam uas muaj nqis tseeb.
Dhau los ntawm tus duab “ob lub qhovmuag” yog ib zaj kawm tseemceeb heev rau peb kev ua neej: Qhov uas peb saib thiab siv nyiaj txiag yog tus tshim uas ntsuas tau peb kev ntseeg ntawm sab ntsujplig. Yog hais tias peb ob lub qhovmuag nrug deb tsis taus ntawm tej nyiaj txiag ces peb lub qhovmuag thiab lub siab twb tsaus ntuj nti lawm. Thiab yog peb ob lub qhovmuag ntawm sab ntsujplig tsis pom kev, ces peb tsis muaj kev cia siab lawm. Xav rov pom kev dua ces tsuas yog tig rov los lees txim rau Vajtswv thiab cia Nws hloov peb dua tshiab thiaj tau xwb.
Thov Vajtswv
Vajtswv, Vaj Ntsujlpig nyuam yaus thov Koj siv Koj Txojlus qhib nyuam yaus lub qhovmuag ntawm sab ntsujlpig kom “pom kev tseeb” nyuam yaus ua neej muaj kev hlub thiab muaj nqi rau lwm tus. Thov Vajtswv siv nyuam yaus kom txawj txhawb lwm tus lub zog thiab pab tus uas cheemtsum pab. Amees!
Peb ob lub qhovmuag ntawm sab ntsujplig pom kev tseeb lossis tsaus ntuj nti?
Nyeem Vajluskub hauv peb lub xyoos: Yauhas 13
Kênh Youtube BHKTHN:
