Klei Aê Diê Blŭ: Y‑Mathiơ 6:22-23
Êlan kliăng: “Ală jing pui kđen kơ asei mlei. Snăn tơdah ală ih mngač, jih asei mlei ih srăng bŏ hŏng klei mngač.” (Y‑Mathiơ 6:22)
Klei êmuh ksiêm mĭn: Khua Yang Yêsu yua rup “Ală” čiăng lač kơ ya klei? Si klei bi mguôp mâo ti krah knhuah hŏng prăk kăk leh anăn klei hdĭp myang? Si jing klei hdĭp myang ih hŏng “klei mkă” anei?
Bi msĕ, êlan 22 leh anăn êlan 23 snăn ai tiê jing “ală” kơ mngăt. Êlan 21 mtô “ti anôk mâo ngăn drăp yuôm ih, tinăn mơh ai tiê ih srăng dôk”, brei ƀuh klei mĭn drei kơ ênoh yuôm, prăk kăk, klei mdrŏng sah yơh jing “ală” kơ mngăt drei.
Mâo dua klei jing kơ “ală” amâodah kơ ai tiê. Tal sa, “mngač”, čiăng kơ klei “êngeh, kmah”. “Ală mngač” amâodah “ală êngeh” lač kơ mnuih hdĭp myơr jih knŏng kơ hjăn sa mta klei kñăm čiăng. Mnuih mkăm pioh ngăn drăp hlăm adiê jing mnuih amâo dưm ôh ai tiê ñu ti lăn ala leh anăn amâo êpa mhao tui tiŏ ya dŏ ti lăn ala ôh, kyuanăn pô anei srăng mâo ai tiê myơr jih kơ Khua Yang, tui duah Khua Yang leh anăn kăp thiê brei amâo guôn arăng lŏ bi wĭt ôh. Tal dua, ală “bum”, jing klei “knan klih” (Klei Bi Hriêng 28:22). Mnuih mâo “ală bum” jing mnuih mâo knhuah hdĭp khăp kơ kđeh, knan knăk, nač iăng, klei hdĭp mngăt bum mmăt kyuadah amâo thâo kral klei mngač sĭt, pô anăn mĭndah ñu mâo klei mngač ƀiădah boh sĭt ñu amâo mâo ôh, ñu knŏng mplư ñu pô. Klei huĭ hyưt hĭn hlăm klei hdĭp jing mĭndah ală pô mngač ƀiădah boh sĭt jing “klei mngač hlăm ih jing mmăt”, hlăk anăn klei boh jing kjham êdi yơh, kyuadah “klei mmăt anăn prŏng snăk yơh!” (êlan 23b).
Mơ̆ng rup ală mngač leh anăn ală bum, Khua Yang Yêsu ktrâo klă mngač klei jing hlăm klei hdĭp: Tơdah sa čô mnuih tluh kơ ngăn drăp ti lăn ala anei, tui duah ênoh yuôm klei hơĭt ênang hlăm prăk kăk, ngăn drăp snăn ai tiê pô anăn hŏng mnuih mkăn knŏng jing klei nač iăng bi êmut, tluh kơ mnơ̆ng amâo djŏ jing dŏ pô ôh, diñu dôk hdĭp čuôt klih amâo čiăng kah mbha kơ pô mkăn ôh. Anăn jing sa ai tiê jhat, mmăt tĭt amâo thâo ƀuh klei sĭt nik leh anăn ênoh yuôm sĭt ôh. Bi mklăk hŏng klei anăn, sa čô tui duah ênoh yuôm klei hdĭp myang leh anăn gưt ngă klei Khua Yang čiăng, ai tiê pô anăn dưi pŏk blang êhai, amâo mâo kă kơ̆ng hŏng ngăn drăp ti lăn ala anei ôh, mâo klei êngiê dôk hdĭp hŏng klei khăp, kah mbha hŏng klei kmah leh anăn dưi thâo ƀuh klei sĭt nik leh anăn ênoh yuôm sĭt.
Klei mtô mơ̆ng rup “ală” brei kơ drei sa êlan hdră ênưih ƀiădah jing yuôm snăk: si knhuah drei dlăng leh anăn yua prăk, anăn yơh jing giê treh mkă sĭt klă si klei jing klei hdĭp myang drei. Tơdah drei amâo dưi tlaih ôh ală dlăng kơ prăk, klei anăn kyuadah ală leh anăn ai tiê drei jing bum leh. Leh anăn tơdah ală mngăt ai tiê drei jing mmăt tĭt leh snăn drei amâo lŏ mâo klei čang hmăng ôh, knŏng tơdah drei kmhal kơ klei soh čiăng kơ Aê Diê brei klei bi mlih mrâo.
Si ngă ală mngăt ai tiê drei mngač amâodah mmăt?
Wah lač: Ơ Khua Yang, akâo Yang Mngăt Jăk yua Klei Aê Diê Blŭ brei ală mngăt ai tiê kâo dưi “mngač” nanao čiăng kơ kâo mâo klei hdĭp thâo khăp, tŭ dưn. Akâo Khua Yang yua kâo pioh ba klei bi juh, đru dŏng phung dôk hlăm klei kƀah.
Dlăng Klei Aê Diê Blŭ hlăm tlâo thŭn: Y‑Yôhan 13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
