Pajlug 18:20-21
Nqe cim:
“Tej lus uas koj hais cawm tau txojsia lossis txov txojsia. Yog li ntawd, koj yuav tau sau raws li tej lus uas koj hais” (Pajlug 18:21).
Lus nug rau sawvdaws xav:
- Vajntxwv Xalumoos hais txog tej lus hais muaj nqis zoo li cas?
- Vim li cas cov ntseeg Yexus yuav tau ua tib zoo hais lus?
- Tsimnyog peb hais tej lus li cas kom muaj nqis rau peb thiab lwm tus?
Vajntxwv Xalumoos hais txog tej lus hais muaj peevxwm“cawm txojsia” lossis “txov txojsia”, yus yuav tau sau raws li tej lus hais. Yog xav tau sau yam zoo, tus neeg ua qoobloo yuav tau cog yam noob zoo, yuav tau sau qoobloo ntau tus neeg ua liaj ua teb yuav tau ua ntau thiab rau siab ntso tu tej uas cog tau lawm. Qoobloo yeej yuav tau raws li tus neeg tub qoob tub loo tau ua los lawm. Tus sau cov Pajlug no kuj xav hais txog tibneeg tej lus hais yuav zoo ib yam li kev cog qoobloo uas yuav tau sau los xwb. Tej lus hais txawjntse yuav ua rau tus hais tau txais kev kaj siab thiab txojsia. Dhau ntawd tus neeg ruam tej lus hais yuav ua rau nws raug kev puastsuaj. Raws li tej lus hais yuav ua rau peb tau txais yam zoo lossis tau txais yam phem.
Cov ntseeg Yexus yuav tsum ua tib zoo hais lus, vim txhua lo lus uas peb hais puavleej dawm txog lwm tus thiab tseem yuav dawm txog peb txojsia huv tibsi. Tej lus hais muaj peevxwm ua rau peb tau txojsia lossis ua rau peb tuag. Cov neeg uas xav hais ntau, hais lus tsis saib tom ntej tom qab yuav tau txais raws li tej lus uas nyias hais (nqe 21). Peb ntxub cov tibneeg uas muab riam phom mus sib ntaus sib tuas, tiamsis tej zaum peb tsis pom txog tibneeg tej lus phem hais tawm tsis yog tua tibneeg sab nqaij tawv xwb, tseem tua tibneeg sab ntsujplig lawm thiab. Tus sau phau Yakaunpaus sau txog tibneeg tej lus hais, nws muab tus nplaig piv zoo li lub ncaig taws uas yuav ua rau toj roob hauv pes kub txhua nrho thiab zoo li taug nab uas yuav txov tibneeg lub cev (Yakaunpaus 3:5-8).
Ntawm tibneeg sab ntsujplig, Timthawj Paulus kuj hais hnyav txog qhov tseemceeb ntawm tej lus hais. Thaum ib tug tibneeg lub qhov ncauj lees yuav thiab lub siab ntseeg tus Tswv ces tau txais kev cawm dim; “yog koj lub qhov ncauj lees hais tias Yexus Khetos yog tus Tswv thiab koj lub siab ntseeg hais tias Vajtswv twb tsa Yexus Khetos sawv hauv qhov tuag rov qab los lawm, koj yuav dim” (Loos 10:9). Thaum kawm paub hais tias tej lus hais tseemceeb thiab muaj nuj nqis rau lub neej heev, yuav tau thov Vajtswv pab kom paub hais tej lo lus zoo, lus txhawb zog thiaj yuav pab tau tus kheej thiab lwm tus. Dhau ntawd, peb cov ntseeg Yexus txhua tus yuav tsum siv tej lus hais, mus qhia txoj Moozoo uas yog Tswv Yexus zaj kom pab tau lwm tus los txais kev cawm dim. Rau qhov tsis muaj tus mus qhia yeej tsis muaj leejtwg yuav hnov thiab tsis tau hnov ces yuav tsis paub los ntseeg (Loos 10:14).
Thov Vajtswv,
Tus Tswv uas yog nyuam yaus leej Txiv, ua Koj tsaug uas Koj txojlus tau qhia rau nyuam yaus paub txog tej lus hais. Thov pab nyuam yaus paub xyuamxim ntawm kev hais lus. Thov pub kom nyuam yaus hais tau tej lo lus muaj kev ntseeg, kev hlub thiab dawbhuv qhia txog tus Tswv Koj pub rau lwm tus. Amees.
Peb puas paub xyuamxim rau tej lus hais, kom muaj nqis rau peb thiab rau lwm tus lawm tau?
HNUB NO YOG COV NIAM TXIV TSEV HNUB, THOV VAJTSWV PUB KOM TXHUA TUS UA LUB NEEJ MUAJ KEV NTSEEG RUAJ KHOV, UA QAUV ZOO RAU TEJ XEEB NTXWV KAWM XYAUM.
Nyeem Vajluskub hauv peb lub xyoo: Yelemis 3:14-4:4
Kênh Youtube BHKTHN:
