Klei Aê Diê Blŭ: Klei Bi Hriêng 18:20-21
Êlan kliăng: “Êlah mâo klei dưi bi hdĭp leh anăn bi mdjiê, snăn arăng srăng mă tŭ tui si klei ñu blŭ.” (Klei Bi Hriêng 18:21)
Klei êmuh ksiêm mĭn: Si klei mtao Salômôn kñăm kơ boh tŭ mdê mdê mơ̆ng klei blŭ? Ya ngă phung đăo brei thâo răng hlăm klei blŭ? Si klei blŭ brei drei mâo čiăng dưi ba klei hdĭp kơ drei pô leh anăn pô mkăn?
Mtao Salômôn kñăm kơ boh tŭ dưn mơ̆ng klei blŭ. Boh blŭ “boh mnga” amâodah “ƀơ̆ng mnga” bi êdah kơ rup yan hrui boh mnga. Čiăng mâo boh mmih jăk, pô ngă hma brei thâo ruah mjeh mơ̆ng ana boh mmih jăk; čiăng mâo lu boh mnga, mnuih buh pla brei thâo răng kriê bi jăk, sĭt suôr. Gru hnơ̆ng mơ̆ng boh mnga hrui hlue tui si klei buh pla. Msĕ snăn mơh, pô čih hră kñăm kơ boh mnga mơ̆ng klei blŭ. Klei blŭ thâo mĭn srăng ba klei trei mđao, klei jăk mơak leh anăn klei hdĭp kơ pô blŭ. Bi mklăk wĭt, klei blŭ jhat ƀai srăng atăt pô blŭ kơ klei rai luč. Tui si ênhă êlan rah, klei blŭ srăng mă tŭ boh jăk amâodah boh jhat mdê mdê.
Phung đăo brei thâo răng hlăm klei blŭ kyuadah ya klei drei blŭ srăng bi hmăi sơăi kơ pô mkăn, kdlưn hĭn mơh, ăt srăng truh djŏ wăt kơ klei hdĭp drei pô mơh. Klei ktang mơ̆ng klei blŭ dưi bi hdĭp amâodah bi mdjiê mnuih. Phung mđhuk, khăp hơiêng kơ ñu, blŭ amâo thâo răng srăng tŭ boh jhat (êlan 21). Hlăm hră čih mkra Dŭm Hdruôm Hră Bi Mlih Leh Lăn Ala (Books That Changed the World), pô čih Robert B. Downs čih snei, grăp boh blŭ hlăm hdruôm hră Mein Kampt (Klei Kâo Bi Blah) mơ̆ng Hitler, bi mdjiê 125 čô mnuih hlăm klei bi blah prŏng jih lăn ala tal dua. Drei ênưih phat kđi sa čô mnuih djă dhŏng, phao ktoang bi mdjiê mnuih, ƀiădah klei ngă jhat mơ̆ng klei blŭ jhat ƀai amâo djŏ knŏng bi mdjiê lu mnuih hlăm asei mlei kđeh ƀiădah ngă jhat wăt kơ mngăt diñu. Pô čih hră Y‑Yakơ kñăm klei yuôm mơ̆ng klei blŭ tơdah ñu bi msĕ êlah hŏng êlah pui bi rai, hŏng hlô dliê huĭ hyưt, leh anăn hŏng êa kêč kam bi mdjiê mnuih (Y‑Yakơ 3:5-8).
Tĭng kơ klei hdĭp myang, khua ƀĭng kna Y‑Pôl ăt kñăm klei yuôm mơ̆ng klei blŭ mơh. Tơdah sa čô hưn klei soh ñu leh anăn đăo kơ Khua Yang, ñu srăng dưi tlaih, “Kyuadah tơdah ih hưn hŏng ƀăng kƀông ih kơ Yêsu jing Khua Yang, leh anăn đăo hlăm ai tiê ih kơ Aê Diê bi kbiă lŏ hdĭp Ñu leh mơ̆ng phung djiê, ih srăng tlaih yơh” (Rôm 10:9). Hriăm thâo săng kơ klei yuôm leh anăn boh tŭ dưn mơ̆ng klei blŭ, akâo kơ Khua Yang brei grăp čô drei jing anak Pô klei jăk, brei blŭ klei jăk nanao, klei blŭ jăk ba boh mnga mmih jăk kơ drei pô leh anăn kơ jih jang mnuih. Ti djiêu anăn, grăp čô drei brei yua klei blŭ hiu hưn Klei Mrâo Mrang Jăk Yêsu Krist čiăng ba klei bi mtlaih kơ pô mkăn, kyua tơdah amâo mâo pô nao mtô mblang, snăn amâo srăng mâo ôh pô hmư̆, leh anăn tơdah amâo mâo pô dưi hmư̆ kơ Khua Yang si dưi đăo čiăng dưi tlaih? (Rôm 10:14).
Si ngă drei răng mơ̆ tơdah blŭ, čiăng kơ grăp boh blŭ drei ba boh mmih, klei hdĭp kơ drei pô leh anăn kơ arăng?
Wah lač: Ơ Khua Yang Ama kâo hlăm Adiê Dlông, bi mni kơ Khua Yang brei leh Klei Ih Blŭ kơ kâo. Akâo kơ Ama brei kâo thâo răng hlăm klei blŭ. Brei kâo blŭ hưn bi êdah klei đăo, klei khăp, klei doh jăk Ih, leh anăn boh nik nak thâo yua ƀăng kƀông hiu hưn klei hdĭp hlŏng lar Khua Yang kơ jih jang mnuih.
Dlăng Klei Aê Diê Blŭ hlăm tlâo thŭn: Y‑Yêrêmi 3:14–4:4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
