I Thexalaunikes 3:1-5
Nqe cim
“Vim li ntawd kuv thiaj pom zoo txib Timautes tuaj saib nej. Kuv tsis hnov nej xov li, kuv ua tsis taus siab ntev lawm, kuv thiaj txib Timautes tuaj saib nej, saib nej puas tseem muab siab rau ntseeg. Kuv ntshai nyob tsam dab Ntxwgnyoog ntxias tau nej yuam kev, ces tes haujlwm uas peb ua los lawm yuav tsis muaj nqis dabtsi li.” (I Thexalaunikes 3:5).
Lus nug rau sawvdaws xav:
– Yam dabtsi qhia paub Timthawj Paulus kub siab lug rau tus Tswv tes haujlwm hauv nroog Thexalaunikes?
– Paulus ua dabtsi kom txhawb tau cov ntseeg ntawm no txojkev ntseeg?
– Sim siab, txomnyem muaj nqis rau peb txojkev ntseeg li cas?
Cov ntseeg nyob hauv nroog Thexalaunikes tabtom raug tsimtxom hnyav heev, vim Pawg Ntseeg tseem me, Timthawj Paulus txhawj rau lawv txojkev ntseeg ib tsam lawv “ua tsis taus siab ntev lawm”, “tos tsis taus ntev” (nqe 1, 5) yog cov lus qhia paub Timthawj Paulus lub siab kub lug txhawb cov ntseeg lub zog. Lub sijhawm uas Paulus thiab nws cov phoojywg nrhiav sijhawm kom rov mus txhawb cov ntseeg Thexalaunikes lub zog, ces dab Ntxwgnyoog siv txhua yam los thaiv lawv txoj haukev, thaum zoo li ntawd Timthawj Paulus thiab nws cov phoojywg tsis tos lawm. Lawv txiav txim siab xa Timautes “yog tus uas ua Vajtswv tes haujlwm qhia Txojmoo Zoo uas hais txog Yexus Khetos zaj ib yam li wb thiab. Wb txib nws tuaj txhawb nej lub zog thiab pab kom nej muab siab rau ntseeg” (nqe 2), xa Timautes mus txhawb zog thiab pab cov ntseeg nyob ntawm no kom tsis poob siab thaum ntsib “tej kev tsimtxom” (nqe 3).
Tus neeg uas nrog tus Tswv mus khiav tsis dhau tej kev tsimtxom kev ntseeg. Timthawj Paulus twb yeej hais ua ntej rau cov ntseeg hauv lub nroog Thexalaunikes tias yuav ntsib ntau yam kev tsimtxom hauv lub neej nrog tus Tswv mus (nqe 4). Qhov tseemceeb yog hmov tshua, thov Vajtswv pab, ib leeg pab ib leeg kom sib txhawb zog tau hauv txojkev ntseeg. Thaum tej kev sim siab dhau mus lawm cov ntseeg yuav loj hlob sab kev ntseeg thiab ruaj siab nrog tus Tswv txog thaum kawg.
Ua neej nyob rau lub ntiajteb no, kev sim siab, txomnyem yog yam uas muaj rawv nyob hauv lub neej, thiab tus Tswv haivneeg los kuj yuav raug khiav tsis dhau. Cov ntseeg Yexus cheemtsum zeem paub hais tias kev sim siab kuj yog ib feem ntawm Vajtswv txojkev npaj rau Nws cov menyuam. Rau qhov tom qab uas ntsib teebmeem, tsimtxom, nyuaj siab… thiab thaum tiv dhau ces yuav muaj nqis pab tau peb ua taus siab ntev, ua tau zoo kawg nkaus (Yakaunpaus 1:2-4; Loos 5:3-5), peb raug txhua yam kev nyuaj siab kom peb txhawb tau lwm tus lub zog thaum lawv raug tej kev nyuaj siab (II Kauleethaus 1:3-7). Dhau li ntawd, ib feem twg yog tej kev txomnyem uas peb ntsib yuav ua lub cim ntawm lub neej ntseeg Tswv Yexus uas tawg paj txi txiv, lub neej tiv dhau tej kev sim siab, tuav tau txojkev ntseeg ruaj khov. Peb txhua tus cheemtsum muaj kev sib pab, sib txhawb zog kom sawvdaws tuav tau txojkev ntseeg ruaj khov txhua lub tsamthawj.
Thov Vajtswv,
Tus Tswv, nyuam yaus ua Koj tsaug. Txawm yog dab Ntxwgnyoog niaj hnub rhuav thiab thaiv nyuam yaus lub neej ntseeg, los muaj Koj pab cawm nyuam yaus dim tej kev nyuaj siab, thov Koj pab kom nyuam yaus nrog nraim Koj thiab ua tau tes haujlwm Koj muab, qhia rau lwm tus paub txog Koj lub hwjchim. Nyuam yaus tuav Tswv Yexus lub npe thov. Amees.
Ib tsoom cov mloog uas hmov thiab tshua,
Peb pheej muaj tus cwjpwm li cas thaum ntsib tej kev txomnyem lossis nyuaj siab hauv txojkev ntseeg?
Nyeem Vajluskub hauv peb lub xyoo: Tshwmsim 20:7-21:27
Kênh Youtube BHKTHN:
