Klei Aê Diê Blŭ: I Têsalônik 3:1-5
Êlan kliăng: “Kyuanăn, tơdah kâo amâo dưi lŏ gĭr sui ôh, kâo tiŏ nao Y‑Timôthê čiăng bi thâo si klei đăo diih, huĭdah pô mplư mplư diih leh, leh anăn bruă hmei ngă leh srăng jing hơăi mang.” (I Têsalônik 3:5)
Klei êmuh ksiêm mĭn: Ya klei brei ƀuh Khua ƀĭng kna Y‑Pôl hur har kơ bruă Aê Diê ti Têsalônik? Ya klei ñu ngă čiăng mđĭ ai phung ƀuôn sang Aê Diê tinei? Ya klei tŭ dưn mơ̆ng klei lông dlăng, dleh dlan ba kơ klei đăo drei?
Phung ƀuôn sang Aê Diê ti Têsalônik dôk tŭ klei arăng ngă jhat ktang, Sang Aê Diê adôk mda anăn Khua ƀĭng kna Y‑Pôl rŭng răng snăk kơ klei đăo diñu. “Amâo lŏ dưi gĭr sui ôh”, “amâo dưi lŏ gĭr sui ôh” (êlan 1, 5) jing dŭm boh blŭ bi êdah ai tiê hur har mơ̆ng Khua ƀĭng kna Y‑Pôl hŏng bruă mđĭ klei đăo phung đăo ti Têsalônik. Hlăk êjai ñu leh anăn phung mă bruă hŏng ñu duah djăp hdră čiăng nao ti Têsalônik mđĭ ai phung đăo tinei snăn yang jhat ăt yua lu hdră mnêč čiăng gang mkhư̆, ƀiădah amâo ôh kyua anăn Khua ƀĭng kna Y‑Pôl leh anăn phung mă bruă mbĭt kwăl kngan dôk guôn. Diñu bi mklă mơĭt kơ Y‑Timôthê “… leh anăn hmei tiŏ nao Y‑Timôthê adei hmei, pô mă bruă mbĭt hŏng hmei kơ Aê Diê hlăm klei mrâo mrang jăk Krist, čiăng bi kjăp leh anăn mđĭ ai diih hlăm klei diih đăo” (êlan 2) leh anăn ăt jing phung anak hlăm ai tiê Khua ƀĭng kna Y‑Pôl hmao truh čiăng mđĭ ai leh anăn đru phung ƀuôn sang Aê Diê amâo mgei ai tiê ôh tơdah tlă anăp hŏng “klei dleh dlan” (êlan 3).
Phung tui hlue Khua Yang amâo tlaih ôh mơ̆ng klei lông dlăng hlăm klei đăo. Khua ƀĭng kna Y‑Pôl ăt hưn êlâo hŏng phung đăo ti Têsalônik tlă anăp hŏng lu klei dleh dlan hlăm êlan tui hlue Khua Yang (êlan 4). Klei yuôm bhăn jing klei mđing dlăng, wah lač, bi đru čiăng mđĭ ai leh anăn bi mđĭ klei đăo hdơ̆ng pô. Klă sĭt tơdah hgao klei lông dlăng phung ƀuôn sang Aê Diê srăng hriê kơ prŏng hlăm klei đăo leh anăn kjăp ai tiê tui hlue Khua Yang truh tơl knhal tuč.
Hdĭp ti lăn ala anei, klei lông dlăng, klei truh jing klei mâo hlăm klei hdĭp, leh anăn phung ƀuôn sang Aê Diê ăt msĕ mơh. Phung đăo brei thâo klei lông dlăng năng ai jing sa kdrêč hdră kčah mơ̆ng Aê Diê hŏng phung ƀuôn sang Ñu. Kyua leh tuôm hŏng klei dleh dlan, arăng ngă jhat… leh anăn dưi, srăng ba kơ drei lu klei tŭ dưn msĕ si knuih thâo gĭr (Y‑Yakơ 1:2-4; Rôm 5:3-5), klei sa ai leh anăn bi đru phung mkăn ăt dôk tuôm hŏng klei dleh dlan čiăng mđĭ ai hdơ̆ng pô (II Kôrantô 1:3-7).
Êngao anăn, hlăm sa bruă, klei dleh dlan drei găn jing klei bi knăl mơ̆ng sa klei hdĭp phung đăo mâo boh tŭ, klei hdĭp hgao klei lông dlăng čiăng krơ̆ng kjăp klei đăo. Grăp čô drei brei mđing dlăng, mđĭ ai hdơ̆ng pô čiăng grăp čô dưi mâo klei đăo kjăp hlăm djăp boh klei.
Si knuih drei mâo tơdah tuôm hŏng klei dleh dlan amâodah klei gun kpăk hlăm klei đăo?
Wah lač: Ơ Khua Yang, kâo bi mni kơ Ih kyua wăt tơdah yang jhat bi rai nanao leh anăn ngă gun kpăk klei đăo kâo, ƀiădah mâo Ih đru kâo čiăng amâo huĭ kơ klei dleh dlan, knang kơ Khua Yang nanao kjăp knhuang êbat leh anăn bi leh bruă klam Aê Diê jao, mbĭt anăn thâo kơ klei myang đru mơ̆ng Ih čiăng dưi đru kơ phung mkăn. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Bi Êdah 20:7-21:27
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
