Mathais 18:12-14
Nqe cim:
“Yog li ntawd, kuv pab yaj thiaj mus mus los los saum tej laj roob thiab saum tej roob siab. Lawv tawg mus nyob thoob ntiajteb los tsis muaj leejtwg nrhiav thiab coj lawv rov qab los” (Exekees 34:6)
Lus nug rau sawvdaws xav:
– Tswv Yexus siv tus duab hauv zaj lus piv txwv twg qhia meej hais tias Nws hmov tshua pab yaj?
– Vim tus tswv yug kam tso cuaj caum cuaj tug tseg thiab mus nrhiav tug uas yuam kev lawm?
– Peb siv tus yam ntxwv no rau hauv pawg ntseeg thiab tsev neeg li cas?
Tswv Yexus siv zaj lus piv txwv uas hais txog tus tswv yug yaj thiab pab yaj qhia txog Vajtswv txoj kev hlub, kev hmov tshua, kev txhawj txog txhua tus tibneeg uas yuam kev lawm. Tus duab ntawm tus tswv yug yaj uas muaj ib puas tug yaj tiamsis thaum muaj ib tug yuam kev ploj lawm, qhia tshwm kev hmov tshua thiab sib ncawg ntawm tus tswv nrog nws pab yaj. Thaum uas pom thiab paub hais tias muaj ib tug yuam kev ploj lawm nws kam tso cuaj caum cuaj tug cia thiaj mus nrhiav kom tau tus uas yuam kev ploj lawm rov los xwb xwb.
Nov tsis yog ib tug tswv yug yaj uas xaiv ntsej muag, tsis yog tus yaj ntawd muaj nqis lossis zoo dua lwm tus yaj tiamsis yog qhov uas tus tswv paub zoo nws txhua tus yaj tus cwjpwm. Pab yaj thaum tsis hnov tus tswv tus ntxhiab thiab lub suab, pab yaj yuav khiav ntxhov hnyo thiab tsis paub yuav mus qhov twg. Thaum cov yaj yim khiav yim mus deb tus tswv thiab yuav raug cov tsiaj noj nqaij tom noj lossis yuav poob mus rau hauv tej qhov zeb qhov tsuas. Cuaj caum cuaj tus yaj uas tseem nyob rau hauv lub nkuaj nyob muaj kev tso siab tiamsis tus yaj uas yuam kev lawm nws tabtom ntsib kev ntshai txog nws txojsia. Tus tswv yug yaj uas maj ceev nrooj mus nrhiav tus yaj yuam kev ploj lawm ces yog lub sijhawm uas yuav cawm tau tus yaj ntawd txojsia ntau dua thiab thaum nrhiav tau, nws yuav zoo siab kawg nkaus vim nws tsis xav kom muaj ib tug twg ploj mus li.
Tswv Yexus yog tus tswv yug yaj uas muaj hwjchim loj (Henplais 13:20). Zaj lus piv txwv uas Tswv Yexus hais, qhia hais tias peb yog cov uas tau Nws cawm thiab coj los rau hauv Nws lub nkuaj. Zoo li tus tswv yug yaj uas hlub thiab hmov tshua tug yaj uas yuam kev ploj lawm, Tswv Yexus hlub tshua peb txhua tus kawg nkaus, Nws txhawj, mob siab thiab nyob tsis qab thaum ib tug ntseeg kev ntseeg muag mos raug lub ntiajteb thiab tej kev ntseeg cuav rub khiav deb pawg ntseeg thiab poob kev ntseeg ntawm Vajtswv lawm. Yog li ntawd, Vajtswv xav kom peb txawj sib hlub tshua nyob rau hauv pawg ntseeg, tsev neeg, tsis txhob khib, piv rau ub rau no lossis tsis quav ntsej, vim peb cov kwvtij ntseeg tabtom muaj kev txhawj ntshai rau ntawm sab ntsujplig. Ntau zaus peb nrhiav kev tshem lawv tawm hauv pawg ntseeg mus vim tsis ua raws li peb siab nyiam, tiamsis Vajtswv xav kom peb ua siab ntev thov Vajtswv pab lawv, hmov tshua, saib xyuas thiab tu kom lawv loj hlob hauv kev ntseeg, vim cia kom loj hlob kev ntseeg yuavtsum muaj sijhawm, tsis txhob cia li txaus siab rau pab coob es tsis quav ntsej txog ib tug ntsujplig uas yuam kev lawm.
Thov Vajtswv:
Vajtswv, thov pab nyuam yaus ua neej paub hmov tshua txog cov uas nyob ib ncig ntawm nyuam yaus. Kom nyuam yaus paub txhawb thiab pab lwm tus loj hlob rau hauv kev ntseeg. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Leejtwg yog tus uas Vajtswv xav kom peb hmov tshua thiab mus nrhiav coj los rau Vajtswv?
Nyeem Vajluskub hauv peb lub xyoos: Phau Ntawv Nkauj 19
Kênh Youtube BHKTHN:
