Klei Aê Diê Blŭ: Y-Mathiơ 18:12-14
Êlan kliăng: “Biăp Kâo bra đuĕ leh, digơ̆ hiu rưng ti dlông jih jang čư̆ leh anăn ti dlông jih jang kbuôn dlông; biăp Kâo bra đuĕ leh tar ƀar lăn ala, amâo mâo sa čô tui duah digơ̆ ôh” (Y-Êsêkiêl 34:6).
Klei êmuh ksiêm mĭn: Ya rup bi hmô Khua Yang Yêsu yua čiăng bi êdah klei Ñu uêñ mĭn kơ phung biăp? Ya ngă pô mgăt srăng lui dua păn pluh dua păn drei biăp čiăng tui duah sa drei biăp klah đuĕ? Si drei mă yua klei mĭn pô mgăt hlăm Phung Sang Aê Diê leh anăn hlăm gŏ sang?
Khua Yang Yêsu yua klei yăl dliê kơ sa čô mgăt leh anăn phung biăp ñu čiăng bi hmô kơ klei Aê Diê khăp, leh anăn uêñ mĭn kơ phung anak mnuih dôk klah đuĕ. Rup sa čô mgăt mâo sa êtuh drei biăp ƀuh sa drei biăp klah đuĕ bi êdah kơ klei mgăt uêñ leh anăn kiêr kơ phung biăp ñu. Tơdah ƀuh mâo sa drei biăp klah đuĕ snăn mgăt lui mtam dua păn pluh dua păn drei nao duah biăp klah đuĕ tơl ƀuh.
Anei amâo djŏ pô mgăt dlăng kơ biăp mdê mdê ôh, kăn djŏ biăp klah đuĕ anăn jing yuôm hĭn kơ phung biăp mkăn rei, ƀiădah pô mgăt thâo klă klei jing kơ grăp drei phung biăp. Tơdah biăp amâo lŏ ƀâo mnâo amâodah amâo lŏ hmư̆ ôh asăp mgăt, gơ̆ srăng huĭ leh anăn êran hiu plă plia. Hlăk anăn biăp srăng tuôm hŏng klei huĭ hyưt kyuadah knư̆ gơ̆ êran knư̆ kbưi hŏng mgăt, srăng jing mnơ̆ng ƀơ̆ng kơ hlô jhŏng amâodah lă hlăm troh. Dua păn pluh dua păn drei dôk êđăp ênang hlăm war ƀiădah sa drei biăp klah đuĕ klei hdĭp gơ̆ dôk bi tlă anăp hŏng klei jŭ jhat. Klei mgăt nao duah hŏng klei ruăt srăng đru biăp klah đuĕ anăn mâo klei myun dưi dôk hdĭp lu hĭn, leh anăn sĭt nik mgăt mơak snăk tơdah lŏ ƀuh biăp klah đuĕ kyuadah gơ̆ amâo čiăng luč sa drei biăp ôh.
Khua Yang Yêsu jing Mgăt Khua kơ phung biăp (Hêbrơ 13:20). Klei Khua Yang yăl dliê čiăng lač snei, phung drei jing phung Khua Yang bi mtlaih leh – leh anăn atăt ba wĭt kơ war biăp Ñu. Msĕ si mgăt uêñ mĭn kơ sa drei biăp klah đuĕ, snăn mơh Khua Yang Yêsu uêñ mĭn kơ grăp čô drei! Khua Yang rŭng răng snăk leh anăn Ñu ênguôt, amâo hơĭt ôh tơdah phung đăo dôk kƀah klei thâo săng, ăt dôk mda hlăm klei đăo tŭ klei lăn ala leh anăn klei đăo soh mplư brei đuĕ kbưi mơ̆ng Phung Sang Aê Diê leh anăn lui wir klei đăo. Msĕ mơh, Ñu čiăng phung drei thâo bi uêñ mĭn hdơ̆ng drei hlăm Phung Sang Aê Diê, hlăm gŏ sang, đăm bi keh, đăm bi yông amâodah bi lui tha ôh, kyuadah phung ayŏng adei drei dôk hlăm klei hyưt huĭ amâo djŏ hlăm asei mlei kđeh ôh ƀiădah mngăt digơ̆. Tăp năng drei duah êlan suôt phung amâo djŏ ai drei brei digơ̆ kbiă đuĕ mơ̆ng Phung Sang Aê Diê, ƀiădah Khua Yang čiăng drei uêñ mĭn, gĭr đru wah lač leh anăn răng kriê čiăng đru digơ̆ dưi đĭ hriê kơ prŏng leh anăn dôk kjăp hlăm klei đăo, kyuadah klei đĭ hriê kơ prŏng hlăm klei đăo čiăng mâo lu mmông. Đăm ôh kyua mơak hŏng phung lu tlaih leh snăn lui hĕ mngăt sa čô mnuih luč leh.
Kơ hlei pô Khua Yang čiăng drei uêñ, tui duah leh anăn đru digơ̆ wĭt Khua Yang?
Wah lač: Ơ Khua Yang, akâo Ih đru kâo thâo uêñ kơ phung ayŏng adei Ih dưm leh jŭm dar kâo. Đru kâo jing sa čô mnuih thâo bi juh, bi mđĭ ai leh anăn đru pô mkăn đĭ hriê kơ prŏng hlăm klei đăo. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 19
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
