II Xwmtxheej 30:1-6
Nqe cim.
“Kuv nyob hauv lawv thiab koj nyob hauv kuv, kuv ua li ntawd kom lawv thiaj koom tau ib lub siab, ntiajteb thiaj paub hais tias koj txib kuv los thiab paub hais tias koj hlub lawv ib yam li koj hlub kuv.” (Yauhas 17:23)
Lus nug rau sawvdaws xav.
– Vajntxwv Hexekiyas muaj kev ntshaw dabtsi?
– Vajntxwv tau ua raws li nws kev ntshaw licas?
– Peb tsimnyog ua dabtsi los rhuav tshem tej kev tsis sib haum nrog peb tej kwvtij thaum koom pehawm tus Tswv?
Tomqab uas muab lub Tuamtsev rov fij rau tus Tswv lawm, vajntxwv Hexekiyas ntshaw kom cov Yixalayees sab qaumteb los rau cov Yudas sab qabteb koom ua Kevcai Hla Dhau vim ntev heev los lawm cov pejxeem tsis tau ua txoj kevcai ntawd raws li sau tseg (nqe 5). Peb pom txog qhov uas caw tagnrho sab qaumteb thiab qabteb hais mus hais los ntau zaug hauv ntu Vajluskub no. Vajntxwv txib neeg xa xov “mus thoob plaws cov Yixalayees thiab Yudas” (nqe 1), vajntxwv kuj xa ntawv mus caw xeem Efalayees thiab xeem Manaxes, yog ob xeem loj ntawm cov Yixalayees, caw lawv tuaj hauv lub Tuamtsev nroog Yeluxalees ua Kevcai Hla Dhau.
Vajntxwv thiab nws cov nomtswv nrog rau tagnrho cov Yudas pom zoo ua Kevcai Hla Dhau rau lub ob hlis ntuj vim npaj tsis txhij ua rau hauv lub ib hlis ntuj li uas lawv twb teem cia, thiab lawv “caw tagnrho cov Yixalayees, txij ntua pem lub nroog Das mus txog ntua nram lub nroog Npesenpas” (nqe 5), ntawd yog cov Yixalayees ob lub nroog loj nyob yav qaumteb thiab yav qabteb. Tsis tas li ntawd xwb, vajntxwv tseem txib neeg xa nws thiab cov nomtswv tej tsab ntawv mus thoob plaws Yixalayees thiab Yudas nqua hu txhua tus hais tias: “…nej cia li los cuag tus TSWV uas yog Anplahas, Ixaj thiab Yakhauj tus Vajtswv, nws thiaj yuav los cuag nej” (nqe 6). Txawm yog yav tas los nyob hauv ob lub tebchaws yeej muaj ntau yam tsis sib haum, los nyob ntawm tus Tswv sab lawv yeej tseem yog kwvtij koom ib Leej Txiv, yog Nws haivneeg. Vajntxwv Hexekiyas nkag siab tus Tswv nplooj siab, nws thiaj hla dhau tej kev tsis sib haum thiab siv zog ua kom lawv rov los sib koom hauv tib txojkev ntseeg, thiab tagnrho cov pejxeem hauv ob lub tebchaws yuav rov los pehawm tus Tswv tomqab uas yuamkev mus pe dab pe mlom ntau lub xyoo los lawm.
Tsis muaj yam dabtsi ua tus Tswv zoo siab cuag li thaum tus Tswv haivneeg los koom ua ib lub siab. Tswv Yexus thov Vajtswv rau cov thwjtim hais tias: “Kuv thov koj pab cov neeg uas hnov tej lus uas lawv qhia thiab los ntseeg kuv kom lawv koom ib lub siab. Txiv, thov cia lawv nyob hauv wb, ib yam li koj nyob hauv kuv thiab kuv nyob hauv koj” (Yauhas 17:21). Dhau ntawm cov thwjtim kev sib koom siab thiab lubneej ua timkhawv txog tus Tswv, ntiajteb thiaj paub txog Vajtswv thiab Tswv Yexus Khetos yog tus uas Vajtswv txib los, thiab paub txog txojkev cawmdim (Yauhas 17:3, 21, 23). Thov tus Tswv pab peb muab txhua yam kev tsis sib haum xeeb, tsis sib totaub tso povtseg thiab siv zog kom “koom tau ib lub siab”. Kawm raws vajntxwv Hexekiyas tus qauv, peb kuj tas siab ntsws pab txhua tus txij qabteb mus txog qaumteb thiab txhua qhov tig rov qab los cuag tus Tswv. Ua li ntawd lawv thiaj paub Tus Cawmseej yog lawv tus Tswv thiab tau koom ib lub siab hauv txojkev ntseeg Tswv Yexus.
Thov Vajtswv,
Tus Tswv, thov pub rau nyuam yaus muaj kev hlub thiab kev sib koom nrog lwm tus hauv kev ntseeg. Thov pub rau nyuam yaus muaj nplooj siab xav coj cov uas tsis tau ntseeg los cuag Koj, kom yim hnub yim muaj coob leej los sib koom hauv kev ntseeg Tswv Yexus. Nyuam yaus tuav Yexus Khetos lub npe thov, Amees.
Peb puas tau ua yam dabtsi rhuav kev sib koom ntawm cov ntseeg Tswv Yexus?
Nyeem Vajluskub hauv peb lub xyoos: Lukas 12
Kênh Youtube BHKTHN:
