Klei Aê Diê Blŭ: II Klei Yăl Dliê 30:1‑6
Êlan kliăng: “Kâo hlăm diñu, leh anăn Ih hlăm Kâo, čiăng kơ diñu dưi jing sa sĭt nik, čiăng kơ lăn ala dưi thâo kơ Ih tiŏ hriê leh Kâo, leh anăn kơ Ih khăp leh kơ diñu msĕ si Ih khăp leh kơ Kâo” (Y‑Yôhan 17:23)
Klei êmuh ksiêm mĭn: Ya klei Mtao Hêsêkia čiăng? Si ñu ngă leh klei čiăng ngă anăn? Si drei srăng ngă čiăng lui jih klei amâo thâo bi djŏ hdơ̆ng ayŏng amai adei tơdah mbĭt mđrăm kkuh mpŭ kơ Khua Yang?
Leh lŏ myơr Sang kkuh mpŭ, Mtao Hêsêkia čiăng jih jang phung ƀuôn sang mơ̆ng čar Israel tĭng dưr truh kơ čar Yuđa tĭng dhŭng mđrăm mbĭt hdơr mpŭ kơ Knăm Klei Găn kyuadah sui leh lu phung ƀuôn sang amâo hdơr mpŭ ôh kơ knăm anăn tui si klei mtă leh hlăm hdruôm hră klei bhiăn Aê Diê (êlan 5). Drei ƀuh klei mĭn kơ klei jak jih jang phung ƀuôn sang wăt krĭng dưr leh anăn krĭng dhŭng čih mñă wĭt mñă nao lu blư̆ hlăm trăn Klei Aê Diê Blŭ anei. Mtao tiŏ nao dĭng buăl nao hưn kơ “jih jang phung Israel leh anăn phung Yuđa” (êlan 1), ñu msĕ mơh čih hră mơĭt kơ phung Êphraim leh anăn phung Manasê, jing dua găp djuê lar êngŭm hlăm phung Israel, jak digơ̆ hriê kơ sang Aê Diê ti ƀuôn Yêrusalem čiăng hdơr mpŭ kơ Knăm Klei Găn. Mtao leh anăn phung khua leh anăn jih jang phung Yuđa čuăn hdơr mpŭ kơ Knăm Klei Găn ti mlan dua hrô kơ mlan sa tui si čih leh hlăm klei bhiăn kyuadah mâo klei bi gun, leh anăn diñu “mtă čiăng ngă sa klei hưn tar ƀar čar Israel, mơ̆ng ƀuôn Ƀêr-sêba truh kơ ƀuôn Dan” (êlan 5), jing dua boh ƀuôn tĭng nah dưr leh anăn tĭng nah dhŭng čar phung Yuđa. Êngao kơ anăn, mtao msĕ mơh tiŏ nao mnuih ba hră mtao leh anăn phung khua gĭt gai hiu hưn tar ƀar čar Israel leh anăn čar Yuđa čiăng iêo jak jih jang mnuih “lŏ wĭt bĕ kơ Yêhôwa, Aê Diê…čiăng kơ Yêhôwa dưi lŏ wir phă phung diih ăt dôk…” (êlan 6). Wăt tơdah êlâo dih plah wah dua ƀuôn ala mtao mâo lu klei amâo thâo bi djŏ ôh, ƀiădah hlăm Aê Diê diñu ăt jing ayŏng adei sa ama, jing phung ƀuôn sang Aê Diê sơăi. Mtao Hêsêkia thâo săng kơ klei pap Aê Diê kyuanăn ñu čiăng găn jih klei amâo bi djŏ leh anăn gĭr bi mguôp digơ̆ jing sa hlăm klei đăo, leh anăn jih jang phung ƀuôn sang dua ƀuôn ala mtao lŏ wĭt kkuh mpŭ kơ Aê Diê leh sui thŭn kkuh mpŭ kơ rup yang.
Amâo mâo ôh klei mkăn bi mơak kơ Aê Diê hĭn kơ klei phung ƀuôn sang Ñu bi mguôp. Khua Yang Yêsu wah lač kơ phung ƀĭng kna: “čiăng kơ jih jang diñu jing sa; msĕ si Ih, Ơ Ama, dôk hlăm Kâo, leh anăn Kâo dôk hlăm Ih” (Y‑Yôhan 17:21). Mơ̆ng klei phung ƀĭng kna bi mguôp jing sa leh anăn jing phung hưn kơ Khua Yang lăn ala srăng thâo kral Aê Diê leh anăn Khua Yang Yêsu Krist jing Pô Aê Diê Ama tiŏ hriê, leh anăn digơ̆ srăng thâo hdră Khua Yang bi mtlaih (Y‑Yôhan 17:3, 21, 23). Akâo Khua Yang đru drei lui hĕ jih jang klei bi roh, klei amâo bi djŏ leh anăn bi mguôp “jing sa sĭt”. Tui knuih Mtao Hêsêkia, drei msĕ mơh đru jih jang mnuih mơ̆ng dhŭng truh kơ dưr leh anăn tar ƀar lăn ala lŏ wĭt kơ Khua Yang. Čiăng hŏng klei anăn digơ̆ dưi mă tŭ Yang Krist jing Pô Bi Mtlaih leh anăn dưi bi mguôp jing sa hlăm klei đăo kơ Ñu.
Si ngă drei tuôm bi rai klei phung ayŏng adei hlăm Khua Yang bi mguôp jing sa mơ̆?
Wah lač: Ơ Khua Yang, brei bĕ kơ kâo ai tiê thâo khăp leh anăn bi mguôp jing sa hŏng phung ayŏng adei hlăm Ih. Brei msĕ mơh kơ kâo mâo ai tiê čiăng atăt lu mnuih ka thâo kral Ih ôh lŏ wĭt kơ Ih čiăng ƀrư̆ hruê mâo lu mnuih dưi bi mguôp jing sa kyua klei đăo kơ Khua Yang Yêsu Krist. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y‑Luk 12
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
