II Xwmtxheej Vajntxwv 30:17-20
Nqe cim:
“Qhov tseemceeb uas kuv xav kom nej ua yog nej yuav tsum thov Vajtswv pab sawvdaws thiab nej yuav tsum ua Vajtswv tsaug.” (I Timautes 2:1)
Lus nug rau sawvdaws xav:
– Vajntxwv Hexekiyas ua li cas rau cov neeg tsis tau ua kevcai ntxuav? Nqi zog li cas?
– Kev thov pab tseemceeb zoo li cas nyob hauv cov ntseeg Yexus Khetos?
Feem ntau cov neeg Yixalayees sab Qaumteb tuaj hauv lub nroog Yeluxalees raws li Vajntxwv Hexekiyas cov lus caw kom tig los cuag tus Tswv, puavleej yog cov uas tsis tau ua kevcai ntxuav raws li txoj cai ua Kevcai Hla Dhau. Lawv kub siab lug nrhiav tus Tswv tiamsis tsis paub txoj cai ua kevcai ntxuav, vim lawv ua neej nyob rau lub tebchaws uas cov vajntxwv puavleej pemlom, yog li lawv tsis tau kawm txoj cai. Cov neeg no tsis raug ntiab rov qab mus tsev, lawv yeej tau koom ua Kevcai Hla Dhau thiab. Cov neeg Levis hloov lawv tua tej tsiaj fij, thiab Vajntxwv Hexekiyas thov Vajtswv rau lawv. Vajntxwv paub tias tus Tswv yog tus Dawbhuv tiamsis kuj yog tus uas ua siab ntev, muaj kev hlub. Vajntxwv paub tias yog tsis ua raws li txoj kevcai ces yuav ua txhaum txoj cai thiab txhaum tus Tswv txojkev dawbhuv, ua rau lawv raug txim (Levis Kevcai 15:31; II Xwmtxheej Vajntxwv 26:16-20). Txawm yog li ntawd los, vajntxwv kuj paub Vajtswv nplooj siab thiab cov neeg ntawd lub siab. Vajntxwv thov Vajtswv zam txim rau lawv, txawm yog lawv ua tsis raws txoj cai ntxuav los lawv yog cov neeg muaj lub siab nrhiav tus Tswv tiag tiag. Lawv twb tuaj ncua kev deb heev tuaj txog hauv nroog Yeluxalees, lawv tiv txhua yam, yeem raug luag thuam, nrhiav tus Tswv (II Xwmtxheej Vajntxwv 30:10).
Tus Tswv pom tshab plaws Vajntxwv Hexekiyas lub siab hlub Nws, hlub cov pejxeem, xav kom lawv tig rov los cuag tus Tswv, thiab cov neeg no lub siab nrhiav Nws. Hnub thaud, tus Tswv twb coglus rau Vajntxwv Xalumoos hais tias Nws haivneeg thov Nws, nrhiav Nws thiab tig los cuag Nws ces Nws yuav zam txim rau lawv thiab pub rau lawv muaj tebchaws (II Xwmtxheej Vajntxwv 7:14). Yog li ntawd, Vajtswv mloog tej lus uas vajntxwv taij thov thiab kho dua Nws haivneeg, uas yog zam txim rau lawv thiab ntxuav kom lawv huv sab ntsujplig lawv thiaj los nyob tau ze Nws, ua Kevcai Hla Dhau (Yelemis 3:22; Phau Ntawv Nkauj 41:4). Tsis yog nqua hu cov neeg uas ntev tsis pehawm Vajtswv tig rov los cuag Nws xwb, Vajntxwv Hexekiyas tseem thov Vajtswv rau lawv thiab, vim ua li no lawv thiaj tsis raug tus Tswv rau txim, tiamsis tau zam txim thiab lees yuav.
Hauv cov ntseeg Yexus, txojkev thov Vajtswv pab lwm tus, ib leeg hmov tshua ib leeg yog qhov tseemceeb heev. Tswv Yexus tabtom thov Vajtswv rau peb vim Nws hlub peb (Loos 8:34; Henplais 7:25). Vajtswv xav kom peb yuav tsum thov Vajtswv pab rau lwm tus thiab. Peb tsuas thov tau Vajtswv pab rau lwm tus thaum peb muaj lub siab hlub, hmov tshua txog lawv txojkev ntseeg thiab lub siab heev dua li txoj kevcai, thiab thaum ib leeg thov Vajtswv pab rau ib leeg ces peb ib leeg yim paub ua siab ntev rau ib leeg dua. Thov Vajtswv pub rau peb kawm tau Vajntxwv Hexekiyas tus qauv, hmov tshua txog lwm tus txojkev ntseeg, ua siab ntev rau tej uas lawv ua tsis tau, lub tsamthawj txomnyem es ib leeg thov Vajtswv pab rau ib leeg. Thiab peb kuj tsis hnov qab thov Vajtswv pab rau cov neeg uas peb ua timkhawv qhia tus Tswv zaj.
Thov Vajtswv,
Tus Tswv, ua Koj tsaug vim Koj hlub thiab thov Vajtswv pab nyuam yaus. Koj txojkev hlub nyuam yaus loj heev. Thov Koj pab kom nyuam yaus muaj lub siab nquag, hlub cov kwvtij ntseeg thiab thov Vajtswv pab rau lawv. Nyuam yaus tuav Tswv Yexus lub npe thov, Amees.
Peb puas tabtom thov Vajtswv pab rau peb cov kwvtij ntseeg tas siab los yog ua tus tsis paub lawv lub neej li?
Nyeem Vajluskub hauv peb lub xyoo: II Vajntxwv 8
Kênh Youtube BHKTHN:
