Klei Aê Diê Blŭ: II Klei Yăl Dliê 30:17-20
Êlan kliăng: “Snăn êlâo kơ jih jang klei, kâo mtrŭt brei ih kwưh, akâo, wah lač brei kơ arăng leh anăn bi mni kơ Aê Diê kyua jih jang mnuih” (I Y-Timôthê 2:1).
Klei êmuh ksiêm mĭn: Ya bruă Mtao Hêsêkia ngă brei kơ phung ka bi doh ôh diñu pô? Ya jing boh kơ bruă ngă anăn? Si klei bi đru wah lač brei jing yuôm ti krah phung đăo?
Păt čiăng jih phung mơ̆ng čar Israel tĭng dưr hriê kơ ƀuôn Yêrusalem tui si klei Mtao Hêsêkia iêô jak brei lŏ wĭt kơ Aê Diê, ka bi doh digơ̆ pô ôh tui si klei bhiăn ƀơ̆ng Klei Găn. Digơ̆ duah Aê Diê hŏng jih ai tiê, ƀiădah kƀah klei thâo săng kơ klei bhiăn bi doh klei soh, kyuadah digơ̆ hdĭp hlăm čar tinăn jih jang phung khua kiă kriê kkuh mpŭ kơ rup yang sơăi, kyuanăn amâo mâo bi hriăm digơ̆ ôh. Arăng amâo suôt wĭt digơ̆ ôh ƀiădah ăt digơ̆ dưi ƀơ̆ng Knăm Klei Găn. Phung Lêwi bi mdjiê êđai biăp Klei Găn kơ grăp čô digơ̆, leh anăn Mtao Hêsêkia wah lač brei kơ digơ̆ mơh. Mtao thâo Aê Diê jing Pô doh jăk, ƀiădah Ñu ăt jing Pô jăk leh anăn bŏ hŏng klei khăp mơh. Mtao thâo tơdah amâo ngă djŏ tui si klei mtă ôh jing soh hŏng klei bhiăn, bi čhŏ klei doh jăk Aê Diê, leh anăn srăng tŭ klei Aê Diê ngêñ (Bruă Lêwi 15:31; II Klei Yăl Dliê 26:16-20). Wăt snăn dưn mơh, Mtao ăt thâo kơ klei pap Aê Diê leh anăn si ai tiê phung anei jing. Ñu akâo kơ Aê Diê pap brei klei soh digơ̆, wăt tơdah digơ̆ amâo ngă djŏ tui si klei bhiăn bi doh klei soh dưn, ƀiădah digơ̆ jing phung duah Aê Diê hŏng jih ai tiê. Mơ̆ng kbưi digơ̆ hriê kơ ƀuôn Yêrusalem bŏ hŏng klei suăi êmăn. Digơ̆ tŭ jih djăp mta klei, wăt tŭ klei phung ayŏng adei digơ̆ tlao mưč mơh čiăng duah Aê Diê (II Klei Yăl Dliê 30:10).
Aê Diê ƀuh jih klei Mtao Hêsêkia khăp kơ Aê Diê, khăp kơ phung ƀuôn sang, čiăng digơ̆ lŏ wĭt kơ Aê Diê, leh anăn Aê Diê ƀuh mơh klei phung ƀuôn sang anei čiăng duah Ñu. Mphŭn dô, Aê Diê ƀuăn hŏng Mtao Salômôn tơdah phung ƀuôn sang wah lač, duah ƀô̆ mta Ñu, leh anăn lui jih êlan soh digơ̆, snăn Ñu srăng pap brei klei soh digơ̆ leh anăn bi hlao čar digơ̆ (II Klei Yăl Dliê 7:14). Kyuanăn, Aê Diê hmư̆ klei Mtao Hêsêkia wah lač leh anăn bi hlao phung ƀuôn sang Ñu, čiăng lač Ñu pap brei klei soh digơ̆ leh anăn bi doh klei hdĭp myang digơ̆, čiăng digơ̆ dưi hriê giăm Ñu, dưi ƀơ̆ng Knăm Klei Găn (Y-Yêrêmi 3:22; Klei Mmuñ Hđăp 41:4). Amâo djŏ knŏng iêô jak jih jang phung mơ̆ng sui amâo lŏ kkuh mpŭ kơ Aê Diê lŏ wĭt kơ Aê Diê ôh, ƀiădah wăt Mtao Hêsêkia wah lač brei mơh kơ digơ̆, hŏng klei anăn digơ̆ amâo tŭ klei Aê Diê bi kmhal ôh, ƀiădah mâo klei Aê Diê tŭ leh anăn pap brei kơ klei soh.
Ti krah phung đăo kơ Krist, klei bi đru wah lač, klei bi uêñ mĭn hdơ̆ng găp jing klei yuôm bhăn snăk. Khua Yang Yêsu dôk đru wah lač brei kơ phung drei kyuadah Ñu khăp kơ drei (Rôm 8:34; Hêbrơ 7:25). Khua Yang čiăng drei đru wah lač brei mơh kơ phung mkăn. Amâo djŏ knŏng ngă mă tui si klei bhiăn ôh, knŏng tơdah drei mâo klei khăp leh anăn uêñ mĭn sĭt kơ digơ̆ kơh drei dưi wah lač brei kơ digơ̆, leh anăn êjai bi đru wah lač drei srăng thâo bi pap hĭn hdơ̆ng drei. Akâo Khua Yang đru drei hriăm mơ̆ng Mtao Hêsêkia, uêñ mĭn kơ klei đăo phung ayŏng adei, bi pap brei kơ klei awăt, kơ klei dleh dlan čiăng đru bi wah lač hdơ̆ng ayŏng adei. Leh anăn đăm drei wơr bĭt ôh đru wah lač brei kơ phung drei tuôm hưn leh Anăn Khua Yang kơ digơ̆, čiăng digơ̆ mâo mmông găl lŏ wĭt kơ Khua Yang.
Si ngă drei dôk wah lač brei kơ phung ayŏng adei drei jih ai tiê mơ̆, amâodah drei amâo uêñ ôh kơ klei truh kơ digơ̆?
Wah lač: Ơ Khua Yang, lač jăk Ih kyuadah Ih khăp leh anăn đru wah lač brei leh kơ kâo. Klei Ih khăp kơ kâo prŏng êdimi. Đru kâo mâo ai tiê hur har, khăp kơ phung ayŏng adei leh anăn đru wah lač brei kơ digơ̆. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: II Bruă Mtao 8
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
