II Hơ’mon 30:13-14
“Iĕm athei hŭt đĭ tơdrong yoch wă kơ jing thoi ‘bĕng tơpŭng ‘nao tam mă pơjrâu ‘buih, yua kơ ‘Bok Kei-Dei pơklaih đĭ boih tơdrong yoch iĕm. Yêsu Sư thoi triu đe ‘bet sa pơm Giĕng Năm Brih wă ‘blŏk hơdơ̆r kơ tơdrong ‘Bok Kei-Dei pơklaih đơ̆ng dêh Êyiptơ, na Yêsu boih pơklaih bơ̆n.” (I Kôrintô 5:7)
Nơ̆r jet tơchĕng pơwao:
– Đei lơ lap lơlang kon bơngai năm akŭm tơ pơlei Jêrusalem lăm khei ‘bar wă wei giĕng ayơ?
– Dôm lu bơngai ‘nâu đei pôm jơhngơ̆m đon pơm tơdrong kiơ?
– Bơ̆n kăl kơ pơm kiơ wă tơgŭm kơ anih bơ̆n arih băt gah tơdrong ‘lơ̆ng rơgoh Kră Yang?
Kơplah Pơtao Hêsekia krao athei kon pơlei wih brŏk tơ Kră Yang, đei lơ bơngai năm akŭm tơ pơlei Jêrusalem wă pơm giĕng “’bĕng ưh kơ đei ‘buih pông” wă khan lu sư kư̆m pơm hloi giĕng Năm Brih. Adrol kơ noh, lu ‘bok soi păng lu bơngai Lêwi mơ̆ng kiơ̆ nơ̆r Pơtao Hêsekia na puih hơmet hnam akŭm mă ‘lơ̆ng rơgoh (II Hơ’mon 29:4-5). Lu sư iŏk hŭt lê̆ dôm lu tơmam mă ưh kơ rơgoh đơ̆ng lăm hnam akŭm klơ̆m hŭt lê̆ đĭ tơ lăm thŭng Kidrôn, mălei lu sư hơmet lăp jơ ‘noh đĕch. Kơplah noh sơ̆ pơtao Ahas jơ̆ ‘bă pơtao Hêsekia đei “Na sư pơdơ̆ng chơnang soi tơ rim mum trong lăm pơlei Jêrusalem” (II Hơ’mon 28:24). Yua kơ ‘maih wă dêh wih brŏk tơ Kră Yang, lu bơngai năm akŭm ưh kơ kĕ ĕnh, kơplah ‘bôh chơnang soi yang nai ‘bĕnh tơ lăm Jêrusalem. Kơlih kơ thoi noh, adrol kơ pơm giĕng Năm Brih lu sư iung iŏk lê̆ “chơnang soi kơ yang nai lăm pơlei Jêrusalem păng chơ nang đe soh ‘long ‘bâu phu”, klơ̆m hŭt lê̆ đĭ tơ lăm thŭng Kidrôn. Đơ̆ng noh, bơih na tơdrong hơmet jơ̆p kơ pơlei Jêrusalem ưh kơsĭ lăm hnam akŭm ôh.
Giĕng ‘bĕng ưh kơ đei ‘buih pông đei pơjing đơ̆ng rŏng kơ giĕng Năm Brih minh năr păng pơm giĕng lăm tơpơh năr. Lăm tơpơh năr noh, kon pơlei ưh kơ gơh sa ‘bĕng đei ‘buih pông păng lăm hnam sư ưh pă đei ‘buih pông (LĐ Êyiptơ 12:18-19). Kơnhăm wă tơ’blŏk đêl lu sư hăt hot lĕch đơ̆ng dêh Êyiptơ sơ̆ thoi noh ưh kơ đei tôm mah jơ năr wă gô ‘buih pông lăm ‘bĕng. Hlôi kơ dôm jơ hnơr, adrol kơ wă pơm giĕng Năm Brih, bơngai Juđê hŭt lê̆ ‘buih pông đơ̆ng lăm hnam păng lu sư chơ chă jơ̆p kơ lăm hnam hli kơ đei ‘buih pông păng hŭt lê̆ pơđĭ. ‘Bok Pôl bơtho khan ‘buih pông wă pơma gah tơdrong yoch. Tơdrong kơnê̆, tơmam hơkăm, păng bơ̆n athei pơm kơ akâu kơdih rơgoh ‘buih pông so, jing tơpei ‘bôt ‘nao ưh kơ đei ‘buih pông yua kơ ‘Bok Krist bơih tơmam soi giĕng Năm Brih soi kơ lu bơ̆n đe pơlôch wă sut rơgoh tơdrong yoch bơ̆n (I Kôrintô 5:7-8).
Dang ei, bơ̆n kư̆m athei adrin hăm jơhngơ̆m hŭt lê̆ đĭ dôm tơdrong arih bơ̆n oei kơkuh kơ yang nai, dôm tơdrong kơnê̆ Kră Yang ưh kơ lăp đon, tôm tơmam thoi ‘buih pông tơdrong yoch oei đei lăm chăl arih bơ̆n. Kơplah kĕ arih thoi noh, bơ̆n gơh tơgŭm kơ anih mă bơ̆n arih, anih bơ̆n bơ̆jang gơh băt gah tơdrong ‘lơ̆ng rơgoh ưang Kră Yang. Đơ̆ng tơdrong bơ̆n arih păng pơm kơdranh gô đei lơ bơngai achăng tŭk lê̆ lu rup yang nai na wih brŏk tơ Kră Yang.
Kơkuh kơ Kră Yang, apinh Ih ăn kơ inh đei jơhngơ̆m ‘maih hŭt lê̆ đĭ dôm tơdrong thoi ‘buih pông tơdrong yoch lăm chăl arih, păng tơgŭm kơ lu bơngai jum dăr hŭt lê̆ đĭ lu yang nai na wih brŏk tơ Kră Yang. Krao khan yua anăn Kră Yang Yêsu Krist, Amen!
Bơ̆n hăm chơ chă hơlen păng hŭt lê̆ đĭ lu yang ayơ lăm chăl dang ei, tơdrong juăt kơnê̆, ‘buih pông so ayơ mă oei lăm chăl arih bơ̆n ưh?
Đŏk Sơ̆p Hla bơar ‘Bok Kei-Dei lăm pêng sơnăm: I Lu Pơtao 11
Kênh Youtube BHKTHN:
