Rôm 15:14-22
“Inh bơtho tơ anih mă đe ưh tam mă kơtơ̆ng. Inh ưh kơ bơtho tơ anih đe bơtho boih ôh, kơnh dang inh pơm hnam yua đêl jrăng đe chă.” (Rôm 15:20)
Nơ̆r jet tơchĕng pơwao:
– ‘Bok Pôl ‘maih pơma dơnuh bơtho kiơ kơ khul bơngai lui tơ pơlei Rôm?
– Bơ̆n yua iŏk tơdrong kiơ đơ̆ng ‘bai pơhrăm ‘nâu?
‘Bok Pôl chih nơ̆r hơpong kơ lu bơngai lui tơ pơlei Rôm păng roi gah tơdrong jang Kră Yang pơjao ră roi Tơdrong ‘Nao ‘Lơ̆ng ăn kơ bơngai tơmoi.
Blŭng a, ‘bok Pôl pơư gah jơhngơ̆m iơ̆m dim, tơdrong hlôh băt, tơdrong kĕ pran lu sư lăm tơdrong bơtho tơ’bôh dih băl (trong 14). Bơngai lui tơ pơlei Rôm đei jơhngơ̆m wă dŏng tơgŭm hơlăng hơmrah tơgŭm kơ lu bơngai mă pơmat tat. Lu sư adrin hŏk pơhrăm nơ̆r Kră Yang păng pơm kiơ̆ nơ̆r đei hŏk pơhrăm nơ̆r Kră Yang noh.
Mă ‘bar, sư wă ră roi tơblang yua kơ kiơ đei nơ̆r mơ’nah lăm kơthơ sư đei pơma pran păng tơpăt, rŏ lăng đei bơngai ưh kơ lăp đon (trong 15). Sư tơblang sư wă tơ’blŏk kơ lu sư dôm tơdrong Kră Yang đei bơtho.
Mă pêng, sư tơbăt Kră Yang pơjao ăn kơ sư tơdrong jang pơyơ̆r bơtho Tơdrong ‘Nao ‘Lơ̆ng kơ lu bơngai tơmoi, ră roi kơ lu sư, păng tơmam mă sư pơyơ̆r kơ Kră Yang noh lu bơngai lui tơmoi gơh pơjing. Sư gơh pơm kơdih lăm Kră Yang Yêsu gah tơdrong jang (trong 17). Mălei đơ̆ng tơdrong sư roi tơblang, bơ̆n hlôh sư lăp pơư gah tơdrong Kră Yang đei wơh athei sư pơma, păng tuch luch noh lu bơngai tơmoi đei chu kơ Kră Yang (trong 18). Yua kơ đơ̆ng tơdrong mơsêh hlĭch đơ̆ng tơdrong mơsêh Yang Bơngol ‘Lơ̆ng na sư đei bơtho Tơdrong ‘Nao ‘Lơ̆ng jơ̆p jang, đơ̆ng dêh Jêrusalem truh tơ dêh Iliria, jơ̆ minh teh đak lăm dêh Rôm gah yă nơ̆m pơlei Masêđôn. Đĭ đăng dôm tơdrong noh đơ̆ng Kră Yang pơm. Mă khan lei ră, bơ̆n đei jơhngơ̆m iŏk đơ̆ng ‘bok Pôl đei jơhngơ̆m bơ̆jang sư bơtho trŏ thoi dôm tơdrong Kră Yang lăp đon, păng arih pơm ‘lơ̆ng đơ̆ng nơ̆r pơma hăm tơdrong jang Yang Bơhngol ‘Lơ̆ng tơbăt tơdrong jang sư đei yua ‘lơ̆ng tơpăt (trong 18-19).
Mă puăn sư maih klah asong tơdrong bơtho Tơdrong ‘Nao ‘Lơ̆ng tơ anih mă đe tam mă kơtơ̆ng Anăn ‘Bok Krist (trong 20). ‘Nâu bơih tơdrong Kră Yang wă thoi đei chih: “Inh jang kiơ̆ kơ đe chih lăm sơ̆p hla bơar ‘Bok Kei-Dei sơ̆ thoi âu: “Lu bơngai ưh tam mă kơtơ̆ng gô ‘bôh, lu bơngai ưh kơ hlôh gô nhên.” (trong 21; Êsai 52:15). Đơ̆ng jơ kơplah Kră Yang krao ‘bok Pôl đĭ jơhngơ̆m lăm tơdrong jang chă bơtho, ‘nâu kư̆m tơdrong mă lơ wơ̆t sư ‘maih năm ngôi hơpong tơ bơngai lui tơ pơlei Rôm mălei ưh kơ yĕng (trong 22).
Rim ‘nu lu bơ̆n mă khan ‘bok bơtho dah bơngai Kră Yang pơjao ăn kơ bơ̆n tơdrong jang phara pha. Tơdrong gĭt kăl noh ưh kơ sĭ pơting hăm tơdrong bu hloh kơ bu, mălei bơ̆n pơyơ̆r bơih akâu bơ̆n kơ Kră Yang yua thoi yơ. Athei gơnang kơ Kră Yang wă krao khan păng pơm kơdranh gah Kră Yang kơ lơ bơngai jum dăr băt tơdrong Kră Yang dŏng pơklaih.
Kơkuh kơ Ih Kră Yang, inh bơnê kơ Ih ăn kơ inh đei pơm kơmĭl hơdah thoi ‘bok Pôl. Apinh ăn kơ inh đei jơhngơ̆m ră roi pơm kơdranh gah Kră Yang kơ lơ bơngai. Apinh Kră Yang ăn kơ inh jơhngơ̆m iơ̆m dim, tơdrong hlôh wao nơ̆r Kră Yang, đei jơhngơ̆m băt bơtho pơlung wă kơ inh ră roi gơh đei yua kơ Ih. Krao khan yua anăn Kră Yang Yêsu Krist, Amen.
Jơhngơ̆m tơdrong arih ‘bok Pôl đei ‘bơm thoi yơ kơ chăl arih lu bơ̆n?
Đŏk Sơ̆p Hla bơar ‘Bok Kei-Dei lăm pêng sơnăm: Êsai 47
Kênh Youtube BHKTHN:
