Chivkeeb 24:1-9
Nqe cim:
“Tus uas ntseeg Vajtswv tsis txhob mus nrog tus uas tsis ntseeg koom kwv ib tug quab, rau qhov nkawd yeej kwv tsis tau ua ke. Qhov phem thiab qhov zoo, qhov kaj thiab qhov tsaus yeej nyob tsis tau ua ke?” (II Kauleethaus 6:14).
Lus nug rau sawvdaws xav:
– Anplahas muaj kev nyuaj siab dabtsi?
– Nws cob haujlwm rau tus tubtxib los ntawm kev ntseeg zoo licas?
– Zaj no qhia pom licas txog niam txiv kev nyuaj siab rau tej menyuam kev nrhiav txijnkawm?
– Muaj txoj haukev twg pab cov niam txiv uas nyuaj siab rau tej menyuam kev sib yuav?
Anplahas twb laus heev lawm thiab tus Tswv tau foom koob hmoov rau txhua yam uas Anplahas tau ua. Tomqab uas pog Xalas tuag lawm, Anplahas kev txhawj, kev nyuaj siab yog nrhiav pojniam rau nws tus tub Ixaj. Nws tau muab tes haujlwm ntawd cob rau tus tubtxib laus dua lwm tus uas nws tso siab, nws tau qhia nws nplooj siab thiab hais kom tus tubtxib yuav tsum coglus tsis yuav lwm haivneeg tej ntxhais rau Ixaj yuav ua pojniam, tiamsis yuav tsum rov mus rau lawv qub tebchaws, nrhiav thiab yuav ib tug uas yog tus Tswv haivneeg (nqe 1-4). Tus tubtxib no npe hu ua Eli-exes, nws tau nrog Anplahas tsevneeg nyob ntev los, nws paub meej nws tus tswv txojkev ntseeg thiab txojkev ntshaw. Nws tau nug txog tej yam nws xav tias yuav tshwm muaj ua ntej coglus kom ua tau tiav raws li nws tej lus cogtseg. Anplahas muaj lub siab ntseeg ruaj khov rau tus Tswv tej lus cogtseg txog haivneeg dawbhuv uas tus Tswv yuav pub rau nws cajces. Nws ntseeg hais tias tus Tswv yuav tso timtswv coj nws tus tubtxib mus nrhiav tau ib tug pojniam zoo rau nws tus tub hauv nws qub tebchaws thiab tsis tas yuav coj nws tus tub mus. Eli-exes tau coglus thiab ua raws nraim li tej uas nws tus tswv hais (nqe 5-9).
Zaj xwm no qhia rau peb zaj kawm txog tus qauv kev ntseeg ntawm Anplahas thiab nws tus tubtxib. Thaum xav txog kev nrhiav txijnkawm rau menyuam, nkawd ua siab tawv nrhiav tus muaj kev ntseeg li Vajtswv tej lus qhia, tsis mus yuav lwm haivneeg, txawm yog yuav nyuaj nrhiav tau tus koom kev ntseeg thiab raug tos ntev tiamsis ntawd yog yam uas haum tus Tswv siab thiab Nws yeej yuav qhib kev.
Ntawm no kuj yog niam txiv txojkev sim siab rau tej menyuam. Cov niam txiv ntseeg Yexus yuav tsum tuav txojcai kev ntseeg thiaj yuav qhuab qhia thiab taw qhia menyuam nrhiav tau tus txij tus nkawm uas koom kev ntseeg. Timthawj Paulus tau qhuab ntuas cov ntseeg txhob muab tus kheej khi nrog cov tsis ntseeg vim qhov phem thiab qhov zoo yeej nyob tsis taus uake (II Kauleethaus 6:14). Vim li ntawd, niam txiv yuav tsum pab menyuam xaiv tus txijnkawm zoo kom tsis muaj kev kub ntxhov, puastsuaj hauv lub cuabyig rau yav tomqab. Niam txiv kuj yuav tsum qhia menyuam ua neej sib txuas nrog tus Tswv thiab Nws Txojlus puag thaum lawv tseem yau kom tej menyuam paub nrhiav tus Tswv lub siabnyiam thaum muaj kev txiavtxim siab hauv lubneej, tshwjxeeb yog hauv kev xaiv txijnkawm. Nkawm niam txiv twg los kuj muaj kev nyuaj siab thaum menyuam txog xyoo yuav txij yuav nkawm, thiab txoj haukev tseemceeb tshajplaws yog tseg sijhawm los thov Vajtswv rau tej menyuam kev nrhiav txijnkawm txawm yog lawv tseem yau lossis twb hlob tiav lawm.
Thov Vajtswv,
Tus Tswv, thov pab nyuam yaus muaj lub siab tawv rau yam haum Koj siab hauv kev coj qhia meyuam rhais ruam mus rau lubneej txijnkawm hauv kev ntseeg. Thov qhuab ntuas nyuam yaus tas siab taij thov Koj rau tes haujlwm no txij hnub no mus. Nyuam yaus tuav Yexus Khetos lub npe thov, Amees.
Peb tabtom thov Vajtswv pab menyuam kev nrhiav txijnkawm licas lawm?
Nyeem Vajluskub hauv peb lub xyoo: Mathais 27
Kênh Youtube BHKTHN:
