Klei Aê Diê Blŭ: Klei Mphŭn Dơ̆ng 24:1-9
Êlan kliăng: “Đăm bi mđua knông hŏng phung amâo đăo ôh. Kyuadah ya klei bi mguôp dưi mâo klei kpă hŏng klei wê? Amâodah ya klei bi mguôp klei mngač dưi mâo hŏng klei mmăt?” (II Kôrantô 6:14)
Klei êmuh ksiêm mĭn: Ya klei Y-Abraham dôk hnĭng? Hŏng si ai tiê knang, ñu jao bruă kơ dĭng buăl ñu knang? Klei yăl dliê anei brei ƀuh si ai tiê amĭ ama hnĭng kơ klei jing ung mô̆ phung anak? Si hdră êlan mkra kơ klei amĭ ama hnĭng kơ klei jing ung mô̆ phung anak?
Y-Abraham mduôn snăk leh, leh anăn Aê Diê brei leh klei jăk jĭn kơ ñu hlăm djăp mta mnơ̆ng. Mmông anei klei ñu dôk hnĭng tơdah êdei kơ H’Sara djiê, kơ klei jing ung mô̆ Y-Isăk anak êkei ñu khăp. Ñu jao leh bruă duah brei mô̆ kơ anak ñu hlăm kngan dĭng buăl ñu knang, pô mă bruă sui thŭn hĭn hlăm sang ñu, bi êdah ai tiê ñu leh anăn brei dĭng buăl kat asei amâo mă ôh mô̆ kơ anak êkei ñu mơ̆ng phung mniê tue, ƀiădah brei nao wĭt kơ čar ñu pô duah leh anăn mă mô̆ kơ anak êkei ñu mơ̆ng phung ƀuôn sang Aê Diê (êlan 1-4). Dĭng buăl anei jing Y-Êliêser dôk mbĭt hlăm sang khua ñu sui thŭn leh, snăn thâo săng klă klei đăo leh anăn klei khua ñu čang hmăng. Ñu bi êdah dŭm mta klei ñu bi mĭn, êlâo kơ ñu kat asei čiăng dưi rơ̆ng klei ñu ƀuăn hŏng khua ñu. Y- Abraham kjăp ai tiê đăo kơ klei Aê Diê ƀuăn Ñu srăng brei găp djuê doh jăk. Ñu đăo kơ Aê Diê srăng tiŏ nao dĭng buăl jăk atăt gai dĭng buăl ñu duah sa čô mô̆ jăk kơ anak ñu ti čar ñu pô, ƀiădah amâo guôn atăt ba anak êkei ñu nao mbĭt ôh. Y-Êliêser kat asei srăng ngă djŏ tui si klei khua ñu mtă mtăn (êlan 5-9).
Klei yăl dliê brei kơ drei klei hriăm bi hmô kơ klei đăo knang kơ Aê Diê mơ̆ng Y-Abraham wăt mơ̆ng pô dĭng buăl. Tơdah bi mĭn kơ klei jing ung mô̆ kơ anak, diñu čuăn tui duah mnuih huĭ mpŭ kơ Aê Diê djŏ tui si hnơ̆ng čuăn Klei Aê Diê Blŭ, amâo mă ôh mô̆ mơ̆ng phung tue, wăt tơdah tui duah mnuih mbĭt sa klei đăo jing dleh dlan hĭn leh anăn gĭr dôk guôn, ƀiădah anăn yơh jing klei Aê Diê čiăng, sĭt nik Ñu srăng pŏk êlan.
Anei ăt jing klei lông dlăng kơ amĭ ama hŏng phung anak mơh. Amĭ ama phung đăo kơ Krist brei djă pioh klei bhiăn huĭ mpŭ kơ Aê Diê, čiăng mtô lač leh anăn atăt gai phung anak duah ung mô̆ mbĭt sa klei đăo. Khua ƀĭng kna Y-Pôl mñă leh phung đăo đăm kă drei pô hlăm klei bi mguôp hŏng phung amâo đăo kơ Aê Diê ôh, kyuadah si klei kpă ênô dưi bi mguôp mbĭt hŏng klei jhat ƀai? (II Kôrantô 6:14). Kyuanăn, brei amĭ ama đru anak mâo klei čuăn ruah djŏ klei jing ung mô̆, čiăng dưi tlaih klei keh koh, amâo thâo bi djŏ hlăm gŏ sang kơ êdei. Brei amĭ ama ăt atăt gai phung anak hdĭp hlăm klei bi mguôp hŏng Khua Yang leh anăn Klei Ñu Blŭ dơ̆ng mơ̆ng hđeh điêt, čiăng kơ phung anak thâo tui duah klei Khua Yang čiăng hlăm djăp mta klei čiăng ngă hlăm klei hdĭp diñu, boh nik nak hlăm klei jing ung mô̆. Jih jang amĭ ama mâo sơăi ai hnĭng tơdah phung anak truh thŭn dôk ung mô̆, leh anăn hdră êlan yuôm hĭn jing pioh mmông wah lač lu kơ klei jing ung mô̆ phung anak thâodah phung anak prŏng khue leh amâodah adôk điêt.
Si drei dôk wah lač kơ klei jing ung mô̆ phung anak drei?
Wah lač: Ơ Khua Yang, akâo Ih đru kâo mâo ai tiê krơ̆ng kjăp hnơ̆ng čuăn Khua Yang kơ bruă atăt gai phung anak mŭt hlăm klei jing ung mô̆ huĭ mpŭ kơ Aê Diê. Akâo Ih mñă brei kâo hdơr wah lač hŏng jih ai tiê kơ mta bruă anei hruê anei mtam. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Mathiơ 27
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
