Yausuas 1:6-9
Nqe cim.
“Thaum sawvdaws tuaj ua ke pehawm Kuv, yuav tsum muaj neeg nyeem Kuv phau Kevcai rau sawvdaws mloog. Koj yuav tsum niaj hnub niaj hmo kawm thiab ua raws li tej lus ntawd, koj tes haujlwm thiaj yuav tiav thiab vammeej” (Yausuas 1:8).
Lus nug rau sawvdaws xav:
- Tus Tswv samhwm rau Yausuas licas ua ntej uas nws yuav coj tus Tswv
- haivneeg mus hauv Lub Tebchaws Coglus Tseg?
- Muaj lo lus cogtseg twg nrog rau lo lus samhwm no?
- Peb tabtom ua tes haujlwm niaj hnub niaj hmo kawm Vajtswv Txojlus zoo
licas lawm?
Sawv los tuav Mauxes tes haujlwm, Yausuas yuav tsum coj tus Tswv haivneeg Yixalayees mus txeeb Lub Tebchaws Coglus Tseg los ua lawv tug. Thaum yuav ua lub luag haujlwm loj thiab hnyav no, Yausuas muaj ntau kev txhawj xeeb, thiab Vajtswv paub meej tej ntawd. Vim li ntawd, Nws thiaj qhia rau Yausuas tej yam tseemceeb ua ntej Yausuas yuav ua tes haujlwm loj no. Ib yam haujlwm tshwjxeeb thiab tseemceeb nyob hauv tej lus qhia no, yog xyuamxim ua raws li tus Tswv tej kevcai txhua lo (nqe 7-8).
Vajtswv txhawb Yausuas lub zog “ua siab tawv qhawv tsis txhob ntshai” txog peb zaug nyob hauv 4 nqe Vajluskub no (nqe 6, 7, 9). Qhov uas yuav pab Yausuas ua tau “siab tawv qhawv” yog ua raws txhua yam tus Tswv qhia thiab nco ntsoov hais tias tus Tswv nrog nraim nws nyob. Yuav kom ua tau tej ntawd, Yausuas tus kheej thiab cov pejxeem yuav tsum kawm Vajtswv Txojlus txhua hnub hmo. Vajtswv xav kom Nws cov menyuam tsis yog tsuas mloog thiab nyeem Nws Txojlus xwb, tiamsis yuav tsum niaj hnub kawm Nws Txojlus, kom paub txog tus Tswv lub siab nyiam, thiaj yuav paub “ua raws li tej lus ntawd”. Qhov uas pab Yausuas ua tau “siab tawv qhawv” coj tus Tswv haivneeg mus txeeb Lub Tebchaws Coglus Tseg tsis yog muaj tubrog coob, thawj coj zoo, tiamsis yog qhov uas tus kheej thiab tus Tswv haivneeeg nqis peev los kawm Vajtswv Txojlus, yuav tsum “niaj hnub niaj hmo kawm thiab ua raws li tej lus ntawd” (nqe 8). Qhov no yog yam uas tus Tswv cov menyuam nyob rau txhua tiam yuav tsum nqis peev rau.
Ua ntej yuav nqis peev rau ib yam dabtsi, tibneeg pheej nrhiav nyeem tej ntawv qhia txog tej tswvyim pab kom ua tau tiav txhua yam thiab muaj txiag npluanuj. Cov ntseeg Tswv Yexus tabtom muaj Phau Vajluskub, yog phau ntawv sau txog tej tswvyim pab kom vammeej thiab ua tau tiav txhua yam (nqe 8b) tiamsis coob leej yeej tsis xav nthuav los nyeem. Yog zoo li ntawd, ces yog lawv tsuas xav nqis peev rau lub neej ib vuag tiam no xwb, tsis xav nqis peev rau lub neej ibtxhis.
Peb tabtom tuav rawv tus yaum sij ua rau peb vammeej, ntawd yog Phau Vajluskub. Vajtswv coglus rau Yausuas hais tias:“Kuv yuav nrog nraim koj txhua qhov uas koj mus”. Lo lus no kuj yog lus cogtseg pub rau tus Tswv cov menyuam niaj hnub nimno. Vaj Ntsujplig nrog nraim peb txhua lub sijhawm thiab Vajluskub yog tus taw kev rau peb lub neej. Yog li ntawd, tus Tswv cov menyuam txhua leej yuav tsum nqis peev rau kev nyeem, kawm, xav txog Vajtswv Txojlus txhua hnub hmo thiab xyuamxim ua raws li Vajtswv Txojlus qhia. Yog ua tau li ntawd, yuav tau vammeej tagnrho sab nqaij tawv thiab sab ntsujplig nyob rau lub neej tiam no thiab lub neej ibtxhis.
Thov Vajtswv,
Tus Tswv, thov pab nyuam yaus nco ntsoov Koj Txojlus qhia, kom nyuam yaus paub xub nqis peev rau kev kawm Koj Txojlus. Thov kom Koj Txojlus tsis txhob ncaim ntawm nyuam yaus lub qhov ncauj mus thiab nyuam yaus yuav kawm Txojlus ntawd txhua hnub hmo. Amees.
Peb tus kheej puas nqis peev rau kev kawm Vajtswv Txojlus txhua hnub hmo lawm tau?
Nyeem Vajluskub hauv peb lub xyoos: Yelemis 51:33-48
Kênh Youtube BHKTHN:
