Klei Aê Diê Blŭ: Y‑Yôsuê 1:6-9
Êlan kliăng: “Hdruôm hră klei bhiăn anei đăm bi đuĕ kbưi mơ̆ng ƀăng êgei ih ôh, brei ih ksiêm dlăng hruê mlam, snăn kơh ih dưi răng čiăng ngă tui hlue jih klei čih leh hlăm anăn. Snăn ih srăng čăt jing hlăm êlan ih, leh anăn ih srăng mâo klei dưi sĭt.” (Y‑Yôsuê 1:8)
Klei êmuh ksiêm mĭn: Ya klei Aê Diê mtă mtăn kơ Y‑Yôsuê êlâo kơ ñu atăt gai phung ƀuôn sang Aê Diê mŭt ti lăn čar Aê Diê Ƀuăn? Mâo ya klei ƀuăn yuôm bhăn mbĭt hŏng klei mtă mtăn anei? Si drei ksiêm dlăng Klei Aê Diê Blŭ hruê leh anăn mlam?
Čuê bruă khua kiă kriê Y‑Môis, Y‑Yôsuê srăng atăt gai phung buôn sang Israel mŭt plah mă dưn lăn čar Aê Diê Ƀuăn. Dôk ti anăp bruă klam prŏng prĭn anei, Y‑Yôsuê mâo lu klei rŭng huĭ, leh anăn Aê Diê thâo klă klei anăn. Kyuanăn Ñu mtă mtăn kơ Y‑Yôsuê lu mta klei yuôm bhăn êlâo kơ ñu ngă bruă jao prŏng prĭn anei. Sa hlăm lu mta klei mtô mtă êdah kdlưn hĭn leh anăn yuôm bhăn hĭn jing klei brei răng ngă tui hlue jih jang klei bhiăn Aê Diê (êlan 7-8).
Aê Diê bi mđĭ ai Y‑Yôsuê “brei ih jing ktang leh anăn mâo ai tiê jhŏng” truh kơ 3 blư̆ hlăm 4 êlan Klei Aê Diê Blŭ anei (êlan 6, 7, 9). Êlan kliăng čiăng kơ ñu dưi “jing ktang leh anăn mâo ai tiê jhŏng” jing ngă tui hlue jih jang klei Aê Diê mtô leh anăn thâo kơ Aê Diê dôk mbĭt hŏng ñu. Čiăng dưi mâo klei anăn, brei ñu pô leh anăn phung buôn sang ksiêm dlăng Klei Aê Diê Blŭ hruê leh anăn mlam. Aê Diê čiăng kơ phung anak ƀuôn sang Ñu amâo knŏng hmư̆ leh anăn răk dlăng Klei Aê Diê Blŭ ôh, ƀiădah brei ksiêm mĭn kơ klei bhiăn Aê Diê, hŏng klei anăn kơh dưi thâo săng klei Khua Yang čiăng, čiăng dưi “răng ngă tui hlue”. Êlan kliăng čiăng kơ Y‑Yôsuê dưi “jing ktang leh anăn mâo ai tiê jhŏng” atăt gai phung ƀuôn sang Aê Diê mŭt plah mă lăn čar Aê Diê Ƀuăn amâo djŏ phung kahan lu jhŏng ktang ôh ƀiădah hŏng klei duh kơ klei hriăm Klei Aê Diê Blŭ kơ ñu pô leh anăn kơ phung ƀuôn sang Aê Diê, brei “ksiêm dlăng hruê mlam, snăn kơh ih dưi răng čiăng ngă tui hlue jih klei čih leh hlăm anăn” (êlan 8). Anei ăt jing klei duh yuôm kơ jih jang phung anak ƀuôn sang Aê Diê găn hlăm jih jang ênuk.
Êlâo kơ duh kơ klei hdĭp hruê êdei anăp arăng khăng tui duah lu hdruôm hră mtô kơ êlan čiăng mâo klei čăt jing leh anăn đĭ kyar. Êjai anăn, phung đăo dôk mâo hdruôm hră Klei Aê Diê Blŭ, hdruôm hră mtô bi hriăm êlan klei čăt jing leh anăn mâo klei dưi sĭt (êlan 8b) ƀiădah lu mnuih tơl ka tuôm pŏk dlăng mơh. Kyuanăn, diñu knŏng uêñ mĭn duh kơ klei hdĭp ti anăp hlăm lăn ala anei ƀiădah amâo uêñ mĭn duh kơ klei hdĭp hlŏng lar ôh.
Drei dôk djă păn kliăng čiăng dưi mâo klei čăt jing, anăn jing Klei Aê Diê Blŭ yơh. Aê Diê ƀuăn hŏng Y‑Yôsuê Ñu srăng “dôk mbĭt hŏng ih ti anôk ih nao”. Klei ƀuăn anei ăt pioh brei kơ jih jang phung anak Aê Diê hruê anei mơh. Yang Mngăt Jăk êbat mbĭt hŏng drei nanao leh anăn Klei Aê Diê Blŭ jing giê ktrâo êlan kơ klei hdĭp drei. Kyuanăn, brei grăp čô phung anak Aê Diê duh kơ klei răk dlăng, hriăm, ksiêm mĭn Klei Aê Diê Blŭ hruê leh anăn mlam leh anăn răng čiăng ngă tui hlue, sĭt nik srăng mâo klei čăt jing hlăm klei hdĭp mngăt wăt hlăm kđeh asei mlei êjai ti lăn ala anei leh anăn kơ ênuk hlŏng lar.
Si ngă drei kpĭ mjuăt pô duh kơ klei ksiêm hriăm Klei Aê Diê Blŭ hruê leh anăn mlam mơ̆?
Wal lač: Ơ Khua Yang, akâo Ih đru kâo hdơr nanao kơ Klei Blŭ Khua Yang mtô mtă čiăng kơ kâo êlâo hĭn brei duh kơ klei hriăm Klei Ih Blŭ. Akâo kơ Klei Blŭ Ih amâo srăng kbưi mơ̆ng ƀăng êgei kâo ôh leh anăn kâo ƀuăn ksiêm dlăng Klei Blŭ anăn hruê leh anăn mlam.
Dlăng Klei Aê Diê Blŭ hlăm tlâo thŭn: Y‑Yêrêmi 51:33-48
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
