Klei Aê Diê Blŭ: Klei Bi Hriêng 11: 23-27
Êlan kliăng: “Hlăm jih klei anei kâo bi êdah leh kơ diih hŏng klei mă bruă srăng đru phung awăt, êjai hdơr klei Khua Yang Yêsu blŭ leh, lač, Brei kơ arăng jing jăk mơak hĭn kơ mă tŭ.” (Bruă Phung Khua Ƀĭng Kna 20:35)
Klei êmuh ksiêm mĭn: Si ngă Mtao Y-Salômôn bi hriăm anak hdĭp thâo mĭn hlăm bruă ngă klei jăk? Si ngă klei tŭ knhal tuč phung ngă klei jăk leh anăn phung ngă klei jhat mâo? Ya ngă phung đaŏ kơ Krist brei ngă klei jăk? Si ngă ai tiê leh anăn knuih brei mâo sĭt drei ngă klei jăk?
Ơ ƀĭng dôk hmư̆! Mtao Y-Salômôn bi hriăm anak jing mnuih thâo mĭn mơ̆ ng bruă bi hmô dua mta klei bi mklăk plah wah sa čô mnuih kpă ênô leh anăn mnuih măk ƀai. Mnuih kpă ênô čang hmăng ngă klei jăk. Boh blŭ “čang hmăng” bi êdah ai tiê êpa hmao ngă klei jăk, amâo mâo klei mgô̆ amâo dah gĭr ngă. Êa hlăm kbăng êa ƀrư̆ tuah ƀrư̆ doh, mnuih kpă ênô snăn mơh, “sa čô kmah srăng đĭ mdrŏng hĭn”. hlei pô đru arăng, arăng srăng đru ñu msĕ mơh (êlan 25). Klei tŭ knhal tuč jing phung ngă klei jăk dưi mâo “klei jăk jĭn” (êlan 26) leh anăn srăng mâo “klei pap” (êlan 27). Mklăk hŏng anăn, phung ƀai knŏng duah klei jhat, diñu gĭr čuôt klih čiăng mkăm pioh ngăn drăp, ƀiădah knhal tuč diñu lŏ kƀah hĭn (êlan 24). Bruă diñu ngă amâo djŏ knŏng mâo “phung ƀuôn sang tăm pah” đuč ôh, ƀiădah lŏ ngă kơ Aê Diê ngêñ leh anăn diñu tŭ klei ngêñ, klei tăm pah mơ̆ng Aê Diê. Anăn jing boh jhat kơ phung duah klei jhat.
Klei duê Việt Nam lač: “Kmah, snăn Aê Diê srăng brei lu ngăn drăp, čuôt klih Aê Diê srăng wĭt mă”. Phung đưm mâo klei thâo săng ngăn drăp jing kyua “Aê Diê” brei, tơdah amâo kah mbha, knŏng mkăm pioh hjăn snăn “Aê Diê” amâo srăng lŏ dơ̆ng brei ôh. Khua ƀĭng kna Y-Pôl mđĭ ai phung ƀuôn sang Aê Diê đru phung ruă duam, ƀun ƀin leh anăn lŏ hdơr wĭt Klei Khua Yang Yêsu lač:“Brei kơ arăng jing jăk mơak hĭn kơ mă tŭ.”
Phung đaŏ kơ Krist ngă klei jăk, đru kơ phung mkăn kyua dua mta phŭn yuôm bhăn: Tal sa, drei thâo săng ngăn drăp, prăk mah pô mâo jing Aê Diê brei. Sĭt mâo ngăn drăp, brei drei bi êdah ai tiê hdơr knga kơ Khua Yang. Tal dua, drei mâo leh “Klei pap” amâo dah “klei jăk” jing klei Aê Diê brei kơ phung amâo năng dưi tŭ ôh, anăn brei drei mâo bruă klam kah mbha kơ phung dleh dlan.
Sĭt bi hriăm kơ klei phat kđi knhal tuč hlăm hruê Khua Yang Yêsu lŏ hriê (YMathiơ 25: 31-46), Aê Diê mñă kơ drei sĭt đru phung tue, phung ƀin ƀin, ruă duam amâo dah phung mnă jing drei ngă kơ Aê Diê. Ñu klah čŭn: “Leh anăn phung anăn srăng nao mŭt hlăm klei bi kmhal hlŏng lar, ƀiădah phung kpă srăng nao kơ klei hdĭp hlŏng lar.” (Y-Mathiơ 25:46). Drei ngă klei jăk amâo djŏ ôh čiăng phung tŭ mă tla ai, ƀiădah drei ngă klei jăk kyua hdơr knga kơ Aê Diê leh anăn dŭm klei anăn bi mơak kơ Aê Diê.
Mâo mơ̆ ya klei drei čiăng bi mlih kơ bruă ngă klei jăk hlăm klei mĭn leh anăn bruă ngă?
Ơ Khua Yang, kâo bi mni lač jăk kơ Ih kyua klei jăk Khua Yang brei kơ kâo leh anăn gŏ sang. Akâo kơ Ih đru kâo thâo mĭn kơ klei ư̆ êpa, ƀun ƀin, dleh dlan leh anăn mbha kơ digơ̆. Akâo kơ Ih đru phung anak čô kâo ăt thâo hriăm klei thâo mĭn hlăm bruă ngă klei jăk.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 8:1-9:6
Kênh Youtube BHKTHN:
