2 Kevcai 16:9-12
Nqe cim:
“Tus Tswv yeej ua kom peb nco ntsoov Nws tej txujci tseemceeb mus li, Nws yog tus muaj lub siab zoo thiab hlub tshua sawvdaws” (Ntawv Nkauj 111:4).
Lus nug rau sawvdaws xav:
- Rooj Kevcai suav xya lub limtiam yog dab tsi?
- Vim li cas rooj kevcai ntawd ua rau Vajtswv haiv neeg zoo siab?
- Lub homphiaj rooj kevcai ntawd yog li cas?
- Peb yuav tsum ua dab tsi kom ruaj siab hauv kev ntseeg thiab kev hlub mus rau lub neej tom ntej?
Haiv neeg Yixalayees muaj peb rooj kevcai loj tseemceeb uas yuav tau ua txhua xyoo yog: Kevcai Hla Dhau, Kevcai Xya Lub Limtiam thiab Kevcai Nyob Tsev Pheebsuab. Kevcai Xya Lub Limtiam tseem hu ua kevcai Sau Qoobloo (Khiavdim 23:16), thiab nyob hauv tiam Vajluskub tshiab hu ua Kevcai Peetekos (Tes Haujlwm 2:1). Ntawd yog ib rooj kevcai nco txog Vajtswv tej koob hmoov uas Nws foom pub muaj npluamias thaum sau tau Qooloo ntau. Ntu Vajluskub no hais txog ob yam li no:
Tim ib, Rooj kevcai no yog kev zoo siab xyivfab ntawm Vajtswv haiv neeg (nqe 11). Thaum zoo siab txog tej yam uas Vajtswv muab pub yog lub sijhawm zoo rau sawvdaws tuaj sib koom qhia tshwm yus yog tus Tswv haiv neeg rau tej neeg ib ncig. Tas nrho yus tsev neeg koom siab ua kevcai, thiab caw tej neeg nyob ib ncig tuaj nrog koom, tsis hais yus tej tub mab tub qhe, tej neeg zej zog ib ncig, tej me nyuam ntsuag, tej pojntsuam, tej neeg rau lwm tus caij tsuj, tej neeg tuaj ua qhua thiab cov Levis uas ua Vajtswv haujlwm puv ntoob.
Tim ob, Lub homphiaj ntawm rooj kevcai yog ua kom nco ntsoov (nqe 12). Vajtswv haiv neeg yuav tau nco ntsoov hais tias lawv yog haiv neeg uas nyob hauv tus Tswv kev hlub, vim li ntawd; yuav tsum ncav tes mus hlub taus lwm tus los ntawm Vajtswv kev hlub. Vajtswv haiv neeg kuj yuav tsum paub xav txog lub neej yav tas los thiab nimno, thaum ua cev qhev thiab thaum tau los nyob ywjpheej, thaum txomnyem tsis muaj noj thiab thaum muaj noj npluamias. Thaum rov los xav txog tej no yuav ua rau peb muaj zeem paub meej txog Vajtswv yog tus uas ua ntau yam zoo kawg nkaus pub rau yus los lawm.
Thaum los xav txog yus lub neej ntu dhau los, peb yuav pom tus Tswv uas muaj kev hlub pab peb ua neej los txog thaum no. Dhau ntawd, peb yuav ua lub neej ntseeg mus rau yav tom ntej. Nco ntsoov tus Tswv txiajntsig tsis yog los ntawm paub tus Tswv tej txujci ua los lawm xwb, tiamsis tseem ua lub neej pehawm tus Tswv thiab ua lub neej phim tej uas Nws tau ua pab yus lawm los ntawm tej haujlwm qhia tshwm rau tej neeg ib ncig. Tu siab uas peb muaj ib txhia ntseeg pheej hnov qab, thaum ua kevcai nco txog ib yam xwm twg ntawm tus kheej, ntawm tsev neeg lossis ntawm pawg ntseeg, peb yuav tau nco ntsoov txog tus Tswv thiab ua vim tus Tswv uas hlub peb. Yav tas los pab tau peb pom Vajtswv tes haujlwm, tam sim no pab peb los ua Vajtswv tsaug thiab vim tej ntawd ua rau peb ruaj siab ua lub neej hauv kev ntseeg mus lawm yav tom ntej los ntawm tus Tswv kev hlub, “txawm peb tsis paub lub neej tom ntej yuav zoo li cas los xij”
Thov Vajtswv,
Tus Tswv, thov pab nyuam yaus nco ntsoov tej uas Koj ua pub nyuam yaus dhau los lawm. Thov pab kom nyuam yaus kam ua lub neej mloog Koj lus tuag nthi ua Koj tes haujlwm hauv Koj txoj kev. Amees.
Thaum tig saib lub neej dhau los, koj nco ntsoov txog tus Tswv txiajntsig yam dab tsi?
Nyeem Vajluskub hauv peb lub xyoo: Pajlug 21
Kênh Youtube BHKTHN:
