Klei Aê Diê Blŭ: Klei Mtô Mñă Klei Bhiăn 16:9-12
Êlan kliăng: “Ñu brei arăng hdơr kơ bruă yuôm bhăn ñu ngă leh; Yêhôwa jing jăk leh anăn thâo pap” (Klei Mmuñ Hđăp 111:4).
Klei êmuh ksiêm mĭn: Ya jing knăm Kjuh hruê kăm? Ya ngă knăm bi hdơr anei jing klei mơak kơ phung ƀuôn sang Aê Diê? Ya hdră kñăm kơ klei bi hdơr anei? Ya klei brei drei ngă čiăng kjăp ai tiê êbat hlăm êdei anăp kyua klei đăo leh anăn klei pap?
Phung Israel mâo tlâo knăm yuôm bhăn hlăm grăp thŭn jing Knăm Klei Găn, Knăm Kjuh Hruê Kăm leh anăn Knăm Sang Čhiăm, knăm tal dua lŏ pia jing Knăm Yan Puôt (Klei Kbiă 23:16), hlăm Klei Bi Mguôp Mrâo pia jing Knăm Pantơkôt (Bruă Phung Khua Ƀĭng Kna 2:1). Anei jing gưl čiăng bi hdơr klei Aê Diê mkăp brei êbeh dlai hlăm yan buh pla kyuadah phung ƀuôn sang Israel hdĭp mơ̆ng bruă lŏ hma. Trăn Klei Aê Diê Blŭ anei mñă kơ dua klei.
Tal sa, knăm bi hdơr jing klei mơak mơ̆ng jih phung ƀuôn sang Aê Diê (êlan 11). Gưl mơak bi hdơr klei Aê Diê mkăp brei êbeh dlai jing klei găl čiăng sa ai leh anăn lar bra ai tiê mơ̆ng phung ƀuôn sang Aê Diê hŏng phung ti êngao. Jih gŏ sang hơ̆k mơak nao hlăm knăm mơak, mbĭt anăn ăt pŏk mlar kơ lu phung mkăn hrăm mbĭt nao hgŭm mbĭt, mâo phung anak êkei leh anăn anak mniê, dĭng buăl êkei mniê, pô dôk jưh bhiâo, anak êrĭt, leh anăn mniê djiê ung leh anăn phung Lêwi dôk hlăm ƀuôn mă bruă jih hruê mông.
Tal dua, hdră kñăm mơ̆ng knăm bi hdơr jing čiăng bi hdơr (êlan 12). Brei phung ƀuôn sang hdơr diñu jing sa êpul bŏ hŏng klei pap, kyua anăn brei lŏ dơ̆ng pŏk mlar kngan drông phung mkăn kyua klei pap Aê Diê. Phung ƀuôn sang ăt brei hdơr wĭt kơ klei bi mklă hlăk đưm hŏng ară anei, plah wah jing hlŭn hŏng êngiê, plah wah klei dleh dlan ư̆ êpa hŏng klei hơ̆k mơak djăp ênŭm. Mơ̆ng klei bi msĕ anăn diñu srăng thâo ƀuh êlam Aê Diê jing Pô ngă leh jih ya klei prŏng prĭn hlăm djuê ana diñu leh anăn kơ diñu pô.
Ƀuh klei pô hdĭp kơ hruê mông leh êgao đru drei thâo Pô khăp leh kơ drei ba kơ drei klei hdĭp msĕ si ară anei. Mơ̆ng anăn, drei kjăp ai tiê lŏ dơ̆ng mđing kơ êdei anăp. Hdơr kơ klei pap Aê Diê brei amâo djŏ knŏng jing klei hdơr hlăm ai tiê ôh ƀiădah lŏ mâo knuih djŏ klă ba truh klei kkuh mpŭ leh anăn gưt asăp Pô ngă leh ya klei hlăm hdĭp pô leh anăn hlăm hƀuê ênuk djuê ana. Hlăk anăn bruă ngă klă klơ̆ng phung drei jing kah mbha klei mơak hŏng klei hơêč hmưi kơ phung riêng gah pô. Ƀiădah hơưi snăk, drei khăng wơr hĕ, kyua anăn mơ̆ng dŭm knăm bi hdơr mơ̆ng drei pô, gŏ sang, Sang Aê Diê đru kơ drei lŏ wĭt hdơr leh anăn dlăng kơ Aê Diê, Pô brei leh klei pap yuôm bhăn hlăm klei hdĭp pô. Hruê mông leh êgao đru drei ƀuh Aê Diê dôk mă bruă, ară anei đru drei bi mni kơ Pô yuôm bhăn ngă leh klei mdê hjăn kơ pô, leh anăn kyua anăn drei kjăp ai tiê êbat hlăm êdei anăp kyua klei đăo leh anăn klei pap “wăt tơdah drei amâo thâo ôh hruê mgi si srăng jing”.
Tơdah dlăng wĭt kơ hruê mông leh êgao, ya klei drei hdơr knga kơ Aê Diê lu hĭn?
Wah lač: Ơ Khua Yang, akâo kơ Ih đru kâo amâo wơr ôh ya klei Ih ngă leh, brei kâo thâo kơ klei Ih brei leh kâo ară anei leh anăn jhŏng hdĭp gưt asăp Pô atăt kâo êbat hlăm klei pap.
Dlăng Klei Aê Diê Blŭ hlăm tlâo thŭn: Klei Bi Hriêng 21:1‑31
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
