Henplais 11:7
Nqe cim:
“Twb yog vim Nau-es ntseeg, Nau-es thiaj mloog Vajtswv lus. Vajtswv qhia rau Nau-es txog tej xwm txheej uas yav tom ntej yuav muaj los uas Nau-es qhovmuag tsis pom. Nau-es thiaj txua ib lub nkoj, Nau-es thiab nws tsevneeg thiaj dim kev ploj kev tuag. Vajtswv ua li ntawd twb yog nws rau txim rau tej neeg uas tsis ntseeg. Vim Nau-es ntseeg, Vajtswv thiaj suav hais tias Nau-es yog tus uas ncajncees” (Henplais 11:7).
Lus nug rau sawvdaws xav:
– Nau-es kev ntseeg tau qhia tshwm li cas?
– Nau-es kev ntseeg muaj qabhau dabtsi?
– Koj kawm tau yam dabtsi dhau los ntawm Nau-es kev ntseeg?
Zaj xwm uas hais txog Nau-es txua nkoj tau sau tseg nyob hauv Chivkeeb tshooj 6 mus txog tshooj 8. Nau-es yog tus uas muaj kev sib raug zoo nrog Vajtswv thiab nws tau Vajtswv “qhia yam uas qhovmuag tsis pom”, qhov ntawd yog Vajtswv yuav tso dej los nyab lub ntiajteb ua kom tibneeg tuag tu noob vim lawv txojkev ua nruj ua tsiv nyob rau tiam ntawd (Chivkeeb 6:5). Thaum uas tus Tswv ceebtoom , Nau-es qhia tshwm nws kev ntseeg los ntawm kev “mloog tus Tswv lus thiab txua ib lub nkoj”, tes haujlwm no ua rau cov tibneeg tiam ntawd ntaus nqe tias nws vwm lossis ruam. Siv sijhawm ib puas xyoo los txuas ib lub nkoj nyob rau qhov chaw uas nyob saum roob deb hiav txwv, Nau-es yeej raug luag txob thuam kawg nkaus li. Txawm li ntawm los Nau-es yeej tsis quav ntsej thiab nws yeej qhia tshwm nws txojkev ntseeg uas yog mloog Vajtswv lus. Vajluskub tau qhia hais mus hais los txog Nau-es kev ntseeg thiab ua raws li tej uas Vajtswv tau qhia rau nws lawd (Chivkeeb 6:22, 7:5,9).
Nyob rau ncua sijhawm uas muaj kev phem kev qias puv nkaus, Nau-es ua nws lub neej ncaj ncees thiab mus raws li tus Tswv lub siab nyiam (Chivkeeb 6:9). Qhov kaj tau ci rau yam uas nyob rau hauv qhov tsaus li cas, Nau-es kev ua ncaj ncees los tawm tsam tej kev phem uas cov tibneeg nrog nws nyob uake ib yam li ntawd. Tej no yog lub vimchiv uas tus sau phau Henplais hais tias cov neeg kev ntseeg hnub thaud yuav “txiav txim rau lub ntiajteb”. Kuj yog los ntawm kev ntseeg Nau-es thiab nws tsev neeg thiaj tsis raug puas tsuaj li cov tibneeg uas nyob rau tiam ntawm raug. Vajtswv suav Nau-es yog tus “ncaj ncees” tsis raug txim thiab txais kev cawm dim nyob kaj siab lug hauv lub nkoj uas nws txhais tes txua.
Tiam uas peb nyob niaj hnub nimno kuj zoo ib yam li tiam uas Nau-es nyob hnub thaud. Qhov teebmeem tsis yog tibneeg tsis paub Vajtswv, tiamsis yog lawv lub siab tawv thiab tsis kam ua raws li Vajtswv Txojlus qhia. Nau-es lub nkoj loj heev thiaj ntim tagnrho txhua yam tsiaj uas tsimnyog tseg ib yam ib nkawg, tiamsis tsuas muaj 8 tus tibneeg uas nkag mus nyob hauv xwb thiab qhov uas mus rau hauv lub nkoj yog lawv ua raws li Vajtswv tej lus qhia ntawm kev pab cawm. Tus Tswv Yexus cov ntshav raug ntws saum tus ntoo Khaublig yog vim txhua tus tibneeg, tiamsis txais kev zam txim tsuas muaj pub rau tus uas lees tso kev txhaum tseg, los ntseeg Tswv Yexus thiab qhia tshwm kev ntseeg los ntawm lub neej mloog lus. Nyob hauv lub ntiajteb uas muaj kev txhaum tsaus ntuj nti, thov tus Tswv pub kom peb txhua tus qhia tshwm kev ntseeg los ntawm ua neej mloog tus Tswv lus kom peb lub neej ua timkhawv zoo rau cov uas tsis tau ntseeg, lawv thiaj los ntseeg.
Thov Vajtswv
Tus Tswv, Nyob hauv lub ntiajteb uas tibneeg nyiam ua raws li kev ntshaw, thov pab kom nyuam yaus paub xyaum raws li Nau-es kev ntseeg, mloog tus Tswv Koj lus kom kawg siab kawg ntsws, txawm yog nyuamyaus tsis totaub tas yam uas tus Tswv Koj qhia los xij. Thov Koj pab kom nyuam yaus txawj ua lub neej qhia tshwm txojkev cawmdim pub rau lwm tus. Nyuamyaus tuav Tswv Yexus Khetos lub npe thov, Amees.
Peb puas qhia tshwm kev ntseeg los ntawm peb ua neej txawv tibneeg ntiajteb?
Nyeem Vajluskub hauv peb lub xyoos: Chivkeeb 15
Kênh Youtube BHKTHN:
