Daniyees 7:9-28
Nqe cim
“Yog peb ua taus siab ntev, peb yuav tau nrog nws kav…”(II Timautes 2:12a).
Lus nug rau sawvdaws xav:
- Muaj yam dabtsi tshwjxeeb hais txog tus tsiaj yog hwjchim tswjkav ntawm tej vajntxwv hauv ntiajteb?
- Lawv ua licas rau tus Tswv thiab Nws cov neeg dawbhuv?
- “Tus uas muaj Hwjchim Loj kawg nkaus” yog leejtwg?
- Nws yuav ua dabtsi rau “Vajtswv haivneeg”?
- Zaj kawm hnub no muaj yam dabtsi txhawb peb lub zog?
Daniyees 2:4 txog rau 7:28 yog ntu Vajluskub tshwjxeeb sau ua lus Alas, yog yam lus thoob tshab nyob rau tiam ntawd, tej zaum yog tus cev lus Daniyees xav kom cov Yixalayees thiab lwm haivneeg paub txog cov Yixalayees tus Tswv yog Vajtswv tus uas loj, tswjkav lub keebkwm.
Muaj ntau yam zoo thooj li zaj yogtoog hauv tshooj 2, plaub tug tsiaj tawm hauv hiavtxwv tuaj thiab tus kub hauv zaj yogtoog tshooj 7 puavleej sau hais tias yog cov tsiaj uas nyaum, “peb lub taubhau, plaub txhais kotaw” thiab muaj hwjchim (nqe 7, 20). Cov tsiaj ntawd – piv rau tej vajntxwv thiab tej tebchaws loj– uas sawv los kav ntiajteb, lawv “hais lus twm Vajtswv tus uas muaj Hwjchim Loj kawg nkaus”, “tsimtxom Vajtswv haivneeg” thiab muaj lub tswvyim “sim hloov Vajtswv Txojlus thiab tej Kevcai” (nqe 25). Lawv ua saib tsis taus tus Tswv, tsimtxom tus Tswv haivneeg thiab tsim tej kevcai tshiab. Thiab ntau zaug lawv muaj yeej (nqe 21) ua rau peb qaug zog. Keebkwm tibneeg ua tabpov txog ntau zaug cov ntseeg Tswv Yexus raug yeebncuab tsimtxom hnyav kawg nkaus. Muaj coob leej kuj raug tuag vim lawv txojkev ntseeg.
Tiamsis, Daniyees tshooj 7 sau txog cov tsiaj txojkev muaj yeej nrog rau lo lus “txog lub sijhawm” lossis “mus txog thaum” (nqe 11, 22, 25). Tej tebchaws loj ntawd tsuas tau ua phem “ib nyuag ntu” (nqe 12), “peb xyoos thiab rau lub hlis” (nqe 25). Thaum txog sijhawm, lawv yuav raug “tua tuag”, raug “txo hwjchim” (nqe 11-12). Lawv txojkev khav theeb saib tsis taus Vajtswv thiab lawv kev tsimtxom tus Tswv haivneeg yuav tsis ntev vim Vajtswv yuav “txiav txim” rau lawv (nqe 10, 22, 26). “Tiamsis Vajtswv tus uas muaj Hwjchim Loj kawg nkaus haivneeg yuav tau nws lub hwjchim thiab yuav kav lub tebchaws ntawd mus ibtxhis” (nqe 18, 22). “Luag yuav muab lub ntiajteb tej tebchaws uas muaj vajntxwv kav, tej hwjchim thiab tej kev vammeej cob rau tus Vajtswv uas muaj Hwjchim Loj kawg nkaus haivneeg tuav” (nqe 27). “Tus uas muaj Hwjchim Loj kawg nkaus” yog tus Cawmseej, lub tebchaws thiab lub hwjchim tswjkav tsuas muab pub rau Nws tibleeg thiab Nws muab pub rau cov neeg dawbhuv yog cov uas ncajncees tuav ruaj kev ntseeg mus txog hnub kawg tau nrog nws kav (II Timautes 2:12).
Ntau zaug peb qaug zog thaum pom cov neeg saib tsis taus Vajtswv, tsimtxom cov ntseeg thiab hloov txoj kevcai. Tus cev lus Daniyees zaj yogtoog hnub no txhawb tau peb lub zog ntau kawg li vim keebkwm nyob hauv tus Tswv txhais tes. Txawm lubneej yuav ntsib dabtsi los peb yuav tsum ruaj siab nrog nraim tus Tswv mus tsis txhob thim rov.
Peb puas xam pom Vajtswv niaj txhis tswjkav keebkwm tibneeg?
Thov Vajtswv
Tus Tswv, qee zaug nyuam yaus qaug zog thaum pom cov neeg phem muaj yeej thiab tsimtxom Koj cov menyuam. Thov pab nyuam yaus ntseeg khov kho hais tias cov neeg phem kev muaj yeej tsuas yog ib nyuag ntus xwb kom nyuam yaus ua taus siab ntev tos hnub nyuam yaus tau nrog Koj kav mus ibtxhis. Amees.
Nyeem Vajluskub peb lub xyoos: Ntawv Nkauj 17:1-18:15
Tshooj Youtube BHKTHN: https://www.youtube.com/c/bhkthn
