Klei Aê Diê Blŭ: Y‑Đaniel 7:9-28
Êlan kliăng: “Tơdah drei gĭr, drei srăng kiă kriê mbĭt hŏng Ñu msĕ mơh;…” (II Y‑Timôthê 2:12a).
Klei êmuh ksiêm mĭn: Ya klei bi knăl phung hlô dliê prŏng jing klei kiă kriê mơ̆ng phung mtao lăn ala? Ya klei diñu ngă kơ Khua Yang leh anăn kơ phung doh jăk Ñu? Hlei jing “Pô Ti Dlông Hĭn”? Ya klei Ñu srăng ngă kơ “phung doh jăk” Ñu? Ya klei bi mđĭ ai drei mơ̆ng klei hriăm hruê anei?
Y‑Đaniel 2:4 truh kơ 7:28 jing kdrêč Klei Aê Diê Blŭ mdê hĭn čih hŏng klei blŭ phung Aram, klei blŭ lăn ala ênuk anăn yua, năng ai kyua khua pô hưn êlâo Y‑Đaniel čiăng, amâo djŏ knŏng kơ phung ƀuôn sang Israel ôh thâo, ƀiădah čiăng wăt kơ jih jang čar amâo mâo đăo ăt thâo kral Aê Diê Israel jing Aê Diê prŏng hĭn, kiă kriê kluôm jih hƀuê ênuk.
Mâo lu mta klei msĕ hŏng klei bi êdah hlăm kdrêč 2, pă drei hlô dliê prŏng kbiă mơ̆ng êa ksĭ leh anăn sa ᵬĕ ki hlăm klei bi êdah hlăm kdrêč 7 ăt mdah klei jhŏng, ktang, hŏng klei huĭ mduĭ mơh, “tlâo boh kŏ pă ƀĕ jơ̆ng” leh anăn jhŏng ktang (êlan 7,20). Phung hlô dliê anăn – bi ala kơ phung mtao leh anăn ala čar jhŏng ktang kiă kriê lăn ala – kgŭ kdơ̆ng, “blŭ klei bi kdơ̆ng hŏng Pô Ti Dlông Hĭn”, “dưi hŏng phung doh jăk” wăt mâo klei mĭn “bi mlih ênuk bi kčah leh anăn klei bhiăn” (êlan 25). Diñu ktưn ngă klei gao klei bhiăn hŏng Aê Diê, ngă jhat ktư̆ juă phung anak Aê Diê leh anăn mkra mdưm sa hnơ̆ng čuăn, klei bhiăn mrâo. Leh anăn lu blư̆ diñu mâo klei dưi hlăm klei ktưn ngă anăn (êlan 21) ngă kơ drei đa blư̆ mâo klei êdu ai. Hƀuê ênuk lăn ala ƀuh klă ti anăp lu blư̆ phung anak ƀuôn sang Aê Diê tŭ klei arăng ngă jhat ktang tĭt hŏng kngan phung roh hŏng phung đăo kơ Krist. Lu mnuih arăng bi mdjiê kyua klei đăo.
Ƀiădah lĕ, Y‑Đaniel kdrêč 7 hưn mdah klei diñu tŭ jing mbĭt hŏng pruê̆ blŭ “tơl truh kơ ênuk bi kčah” (êlan 11, 22, 25). Jih jang ƀuôn ala mtao anăn knŏng ngă klei jhŏng ktang diñu “sa yan leh anăn sa ênuk bi kčah” (êlan 12), “sa yan, dua yan leh anăn sa mkrah yan” (êlan 25). Djŏ mmông bi kčah, “arăng srăng bi mdjiê, bi rai” diñu (êlan 11‑12). Klei mgao leh anăn klei diñu ngă jhat amâo dôk nanao ôh kyuadah klei Aê Diê “phat kđi” (êlan 10, 22, 26) srăng dơ̆ng ngă. “Ƀiădah phung doh jăk Pô Ti Dlông Hĭn srăng mă tŭ ƀuôn ala mtao leh anăn srăng mâo ƀuôn ala mtao nanao hlŏng lar hlăm jih jang ênuk” (êlan 18, 22). “Leh anăn arăng srăng jao ƀuôn ala mtao, klei dưi kiă kriê, leh anăn klei prŏng jih jang ƀuôn ala mtao ti gŭ jih adiê kơ phung doh jăk” (êlan 27). “Pô ti Dlông Hĭn” jing Yang Krist, Ƀuôn ala mtao leh anăn klei dưi kiă kriê pioh hjăn kơ Yang Krist leh anăn Ñu brei kơ phung doh jăk Ñu jing phung dôk sĭt suôr srăng dưi kiă kriê mbĭt hŏng Khua Yang (II Timôthê 2:12).
Lu blư̆ drei êdu ai tơdah ƀuh phung bi kdơ̆ng hŏng Aê Diê, ngă jhat kơ phung anak ƀuôn sang Aê Diê leh anăn bi mlih wăt klei bhiăn kpă ênô. Klei bi êdah kơ khua pô hưn êlâo Y‑Đaniel hruê anei ba kơ drei klei bi mđĭ ai prŏng kyua jih hƀuê ênuk dôk hlăm kngan Aê Diê. Brei drei dôk kjăp sĭt suôr čhuang êbat hŏng Khua Yang wăt tơdah ya klei truh dưn.
Si ngă drei ƀuh mơ̆ klei Aê Diê kiă kriê nanao kluôm jih hƀuê ênuk jih lăn ala?
Wah lač: Ơ Khua Yang, tăp năng mngăt kâo luč liê tơdah ƀuh phung jhat ƀai mâo klei dưi hĭn leh anăn ngă jhat kơ phung anak ƀuôn sang Aê Diê. Akâo kơ Khua Yang brei kâo thâo klă klei phung jhat ƀai mâo klei dưi hĭn knŏng jing bhiâo êjai, čiăng kơ kâo đăo kjăp dôk sĭt suôr dôk guôn hruê kâo dưi kiă kriê mbĭt hŏng Khua Yang nanao hlŏng lar.
Dlăng Klei Aê Diê Blŭ hlăm tlâo thŭn: Klei Mmuñ Hđăp 17:1-15; 18:1-15
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
