Klei Aê Diê Blŭ: II Klei Yăl Dliê 26:15-16
Êlan kliăng: “Klei mgao nao êlâo kơ klei rai luč, leh anăn klei krưh nao êlâo kơ klei lĕ” (Klei Bi Hriêng 16:18).
Klei êmuh ksiêm mĭn: Tơdah jing ktang leh, si ai tiê Mtao Y‑Usia bi mlih? Klei mgao atăt mtao ngă ya bruă soh? Ya drei srăng ngă čiăng tlaih mơ̆ng klei soh mgao?
Tơdah jing ktang leh, Mtao Y‑Usia dơ̆ng mgao, tơl ñu ngă klei ƀai, ngă soh ti anăp Yêhôwa tơdah mŭt hlăm Sang kkuh mpŭ kơ Yêhôwa čiăng čuh mnơ̆ng ƀâo mngưi ti knưl mnơ̆ng ƀâo mngưi. Knŏng phung Lêwi leh anăn phung khua ngă yang yơh dưi mŭt mă bruă hlăm Sang kkuh mpŭ, leh anăn knŏng phung khua ngă yang phung anak êkei Y‑Arôn yơh dưi čuh mnơ̆ng ƀâo mngưi ti knưl mnơ̆ng ƀâo mngưi (Klei Kbiă 30:1-10; Klei Yap 16:39-40). Mtao Y‑Usia ngă soh hŏng klei Aê Diê mtă, bi čhŏ klei doh jăk Sang kkuh mpŭ. Anei jing knuih čŏng čiăng bi kdơ̆ng hŏng Aê Diê leh anăn dlăng hơăi mang kơ klei Aê Diê mtă.
Jing msĕ si ama ñu mơh (II Klei Yăl Dliê 25:19), kyua klei mgao snăn Mtao Y‑Usia ngă soh hŏng Yêhôwa Aê Diê. Amâo hrăp ai ôh hŏng klei dưi sa čô mtao, ară anei ñu čiăng mâo thiăm klei dưi kơ sa čô khua ngă yang prŏng, jing klei Aê Diê amâo brei kơ ñu ôh. Kyua klei mgao, Mtao Y‑Usia čiăng mâo klei dưi hlăm bruă kđi čar wăt klei dưi klei hdĭp mngăt. Ñu yap ñu pô mâo klei dưi prŏng hĭn kơ phung khua ngă yang leh anăn dlông hĭn kơ klei bhiăn Aê Diê. Tơdah jing mgao, arăng ngă klei amâo uêñ ôh, dlăng kơ klei bhiăn jing hơăi mang leh anăn mâo bruă ngă hŏng klei mluk. Ñu wơr bĭt hĕ jih jang klei dưi ñu mâo kbiă hriê mơ̆ng klei Aê Diê “đru” sơăi (II Klei Yăl Dliê 26:7), leh anăn jih jang bruă mkăn ñu dưi ngă jing ăt mâo mơ̆ng klei “Khua Yang đru ñu yuôm bhăn” mơh (êlan 15). Tơdah lač kơ klei čăt jing Mtao Y‑Usia, hdruôm hră Klei Yăl Dliê mñă wĭt mñă nao kơ pruê̆ blŭ jih jang mnơ̆ng ñu mâo kbiă mơ̆ng klei Khua Yang “đru” sơăi, čiăng mñă kơ ñu thâo amâo mâo sa mta mnơ̆ng năng bi mđĭ ñu pô jing mgao ôh. Ƀiădah lĕ, ñu jing mgao êgao hnơ̆ng.
Tơdah mâo klei čăt đĭ, mâo djăp mta mnơ̆ng, drei khăng lĕ hlăm klei mplư wơr bĭt hĕ jih jang mnơ̆ng drei mâo jing dŏ Khua Yang brei sơăi. Mphŭn dô, Aê Diê yua ƀăng êgei Y‑Môis čiăng mtă brei phung Israel răng snei, “tơdah diih ƀơ̆ng huă leh anăn trei, mdơ̆ng leh lu boh sang jăk leh anăn dôk hlăm digơ̆ … hlăk anăn ai tiê diih srăng mgao, leh anăn diih wơr bĭt hĕ Yêhôwa Aê Diê diih, Pô atăt diih kbiă mơ̆ng čar Êjip… Đăm diih lač hlăm ai tiê diih, ‘Klei myang drei leh anăn klei ktang kngan drei bi mâo leh klei mdrŏng anei.’ Brei diih hdơr kơ Yêhôwa Aê Diê diih, kyuadah Ñu yơh Pô brei klei dưi mâo klei mdrŏng” (Klei Mtô Mñă Klei Bhiăn 8:12-18). Răng bĕ, đăm brei ai tiê jing mgao ôh, leh anăn hdơr kơ klei jăk Aê Diê jing klei Ñu mñă nanao kơ phung ƀuôn sang Ñu mơ̆ng ênuk đưm hlŏng kơ ară anei. Lăn ala mčhur brei drei bi mni kơ drei pô nanao, ƀiădah brei drei hdĭp mdê hŏng lăn ala. Brei drei thâo klei mgao leh anăn klei amâo thâo hdơr knga jing klei mplư jêñ jêñ hlăm klei hdĭp drei čiăng kơ drei knang kơ Khua Yang leh anăn weh đuĕ.
Si ngă drei dôk bi mni kơ drei pô kyua dưi ngă sa mta bruă prŏng mơ̆?
Wah lač: Ơ Khua Yang, đru kâo čiăng kâo thâo kơ kâo pô jing mnuih amâo tŭ ôh leh anăn jih jang mnơ̆ng kâo mâo jing dŏ Ih brei sơăi čiăng kâo amâo ngă mgao leh anăn ngă soh hŏng Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y‑Yôhan 14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
