II Xwmtxheej Vajntxwv 26:15-16
Nqe cim:
“Kev khavtheeb coj mus raug kev puastsuaj, thiab kev muab hlob yuav poob ntsejmuag.” (Pajlug 16:18)
Lus nug rau sawvdaws xav:
– Thaum vammeej, Uxiyas lub siab hloov zoo li cas?
– Lub siab khavtheeb coj vajntxwv mus ua qhov yuamkev dabtsi?
– Peb cheemtsum ua dabtsi kom qaij dhau txojkev khavtheeb?
Tom qab uas lub tebchaws vammeej lawm, Vajntxwv Uxiyas xeeb lub siab khavtheeb, mus txog qhov uas vajntxwv ua txhaum tawmtsam tus Tswv thaum nws mus hauv tus Tswv lub tuamtsev hlawv hmoov tshuaj tsw qab rau saum lub thaj. Tsuas yog cov neeg Levis thiab cov povthawj thiaj tau cai mus ua haujlwm hauv lub Tuamtsev xwb (Khiav dim 30:1-10; Teev Npe 16:39-40). Vajntxwv Uxiyas ua txhaum Vajtswv tej lus samhwm, ua qias txoj cai dawbhuv hauv lub Tuamtsev. Nov yog tus cwjpwm tawmtsam tus Tswv thiab saib Nws tej lus samhwm tsis muaj nqis.
Zoo ib yam li vajntxwv txiv (II Xwmtxheej Vajntxwv 25:19), lub siab khavtheeb thiaj ua rau Vajntxwv “ua txhaum rau tus Tswv uas yog nws tus Vajtswv”. Tsis txaus siab rau lub meejmom ua vajntxwv, vajntxwv tseem xav txeeb lub meejmom povthawj ua nws tug, nws cia li ua yam uas Vajtswv tsis pub cai rau nws ua. Vim kev khavtheeb, Vajntxwv Uxiyas xav kom tau lub meejmom tswj tebchaws thiab sab ntsujplig huvsi. Vajntxwv xwbtim saib nws muaj hwjchim loj dua cov povthawj thiab loj dua tus Tswv txoj kevcai. Thaum khavtheeb lawm, neeg yuav ua txhua yam kom tau, saib txoj cai tsis muaj nqis thiab ua tej haujlwm ruam ntsuav. Vajntxwv tsis nco lawm hais tias qhov uas nws muaj yeej yog muaj tus Tswv “pab” (II Xwmtxheej Vajntxwv 26:7), thiab qhov uas nws ua tau ntau yam twb yog muaj Vajtswv ua tus “pab” (nqe 15). Thaum hais txog tej uas Uxiyas ua tau, phau Xwmtxheej Vajntxwv hais mus hais los tej uas nws ua tau yog Vajtswv “pab” kom vajntxwv nco ntsoov tsis txhob ua neeg khavtheeb. Tiamsis vajntxwv txawm cia li ua neeg khavtheeb lawm.
Thaum ua tau, muaj txhua yam, peb pheej raug tej kev sim siab ua rau peb tsis nco qab tej uas tus Tswv pub rau yus. Hnub thaud, tus Tswv kuj siv Mauxes tej lus los ceebtoom cov Yixlayees “thaum nej muaj noj muaj haus txaus, thiab ua tau vaj tau tse rau nej nyob,… nej yuavtsum tsis txhob khavtheeb thiab tso tus Tswv uas yog nej tus Vajtswv uas coj nej tawm nram tebchaws Iziv qhov chaw uas nej ua luag qhev los tseg… Nej tsis txhob xav hais tias, yog nej lub dag lub zog thiab nej lub tswvyim khwv nej thiaj muaj txiag npluanuj. Nej yuav tsum nco ntsoov hais tias, tus Tswv uas yog nej tus Vajtswv, yog tus pub rau nej npluanuj...” (II Kevcai 8:12-18). Yuav tsum ua tib zoo saib nyob tsam muaj lub siab khavtheeb, thiab yuav tsum nco ntsoov tus Tswv koob hmoov, yog qhov uas qhia rau Nws cov menyuam, hnub thaud thiab peb cov tamsim no. Lub ntiajteb niaj hnub qhia kom txaus siab rau yus tus kheej tiamsis peb yuav tsum ua neej txawv li neeg ntiajteb. Yuav tsum paub hais tias txojkev khavtheeb thiab tsis nco txiajntsig yog tej kev sim siab hauv kev ua neej, thov Vajtswv pab kom peb qaij dhau.
Thov Vajtswv,
Vajtswv, thov Koj pub kom nyuam yaus zeem paub hais tias nyuam yaus tsis muaj dabtsi, txhua yam uas nyuam yaus muaj yog tus Tswv Koj pub, nyuam yaus thiaj tsis ua neeg khavtheeb thiab ua txhaum rau Koj. Nyuam yaus tuav Tswv Yexus lub npe thov, Amees.
Peb puas tabtom txaus siab thaum yus ua tau ib yam haujlwm loj?
Nyeem Vajluskub hauv peb lub xyoo: Yauhas 14
Kênh Youtube BHKTHN:
