Klei Aê Diê Blŭ: Y-Yakơ 1:13-15
Êlan kliăng: “Ƀiădah grăp čô mnuih mâo klei mplư tơdah klei ñu pô tluh hrip leh anăn mdluh ñu.” (Y-Yakơ 1:14)
Klei êmuh ksiêm mĭn: Si klei mdê klei lông dlăng hŏng klei mplư? Hlei pô tŭ đua klam kơ klei mplư? Ya boh jhat tơdah hlue si klei mplư, leh anăn si ngă čiăng dưi hŏng klei mplư?
Klei Bi Mguôp Mrâo yua sa boh hră peirasmos lač kơ “klei lông dlăng” leh anăn “klei mplư”. Jih dua klei anei ngă kơ drei amâo jăk sơăi, ƀiădah klei mdê klă mngač jing hlăm mta kñăm leh anăn boh tŭ. Hlăk êjai klei lông dlăng mjuăt đru kơ klei đăo hriê kơ prŏng hĭn snăn klei mplư ktŭng drei lĕ hlăm klei soh, mơ̆ng anăn kbưi hŏng Khua Yang. Kyua anăn Khua yang brei klei lông dlăng mâo hlăm klei hdĭp phung đăo, bi klei mplư snăn amâo djŏ hriê mơ̆ng Ñu ôh.
Y-Yakơ lač leh lu kơ klei dleh dlan phung đăo srăng tuôm leh anăn mblang anăn jing klei jăk mơak, jing klei găl čiăng hriê kơ prŏng, čiăng dưm ai tiê klei mĭn hlăm klei hdĭp lă lar. Khădah snăn, klă mngač amâo djŏ grăp čô bi mĭn snăn sơăi ôh. Ênưih snăk tơdah tŭ klei dleh dlan, boh nik tơdah lĕ hlăm klei soh, arăng srăng đing Aê Diê leh anăn truh kơ klei klah čŭn “ Kyua Khua Yang brei klei anăn truh, anăn jing Aê Diê mplư kâo”. Kyua anăn Y-Yakơ čiăng kơ phung ksiêm dlăng hră ñu thâo săng klă amâo mâo ôh klei anăn: “…klei jhat amâo dưi mplư Aê Diê ôh, leh anăn Aê Diê pô amâo tuôm mplư arăng ôh” (êlan 13). Aê Diê jing Pô doh jăk, hlăk êjai knuih anak mnuih jing klei soh. Klei mplư truh tơdah grăp čô mnuih “tluh hrip leh anăn mdluh ñu”, lŏ lač jing klei mplư mâo mơ̆ng klei čiăng hlăm ai tiê grăp čô drei (Y-Yêrêmi 17:9; Y-Mathiơ 15:18-19). Brei drei đua klam tơdah drei bi mklă hlue si klei mplư.
Klei mplư mphŭn mơ̆ng sa klei čiăng amâo jăk mplư luar, leh anăn ai tiê mphŭn mâo klei soh jhat leh anăn truh wưng, bi êdah hŏng bruă ngă amâo gưt asăp, jing klei soh, knhal tuč truh kơ klei djiê (êlan 15). “Djiê” tinei jing boh klei hlăm mngăt bi ktlah hŏng Aê Diê, Pô doh jăk leh anăn amâo tŭ ư klei soh. Kyua anăn, jing phung ƀuôn sang Aê Diê, brei drei gĭr đuĕ kbưi hŏng klei soh čiăng đăm ngă soh.
Thâo kral klei soh kbiă mơ̆ng lam ai tiê anăn grăp čô drei brei thâo răng mgang ai tiê pô hŏng Klei Aê Diê Blŭ leh anăn mguôp pô hlăm klei bi mguôp sĭt suôr hŏng Ñu. Brei knang nanao kơ Khua Yang đăm ôh mgao leh anăn lač pô srăng amâo dihnei (I Kôrantô 10:12). Sa hlăm dŭm hdră jăk hĭn čiăng dưi hŏng klei mplư jing brei êran đuĕ mơ̆ng klei mplư msĕ si klei bi hmô mơ̆ng êkei êdam Y-Yôsep. Mbĭt anăn, đăm huĭ ôh tui duah klei đru kyua drei amâo guôn bi kdơ̆ng hjăn păn ôh. Khua Yang dưm drei ti krah Sang Aê Diê čiăng kơ drei dưi mgang, đru, leh anăn mguôp sa ai bi kdơ̆ng hŏng klei mplư.
Diih ƀuăn srăng ñĕ kbưi hŏng klei jak iêô jăk siam mơ̆ng klei mplư mơ̆?
Wah lač: Ơ Khua Yang, dŭm klei mplư kâo dôk tlă anăp dleh snăk čiăng kơ kâo dưi bi kdơ̆ng hŏng ai pô. Akâo kơ Khua Yang bi bŏ ai tiê kâo hŏng klei doh jăk leh anăn Klei Blŭ hdĭp Ih čiăng kâo dưi hĭn hŏng klei mplư, hdĭp bi mơak leh anăn bi guh kơang Anăn Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Phung Khua Phat Kđi 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
