Klei Aê Diê Blŭ: I Kôrantô 14:16-19
Êlan kliăng: “6Snăn, ơ phung ayŏng adei, tơdah kâo truh kơ diih, kâo blŭ klei blŭ amâo mâo pô thâo, si kâo srăng đru diih tơdah kâo amâo blŭ kơ diih hŏng klei bi êdah, hŏng klei thâo săng, hŏng klei hưn êlâo, amâodah hŏng klei mtô?” (I Kôrantô 14:6).
Klei êmuh ksiêm mĭn: Ya rup Khua ƀĭng kna Y-Pôl yua bi hmô kơ ênai hmư̆ čiăng brei drei ƀuh klei yuôm bhăn mơ̆ng mnuih blŭ? Si ngă klei ñu mtô kơ klei hmư̆ amâo dah klei wah lač ti krah sang Aê Diê ba klei boh tŭ dưn kơ mnuih hmư̆? Ya klei drei srăng yua tơdah hiu mtô amâo dah wah lač ti krah Sang Aê Diê?
Čiăng lŏ dơ̆ng brei ƀuh phung hưn êlâo hlăm Sang Aê Diê mâo klei năng mpŭ hĭn kơ mnuih blŭ klei blŭ klei tuê ƀiădah amâo mâo mnuih thâo săng, Khua ƀĭng kna Y-Pôl mă 3 rup bi hmô. Ênai mơ̆ng đĭng buôt amâo dah brô̆ mñê hŏng ênai mtŭk mtul mâo djŏ ênai hmư̆ jăk ôh. Ênai ky hlăm klei bi blah tơdah ayŭ amâo djŏ snăn êpul kahan amâo thâo srăng ksŭng phă anăp amâo dah srăng kdŭn tluôn. Klei blŭ mơ̆ng ƀăng êgei mnuih tơdah blŭ amâo klă snăn amâo mâo mnuih thâo săng ôh (êlan 7-11). Kyua anăn sa čô nao hlăm sang Aê Diê ƀiădah “blŭ klei blŭ amâo mâo pô thâo, si kâo srăng đru diih tơdah kâo amâo blŭ kơ diih hŏng klei bi êdah, hŏng klei thâo săng, hŏng klei hưn êlâo, amâodah hŏng klei mtô?” (êlan 6). Kyuanăn Khua ƀĭng kna Y-Pôl mñă kơ dŭm čô hur har čiăng mâo klei brei mơ̆ng Yang Mngăt Jăk thâo blŭ klei tue snei: “Msĕ snăn mơh hŏng diih; kyuadah diih hur har čiăng mâo klei brei mơ̆ng Yang Mngăt Jăk, duah bĕ klei dưi đru Phung Sang Aê Diê hriê kơ prŏng.” (êlan 12).
Phung đăo Kôrantô hur har čiăng mâo klei brei mơ̆ng Yang Mngăt Jăk, anăn jing klei djŏ leh anăn jăk. Khădah Khua ƀĭng kna Y-Pôl mñă kơ dŭm klei kñăm mơ̆ng klei brei mơ̆ng Yang Mngăt Jăk jing čiăng rŭ mdơ̆ng Sang Aê Diê. Ñu lŏ mblang tơdah sa čô wah lač hŏng klei tue ƀiădah amâo mâo klei mblang klă snăn mnuih hmư̆ “amâo mâo klei mđĭ ai ôh” (êlan 17b). Leh anăn ñu lŏ lač klei thâo ñu pô, ñu jing sa čô mâo klei brei thâo blŭ klei tue hlăm sang Aê Diê, ƀiădah êjai nao hlăm Sang Aê Diê, dưi ƀiă ñu mtô dua tlâo boh čiăng kơ phung sang Aê Diê thâo săng leh anăn hdĭp tui hluê Klei Aê Diê Blŭ hĭn bruă blŭ klei tue ƀiădah amâo mâo sa čô thâo săng kơ klei anăn.
Mâo lu mnuih blŭ yơh sĭt čiăng blŭ, amâo bi mĭn ôh kơ mnuih hmư̆. Ƀiădah dŭm klei mtô mơ̆ng Khua ƀĭng kna Y-Pôl hruê anei mñă kơ drei, djăp mta klei blŭ hlăm Sang Aê Diê mâo klei hmaĭ jăk amâo dah jhat truh kơ mnuih hmư̆. Aê Diê brei leh drei dôk mbĭt hlăm Sang Aê Diê čiăng ba klei mđĭ ai, bi đru, mkŏ mjing hdơ̆ng pô. Kyua anăn brei thâo răng klei răng sĭt blŭ ti krah sang Aê Diê, wăt tơdah klei mtô hlăm klei hriăm grăp aguah hruê kjuh, klei wah lač amâo dah klei blŭ hrăm hdơ̆ng pô snăn brei thâo klei kñăm čiăng bi đru thâo kơ Aê Diê lu hĭn, thâo săng Klei Aê Diê Blŭ, mđĭ ai hdơ̆ng pô hdĭp tui hlue Klei Aê Diê Blŭ lu hĭn.
Brei drei thâo răng mơ̆ êjai mtô amâo dah wah lač ti krah Sang Aê Diê?
Ơ Yang Mngăt Jăk Aê Diê! Akâo kơ ih đru kơ kâo hur har duah klei Yang Mngăt Jăk brei, ƀiădah amâo djŏ kyua kâo pô ôh, ƀiădah čiăng kơ lu mnuih mâo klei dưi rŭ mdơ̆ng, boh nik mơ̆ng klei kâo blŭ.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Yap 15:22-41
Kênh Youtube BHKTHN:
