II Hơ’mon 31:11-19
Năr ‘nâu lu bơ̆n gô tơchĕng pơwao ‘bai pơhrăm kơ̆l ‘bai: Minh Tơdrong Tơpăt kiơ̆ kơ sơ̆p hla bơar II Hơ’mon 31: 11-19.
11 Hesekia athei đe hơmet lu anih mong tơ Hnam Kră Yang; na lu đe hơmet lu hnam noh. 12 Đei jơhngơ̆m tơpăt ba pơyơ̆r lu tơmam noh, gah tơmam minh lăm mơjĭt păng tơmam rơgoh tah tơmơ̆t. Kônania bơngai wei-lăng tơm hnam anih tah tơmam noh; oh sư Simei pơm kơiĕng sư, bre sư bơngai Lêwi. 13 Pơtao Hesekia păng Asaria, ‘bok soi wei-lăng tơm lăm Hnam Kră Yang jao ăn kơ đe Jêhiêl, Asaria, Nahat, Asahel, Jêrimôt, Jôsabat, Êliel, Ismakia, Mahat păng Bênaia lu sư kư̆m bơngai tơgŭm wei-lăng đơ̆ng rŏng kơ Kônania păng Simei oh sư, 14 Kôrê kon drŏ-nglo Imna, bơngai Lêwi bơngai wei ‘Măng Jang Hơlĕch, sư yŏng wei-lăng tơmam đe pơyơ̆r kơ Kră Yang ‘Bok Kei-Dei hăm jơhngơ̆m hiôk păng lu tơmam ‘lơ̆ng rơgoh. 15 Đơ̆ng rŏng kơ sư đei Êđen, Miniamin, Jêsua, Sêmaia, Amaria păng Sêkania, lu sư asong ăn tơmam noh kơ lăm lu pơlei ‘bok soi lu ‘bok soi asong kơ lu ‘nhŏng oh sư, hơtŏ hơnơ̆ng mă ‘lơ̆p mă ‘lŏ, kiơ̆ kơ khul lu sư. 16 Kŭm asong kơ lu drŏ-nglo đei chih tơmơ̆t boih anăn lu sư lăm sơ̆p hla bơar jô̆ kiơ̆ adrĕch ‘bok lu sư iŏk đơ̆ng pêng sơnăm tơ kơpal, kiơ̆ kơ khul lu sư gô mơ̆t bơ̆jang rim năr lăm hnam Kră Yang kiơ̆ kơ khul đei asong. 17 Lu sư kư̆m asong ăn kơ lu ‘bok soi kiơ̆ kơ hnam dơnŏ ‘bă lu sư păng lu bơngai Lêwi iŏk đơ̆ng ‘bar-jĭt sơnăm tơ kơpal, asong kiơ̆ kơ tơdrong jang păng kiơ̆ kơ khul lu sư; 18 Lu ‘bok soi đe kư̆m chih anăn lu sư hơdai hăm đĭ-đăng lu kon drŏ-nglo kon drŏ-kăn akăn lu sư, yua kơ lu sư tơpăt pơyơ̆r akâu kơdih. 19 Gah lu ‘bok soi kon sâu Arôn, mă oei tơ mir na, tơ jê̆ kơ pơlei lu sư, dah oei tơ lăm rim pơlei nai, lu sư jang asong tơmam kơ đĭ-đăng kon drŏ-nglo lăm lu ‘bok soi păng lăm lu bơngai Lêwi chih jô̆ boih lăm adrĕch ‘bok lu sư.
Trong tơm ‘bai pơhrăm ‘nâu:
“na lu đe hơmet lu hnam noh. Đei jơhngơ̆m tơpăt ba pơyơ̆r lu tơmam noh, gah tơmam minh lăm mơjĭt păng tơmam rơgoh tah tơmơ̆t.” (II Hơ’mon 31:11b, 12a)
Nơ̆r jet tơchĕng pơwao:
– Pơtao Hesekia đei klaih asong tơdrong jang kơ lu bơngai jang bơwei păng asong lu tơmam pơyơ̆r thoi yơ?
– Lu sư bơ̆jang hăm jơhngơ̆m thoi yơ?
– Lu bơ̆n đei pơhrăm iŏk thoi yơ đơ̆ng kơmĭl pơyơ̆r păng kơmĭl bơ̆jang tơpăt đơ̆ng lu bơngai Lêwi?
Kơkuh kơ đĭ đăng,
Kơplah kon pơlei drơ̆ng iŏk nơ̆r athei đơ̆ng pơtao Hesekia păng pơyơ̆r hơmrah na Kră Yang ‘Bok Kei-Dei ăn pŭn hiôk tôm mah rơkah rơkai na lu sư adrin pơyơ̆r rai lơ thoi noh jing ưh kơ đei anih mong tơmam oei rơkah. Pơtao athei hơmet anih pơtrơp păng hnam akŭm wă pơm anih mong păng pơjao kơ lu bơngai Lêvi hiơ̆k bơ̆jang asong, thoi noh, bơngai Lêvi jang sơng iŏk, bơwei păng asong lu tơmam pơyơ̆r, lu sư chĕp ba lu tơmam pơyơ̆r minh lăm mơjĭt păng lu tơmam rơgoh tah tơmơ̆t anih tah tơmam“ minh tơdrong tơpăt” wă khan tơnăp, tơpă, lu sư ưh kơ đei pơrơ̆ng wă bơwei ăn kơdih akâu păng hnam dơnŏ mă ba ăn đĭ tơ anih tah tơmam.
‘Bok Kônania bơngai Lêwi, đei đơ̆ng pơtao pơjao bơwei lu tơmam lăm anih tah tơmam, oh sư Simei pơm kơiĕng sư, hăm lu mơjĭt ‘nu bơngai jang tơgŭm. ‘Bok Kôrê kư̆m đei tơdrâu ‘nu wang jang tơgŭm “klaih asong tơmam noh minh tơdrong tơpăt ” lăm lu pơlei ‘bok soi, wă khan mơjĭt pêng tŏ pơlei gơh pơjao kơ lu ‘bok soi pơm anih oei (Jôsuê 21: 4) păng rim ‘nu kră dah ‘lơ̆p oei lăm pơlei noh gơh klaih asong. Noh bơih đĭ đăng lu bơngai đei anăn trŏ kơ lăm adrĕch adrung, lăm noh đei lu ‘bok soi păng bơngai Lêwi oei lăm lu pơlei ataih kơ Jêrusalem, lu ‘bok soi păng bơngai Lêwi oei bơjang lăm hnam akŭm, păng dôm lu hơ’lơ̆p drŏ-nglo năm kiơ̆ ‘bă sư mơ̆t tơ hnam akŭm wă pơjuăt bơ̆jang, păng bơngai Lêwi đơ̆ng ‘bar jĭt sơnăm tơ kơpal, kư̆m lăm noh, hnam dơnŏ lu ‘bok soi păng bơngai Lêwi oei lăm Jêrusalem, hnam dơnŏ ‘bok soi păng bơngai Lêwi oei tơ pơlei (trong 17-19) kư̆m gơh asong.
Kơmĭl pơyơ̆r hơmrah đơ̆ng kon pơlei chăl adrol sơ̆ păng kơmĭl jang tơproh ‘lơ̆ng, tơpăt đơ̆ng lu bơngai đei đơ̆ng pơtao Hesekia pơjao pŭ iŏk jang ba ăn kơ lu bơ̆n ‘bai pơhrăm, trŏ kơ rok kiơ̆, khul bơngai lui trŏ kơ rok kiơ̆. Khul Bơngai Lui kơ Kră Yang kăl kơ đei jên tơmam wă kơ gơh jang lơ tơdrong, thoi noh kon pơlei Kră Yang kăl kơ đei jơhngơ̆m pơyơ̆r hơmrah wă kơ wang tơiung gơh lang să dêh char Kră Yang, kơplah lu bơ̆n đĭ jơhngơ̆m pơyơ̆r, Kră Yang gô ăn pŭn hiôk wă kơ lu bơ̆n rai pơyơ̆r lơ hloh. Hăm lu bơngai đei pơjao tơdrong jang bơwei, yua jên tơmam hnam akŭm, kăl kơ tơpăt păng đĭ jơhngơ̆m nhen thoi jang kơ Kră Yang ưh kơ sĭ jang kơ bơngai nai (Kôlôse 3: 23). Kơmĭl bơ̆jang tơpăt đơ̆ng lu bơngai Lêwi tơ’blŏk kơ lu bơ̆n kơplah iŏk tơdrong jang, kăl kơ jang “minh tơdrong tơpăt” păng tơpăt, tơnăp hăm tơpă wă kơ Kră Yang lăp đon păng kon pơlei Kră Yang hiôk lăm jơhngơ̆m kơplah pơyơ̆r.
Bĕ lu bơ̆n wang pôm jơhngơ̆m đon krao khan,
Kơkuh kơ Ih, ơ Kră Yang apinh Ih tơgŭm inh ‘mêm kơ Ih, đĭ jơhngơ̆m pơyơ̆r hơmrah ăn kơ tơdrong jang Kră Yang, păng pơhrăm iŏk đơ̆ng kơmĭl lu bơngai Lêvi wă kơ gơh bơ̆jang kơ Kră Yang hăm tơdrong tơpăt păng pơm trŏ lăm dôm tơdrong jang đơ̆ng Kră Yang pơjao, krao khan yua anăn Kră Yang Yêsu Krist. Amen.
Ơ đĭ đăng bơngai mơ̆ng mă ‘mêm kơeng,
Lu bơ̆n oei bơ̆jang tơdrong Kră Yang hăm đĭ jơhngơ̆m păng tơpăt ưh?
Pơm trŏ tơpăt ling lang
Đĭ jơhngơ̆m pơyơ̆r kơ Kră Yang hơhmrah ưh kơ hiơt
Wang man tơiung hnam Kră Yang kơjăp
Ră roi tơdrong ‘nao ‘lơ̆ng,‘mong bơnê kơ Kră Yang
Đŏk sơ̆p hla bơar nơ̆r ‘Bok Kei-Dei lăm pêng sơnăm: I Hơ’mon 1-2
Kênh Youtube BHKTHN:
