Henplais 7:1-10
Nqe cim:
“Tus Mekhixedes no ua vajntxwv kav lub nroog Xalees, Vajtswv tus uas muaj hwjchim loj kawg nkaus tsa nws ua tus povthawj. Thaum Anplahas mus ntaus rog, Anplahas tua tau ntau tus vajntxwv. Thaum nws rov qab los, Mekhixedes tawm mus tos nws thiab foom koob hmoov rau nws” (Henplais 7:1).
Lus nug rau sawvdaws xav:
– Mekhixedes yog leejtwg?
– Tus neeg no muaj dabtsi ntsis txog peb txojkev ntseeg Tswv Yexus?
Yog cov ntseeg Tswv Yexus, peb pheej xav paub txog cov neeg nyob hauv Vajluskub, kom totaub txog lawv tej haujlwm, thiab tomqab siv tej yam kawm tau cob rau lubneej. Tiamsis tus neeg muaj npe Mekhixedes uas nyob hauv Vajluskub, zoo li muaj ntau leej tseem tsis tau paub txog. Los ntawm tej lus sau tseg hauv Chivkeeb 14:17-24, tus sau phau Henplais piav qhia rau cov nyeem nws tsab ntawv paub txog Mekhixedes li nram qab no:
Thib ib, Mekhixedes yog ib tug vajntxwv thiab yog ib tug povthawj (nqe 1a). Yuav tsum nco ntsoov hais tias nyob hauv cov Yixalayees tsis tau muaj leejtwg ua ob teg haujlwm no ib lub sijhawm. Vajntxwv Xa-ules cim civ tua tsiaj hlawv fij thiaj raug tus Tswv rau txim, tsis pub nws cajces ua vajntxwv lawm (I Xamuyees 13:8-15). Vajntxwv Uxiyas hlawv hmoov tshuaj tsw qab rau saum lub thaj nws thiaj raug mob ruas (II Xwmtxheej 26:16-21). Yog li ntawd, Mekhixedes tshwjxeeb dua txhua tus vajntxwv hauv tebchaws Yixalayees.
Thib ob, Mekhixedes ua tes haujlwm povthawj ibtxhis (nqe 3b). Thaum hais tias Mekhixedes “Yeej tsis muaj ntawv sau qhia tseg hais tias leejtwg yog Mekhixedes niam thiab txiv lossis qhia hais tias leejtwg yog nws yawgkoob. Tsis muaj ntawv sau qhia tseg hais txog hnub uas nws yug lossis hnub uas nws tuag. Nws ua tus povthawj mus ibtxhis ib yam li Vajtswv tus Tub”, tus sau phau Henplais tsis hais tias Mekhixedes muaj nyob ibtxhis tiamsis hais txog tes haujlwm povthawj. Tus povthawj nyob hauv cov Yixalayees yuav tsum yug los ntawm xeem Levis, tes haujlwm yog txiv muab rau tub ua, tiamsis Mekhixedes tes haujlwm yog Vajtswv muab cob kom ua, siab tshaj cov Yixalayees tej kevcai.
Thib peb, Mekhixedes foom koob hmoov rau Anplahas thiab sau ib feem kaum uas Anplahas coj tuaj fij. Anplahas tsis yog tsuas yog cov Yixalayees tus yawgkoob xwb, tus Tswv tseem coglus tseg hais tias nws yuav yog koob hmoov rau txhua haivneeg, yog li ntawd Anplahas tseemceeb heev. Tiamsis Mekhixedes tseem ho tseemceeb dua Anplahas lawm thiab.
Mekhixedes tseemceeb li ntawd, tiamsis nws muaj yam dabtsi ntsistxog kev ntseeg Tswv Yexus? Tus sau tsab ntawv Henplais sau mus rau cov nyeem yog neeg Yudais, lawv yog cov uas tabtom ntsib ntau kev tsimtxom thiab kev dag ntxias tig rov mus coj tej qub kevcai. Thaum piav txog kev ntseeg Tswv Yexus, tus sau xav muab qhov tseemceeb ntawm Mekhixedes los ua timkhawv qhia pom hais tias Mekhixedes yog daim duab hais txog Tswv Yexus, uas yog Tus povthawj Hlob hauv Kev Coglus Tshiab. Zoo li Mekhixedes, Tswv Yexus ke yog Vajntxwv thiab ke yog Povthawj, tiamsis Nws tseemceeb dua tagnrho txhua tus, thiab Nws tes haujlwm yog tes haujlwm ibtxhis. Vim li ntawd, cov uas twb txais yuav Tswv Yexus lawm tsis txhob rov qab mus raws txojkev qub. Yuav tsum zeem paub tej uas tus Tswv ua tseemceeb licas rau yus lubneej.
Thov Vajtswv,
Cawmseej Tswv Yexus, Koj yog Vajntxwv ibtxhis, yog Tus povthawj Hlob uas loj kawg nkaus, yog Tus naghmo, hnub no, thiab mus ibtxhis tsis hloov. Thov ua Koj tsaug, vim Koj los hauv ntiajteb nrhiav thiab cawm nyuam yaus. Thov pab nyuam yaus nco ntsoov Koj txiajntsig, ua neej kom phim txojcai tshiab thiab tsis tig rov mus ua lubneej qub. Amees.
Peb ua licas thaum lub ntiajteb haub ntxias peb rov qab mus taug txoj kev qub?
Nyeem Vajluskub hauv peb lub xyoo: Xefaniyas 3
Kênh Youtube BHKTHN:
