Klei Aê Diê Blŭ: Hêbrơ 7:1-10
Êlan kliăng: “Kyuadah Y‑Mêlkisadek anăn jing mtao ƀuôn Salem, khua ngă yang kơ Aê Diê Pô Ti Dlông Hĭn, bi tuôm hŏng Y‑Abraham êjai gơ̆ wĭt mơ̆ng klei bi mdjiê phung mtao, leh anăn Y‑Mêlkisadek hơêč hmưi klei jăk jĭn kơ gơ̆.” (Hêbrơ 7:1)
Klei êmuh ksiêm mĭn: Hlei Y‑Mêlkisađek jing? Ya klei pô anei djŏ tuôm hŏng klei đăo kơ Krist?
Jing phung đăo kơ Khua Yang, drei khăng mđing mĭn lu kơ phung mnuih arăng čih yăl dliê hlăm hdruôm hră Klei Aê Diê Blŭ, tal êlâo hĭn čiăng thâo săng hlei digơ̆ jing, êdei tinăn hrui mă klei hriăm yua kơ klei hdĭp drei pô. Ƀiădah hŏng lu mnuih, anăn Y‑Mêlkisađek pătdah msĕ si ka tuôm hmư̆ ôh. Mă mơ̆ng klei čih yăl dliê hlăm Klei Mphŭn Dơ̆ng 14:17-24, pô čih hră Hêbrơ mblang brei phung dlăng hră ñu čih mơĭt anei thâo kơ boh yuôm Y‑Mêlkisađek snei:
Tal sa, Y‑Mêlkisađek jing sa čô mtao leh anăn khua ngă yang (êlan 1a). Brei mđing bi nik kơ klei anei, hlăm phung Israel amâo mâo ôh pô klam dua bruă anei hlăm sa blư̆. Kyua mtao Y‑Sôl cŏng thơ̆ng myơr mnơ̆ng ngă yang, snăn ñu tŭ klei Aê Diê bi kmhal, Aê Diê sua mă hĕ ƀuôn ala mtao mơ̆ng phung anak čô ñu (I Y‑Samuel 13:8-15). Kyua mtao Y‑Usia čŏng thơ̆ng čuh mnơ̆ng ƀâo mngưi ti knưl, snăn ñu tŭ klei bi kmhal hŏng klei djŏ phŭng (II Klei Yăl Dliê 26:16-21). Snăn yơh, Y‑Mêlkisađek jing sa čô mnuih mâo klei mdê hĭn kơ jih jang phung mtao mkăn hlăm găp djuê phung Israel.
Tal dua, Y‑Mêlkisađek jing sa čô khua ngă yang hlŏng lar (êlan 3b). Tơdah lač kơ Y‑Mêlkisađek, “amâo mâo ama, amâo mâo amĭ ôh, kăn mâo phung aê aduôn rei. Ñu amâo mâo phŭn ôh, kăn mâo knhal tuč klei hdĭp rei,” amâo djŏ pô čih hră Hêbrơ čiăng lač kơ klei amâo thâo djiê ôh, ƀiădah čiăng lač kơ bruă khua ngă yang. Khua ngă yang hlăm phung Israel jing mnuih arăng kkiêng hlăm găp djuê Lêwi, jing bruă ama čuê kơ anak, ƀiădah bi bruă Y‑Mêlkisađek dê Aê Diê pô yơh mjing, êgao kơ hdră bhiăn leh anăn klei bhiăn phung Israel.
Tal tlâo, Y‑Mêlkisađek hơêč hmưi kơ Y‑Abraham leh anăn mă tŭ mnơ̆ng myơr mơ̆ng Y‑Abraham. Amâo djŏ Y‑Abraham knŏng jing aê kơ phung Israel ôh, ƀiădah wăt Aê Diê ƀuăn mơh kơ ñu srăng jing akŏ klei jăk jĭn kơ lu găp djuê mnuih. Kyuanăn Y‑Abraham jing prŏng snăk. Ƀiădah Y‑Mêlkisađek jing prŏng hĭn kơ Y‑Abraham.
Y‑Mêlkisađek jing yuôm bhăn msĕ snăn ƀiădah ya klei Y‑Mêlkisađek djŏ tuôm hŏng klei đăo kơ Krist? Pô čih hră Hêbrơ čih mơĭt kơ phung Yuđa jing phung dôk bi tlă anăp hŏng lu klei lông dlăng leh anăn klei mplư lŏ wĭt kơ klei kkuh mpŭ leh anăn klei bhiăn êlâo dih. Tơdah mblang kơ klei đăo kơ Krist, pô čih hră anei bi êdah klei yuôm mơ̆ng Y‑Mêlkisađek čiăng kơ digơ̆ thâo Y‑Mêlkisađek yơh jing rup kơ Khua Yang Yêsu, jing Khua Ngă Yang Prŏng kơ klei bi mguôp mrâo. Msĕ si Y‑Mêlkisađek, Khua Yang jing Mtao leh anăn khua ngă yang mơh, ƀiădah Ñu jing prŏng hĭn kơ jih jang, leh anăn bruă Ñu jing bruă hlŏng lar. Kyuanăn yơh, đăm brei sa čô đăo leh kơ Yêsu Krist lŏ tui duah êlan kplăk wĭt kơ êlan hđăp ôh. Brei drei thâo jih jang klei Khua Yang ngă leh kơ drei yuôm bhăn êdimima.
Si drei srăng lŏ kdơ̆ng wĭt tơdah lăn ala mplư drei lŏ wĭt kơ knhuah hdĭp hđăp?
Wah lač: Ơ Khua Yang Yêsu, Mtao hlŏng lar leh anăn Khua Ngă Yang Prŏng hĭn, jing Pô mbruê, hruê anei leh anăn nanao hlŏng lar amâo mlih ôh. Bi mni kơ Ih hriê leh ti lăn ala tui duah leh anăn bi mtlaih kâo. Đru kâo thâo hdơr knga kơ Ih nanao, hdĭp năng hŏng klei bi mguôp mrâo leh anăn khut khat amâo lŏ wĭt kơ êlan hđăp ôh.
Dlăng klei Aê Diê Blŭ hlăm tlâo thŭn: Y‑Sôphôni 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
