Klei Aê Diê Blŭ: Klei Mtô Mñă Klei Bhiăn 7:12-15
Êlan kliăng: “Ih srăng mâo klei jăk jĭn êgao hĭn kơ jih jang phung ƀuôn sang mkăn; amâo srăng mâo êkei mniê plao ôh ti krah ih, amâodah ti krah êmô biăp ih.” (Klei Mtô Mñă Klei Bhiăn 7:14).
Klei êmuh ksiêm mĭn: Ya klei Aê Diê srăng hơêč hmưi, tơdah phung ƀuôn sang Israel djă pioh klei bi mguôp hŏng Aê Diê? Ya klei mblang kơ klei jăk jĭn yuôm êdi anei? Mâo klei jăk jĭn êgao hĭn kơ jih jang phung ƀuôn sang mkăn brei phung ƀuôn sang mkăn thâo kral kơ hlei Aê Diê jing? Si klei hdĭp drei bi êdah Aê Diê kơ mnuih mkăn?
Y-Môis dôk lač kơ klei Aê Diê ƀuăn hŏng phung ƀuôn sang Israel, Ñu srăng thiê brei hŏng klei kmah kơ phung ƀuôn sang Ñu tơdah diñu mŭt khuăn anôk dôk hlăm Lăn Ƀuăn. Dŭm mta klei Aê Diê ƀuăn brei kơ phung ƀuôn sang Ñu, jing hnơ̆ng mkă čuăn tŭ sĭt hlăm klei hdĭp, leh anăn wăt đru kơ phung ƀuôn sang Aê Diê tlaih huĭ hyưt kơ klei hdĭp mrâo mơh. Ñu ƀuăn srăng thiê brei kơ phung ƀuôn sang Ñu dơ̆ng mơ̆ng lăn hma pla mnơ̆ng, mnơ̆ng rông truh kơ klei suaih asei mlei kơ grăp čô ƀuôn sang. Klei ƀuăn kơ brei klei ruă đuê̆ kbưi mơ̆ng phung ƀuôn sang Israel dưi lač anăn jing klei rơ̆ng kơ klei hdĭp phung ƀuôn sang Aê Diê, amâo mâo truh ôh klei ruă kjham diñu ƀuh leh hlăk dôk ti čar Êjip. Amâo djŏ knŏng dŭm năn ôh, Ñu ăt ƀuăn mơh amâo srăng mâo sa čô êkei amâodah mniê plao ôh ti krah diñu, wăt ti krah êmô biăp diñu msĕ mơh. Anei jing sa hlăm lu klei ƀuăn sĭt êmĭt yuôm hĭn, kyuadah klei ƀuăn anei yơh kñăm sĭt kơ djuê ana ƀuôn sang Israel amâo srăng tuôm rai luč ôh ti lăn ala.
Dưi lač, klei Aê Diê ƀuăn hơêč hmưi klei jăk jĭn kơ phung ƀuôn sang Israel êgao hĭn kơ jih jang klei hơêč hmưi hlăm phung ƀuôn sang mkăn. Leh anăn hŏng klei hơêč hmưi klei jăk jĭn Aê Diê tuh êbeh dlai kơ phung ƀuôn sang Ñu yơh, srăng brei phung ƀuôn sang mkăn bi êmuh, ya phŭn knhal kơ klei phung ƀuôn sang Israel mâo hĕ klei hdĭp jăk jĭn msĕ snăn. Hlăk anăn yơh, klei lŏ wĭt lač diñu mă tŭ anăn jing mơ̆ng klei khăp prŏng prĭn Aê Diê hơêč hmưi kơ phung ƀuôn sang pioh hjăn kơ Ñu. Leh anăn hŏng klei hdĭp Aê Diê hơêč hmưi klei jăk jĭn yuôm hĭn anăn yơh srăng brei jih jang phung ƀuôn sang mkăn thâo kral Aê Diê jing Pô kdlưn êgao hĭn kơ phung yang diñu dôk kkuh mpŭ.
Hruê anei, năng ai mâo lu mnuih hngah amâo čiăng mđing hmư̆ ôh kơ klei drei hưn bi sĭt kơ Khua Yang, ƀiădah mâo sa mta klei sĭt nik, anăn jing diñu kăp dôk čiăng thâo, mơ̆ng ya phŭn knhal klei hdĭp drei mâo klei jăk jĭn nanao dơ̆ng mơ̆ng bruă điêt truh kơ bruă prŏng msĕ snăn. Klei jăk jĭn čiăng lač tinei amâo djŏ ôh knŏng mâo lu dŏ dô mnơ̆ng dhơ̆ng, ƀiădah mta klei yuôm bhăn hĭn jing klei hơ̆k mơak, êđăp ênang hlăm klei hdĭp, klei mơak ai tiê wăt tơdah amâo mâo mdrŏng sah hĭn kơ arăng dưn, klei Aê Diê kăp thiê brei djŏ hruê mmông Ñu, klei Aê Diê lŏ wĭt lač hlăk tlă anăp hŏng klei truh dleh dlan… Lu mta klei, mĭndah hơăi mang msĕ yang đar ƀiădah jing hĕ mta klei lu mnuih hmăng hmưi čiăng mâo ƀiădah amâo dưi mâo ôh. Akâo kơ Aê Diê đru drei dôk hdĭp bi êdah nanao mâo sa čô Pô kdlưn êgao hĭn kơ jih jang yang, Ñu dôk hơêč hmưi leh anăn êbat mđrăm mbĭt nanao hŏng phung ƀuôn sang Ñu tar kdrŭn êlan klei hdĭp.
Phung mkăn thâo kral si Khua Yang jing, găn hŏng klei hdĭp drei?
Ơ Khua Yang, bi mni lač jăk kơ Ih kyua jih klei jăk jĭn yuôm bhăn Ih hơêč hmưi leh kơ klei hdĭp kâo mbĭt hŏng gŏ sang kâo grăp hruê. Akâo kơ Aê Diê brei lu mnuih thâo kral Khua Yang găn hŏng klei hdĭp kâo.
mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Yap 6
Kênh Youtube BHKTHN:
