Klei Aê Diê Blŭ: Klei Bi Hriêng 25:8-10
Êlan kliăng: “Tơdah ih bi mgăl klei ih hŏng pô riêng gah ih, đăm bi êdah klei hgăm sa čô mkăn ôh” (Klei Bi Hriêng 25:9)
Klei êmuh ksiêm mĭn: Ya klei mtao Y-Salômôn mtă mtăn kơ anak? Ya mta klei yuôm brei mđing? Ya ngă? Si brei drei ksiêm răng kơ klei blŭ êjai mgaih mkra klei amâo thâo bi djŏ?
Mtao Y-Salômôn brei leh kơ anak sa klei mtă mtăn thâo mĭn tơdah mâo klei amâo bi djŏ hŏng phung riêng gah, anăn jing kyuadah mâo lu snăk mta klei amâo dưi thâo săng jŭm ôh, kyuanăn hrô kơ ruăt kuăt yua klei phat kđi, bi êdah “klei hưn bi sĭt” pô dê kơ khua phat kđi amâodah hưn kơ jih jang mnuih, snăn brei blŭ hrăm klă kpă hŏng tĭng pô mâo klei hŏng drei, hĭn kơ ruăt bi lar bi hing mta klei amâo klă sĭt, kƀah klei ksiêm dlăng, wăt hŏng klei phung mơ̆ng êngao kčŭt mčhur. Nao bĕ kơ “pô riêng gah” leh anăn gĭr bi mgaih mkra mta klei mâo hjăn hdơ̆ng pô êlâo. Yua bĕ klei kpă ênuah, klei mpŭ blŭ hrăm hŏng diñu.
Ƀiădah lĕ, mâo sa klei yuôm brei drei mđing tơdah blŭ hrăm hŏng pô riêng gah, anăn jing “đăm bi êdah klei hgăm sa čô mkăn ôh”. Dưi thâo săng klei anei hŏng dua mta klei mblang, tal sa, đăm hưn mdah ôh klei mâo hjăn pô ti krah “ih” leh anăn “pô riêng gah” kơ mnuih mkăn čiăng mgang kơ pô amâodah blŭ êkŭt kơ “pô riêng gah”. Tal dua, đăm hưn mdah ôh ya klei hmư̆ mơ̆ng pô mkăn amâodah kơ mnuih mkăn, êngao kơ hdơ̆ng dua čô dôk mâo klei, klei hưn mdah kyua čiăng tŭ dưn kơ pô jing sa klei năng hêñ (Klei Bi Hriêng 11:13). Blŭ mdê, wăt tơdah ya klei boh mâo dưn, ăt kăn blŭ klei bi jhat arăng rei čiăng mgang kơ pô. Mâo sa čô mnuih, phung mah jiăng kčŭt mčhur brei gơ̆ hưn mdah klei pô mkăn mâo. Gơ̆ êmuh diñu: “Si ngă diih dưi djă pioh klei hgăm mơ̆?” Diñu rơ̆ng hŏng gơ̆ dưi djă pioh klei hgăm. Gơ̆ lač: “Kâo msĕ mơh”, leh anăn hngah amâo lŏ blŭ thiăm ôh!
Phŭn knhal kơ klei mtao Y-Salômôn mtă mtăn brei mđing anei kyua, tơdah amâo mpŭ ôh klei pô mkăn mâo, snăn “klei bi hêñ ih amâo dưi lăm jih ôh”, êlan anei mblang jing “klei hing ang jhat ih arăng hdơr nanao” (êlan 10b), čiăng lač klei hing ang jhat kơ pô mkăn ih bi lar leh amâo lŏ dưi mgang ôh leh anăn ăt kăn dưi lŏ hrui wĭt rei ya klei ih blŭ leh. Boh blŭ “bi hêñ” yua tinei, mtao Y-Salômôn čiăng lač snei, tơdah anak pŏk êhai klei bi mneh msao leh anăn ktŭng wăt phung mkăn mŭt mbĭt, anak srăng jing jhat kjham hĭn kơ “pô riêng gah” dôk mâo klei hŏng pô mơh.
Tơdah amâo răng, amâo krơ̆ng ksiêm ôh klei drei blŭ, drei bi luč lu snăk knuih khưm drei pô hŏng mnuih mkăn, leh anăn klei hing ang jhat srăng đuôm mbĭt hŏng anăn iêô kơ drei amâo dưi lŏ lăm ôh. Kyuanăn, tơdah mâo klei bi mgăl, brei drei răng snăk kơ klei blŭ drei êjai dôk hlơr. Đăm hưn mdah ôh jih klei drei thâo kyua čiăng dưi hĭn hlăm klei bi tăng mgăl.Tơdah amâo snăn, năng ai drei srăng dưi hlăm sa klei bi blah, ƀiădah drei srăng luč kluôm jih hlăm kdrăn blah.
Ya klei čiăng drei bi mlih êjai mgaih mkra klei mâo bi djŏ?
Wah lač: Ơ Khua Yang, brei kâo hdĭp thâo khăp thâo mpŭ, leh anăn kpă ênô hŏng jih jang mnuih, boh nik nak hŏng phung ayŏng amai adei hlăm Phung Sang Aê Diê čiăng đăm yang jhat mjhua bi kah klei bi mguôp sa ai hlăm Phung Sang Aê Diê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôsuê 18
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
