II-Kauleethaus 7:12-16
Nqe cim:
“Kuv qhuas nej rau nws. Qhov uas kuv qhuas li ntawd yeej tsis ua rau kuv poob ntsejmuag. Tej uas peb qhia nej puavleej yog tej uas tseemceeb tsis muaj ib qho dag li. Ib yam nkaus li ntawd, tej uas peb qhuas nej rau Titus yeej muaj tseeb tiag.” (II-Kauleethaus 7:14).
Lus nug rau sawvdaws xav:
- Vajtswv Txojlus qhia paub dabtsi txog Titus?
- Titus lub siab hmov tshua cov ntseeg hauv nroog Kauleethaus zoo li cas?
- Los ntawm cov xov Titus hais, Timthawj Paulus paub dabtsi txog Pawg Ntseeg Kauleethaus?
- Peb kawm tau dabtsi ntawm Timthawj Paulus cov lus qhuas Pawg Ntseeg Kauleethaus?
Ntu Vajluskub no hais ntau zaug txog Titus. Nws yog ib tug neeg uas ntsig txog Timthawj Paulus cov ntu sijhawm mus tshajtawm Txojmoo Zoo. Dhau los ntawm Paulus cov lus hais hauv cov tsab ntawv, peb paub Titus yog neeg Kilis (Kalatias 2:1-3), Paulus qhia los ntseeg tus Tswv thiab Paulus hais tias “yog kuv tus tub” (Titus 1:4). Titus yog tus sawvcev xa Timthawj Paulus thawj tsab ntawv mus rau Pawg Ntseeg Kauleethaus. Thiab Titus kuj yog tus uas ntsia pom cov ntseeg hauv nroog Kauleethaus kev ua neej thaum txais tau tsab ntawv ntawd, thiab tom qab ntawd rov los qhia rau Paulus.
Titus txojkev zoo siab tau qhia tawm los txog Timthawj Paulus thaum Titus tim ntsej tim muag pom cov ntseeg Kauleethaus hloov, mloog lus, thiab txais tos cov neeg ua Vajtswv haujlwm uas Paulus txib mus (nqe 13, 15). Qhov no yog cov vimchiv ua timkhawv qhia tej yam zoo uas Timthawj Paulus hais txog cov ntseeg hauv nroog Kauleethaus rau Titus muaj tseeb. Txawm yog tseem muaj ntau yam ua tsis tau zoo hauv lub neej nrog tus Tswv mus, los cov ntseeg Kauleethaus kuj muaj qhov zoo thiab tsimnyog txais tej lus qhuas los ntawm Timthawj Paulus, vim lawv tsis ua rau nws tas kev cia siab (nqe 14,16).
Yog Vajtswv tus menyuam lawm, tus uas ua Vajtswv haujlwm yuav tsum hais tej lus tseeb, thiab tej lus qhuas ib tug neeg twg los yuav tsum yog lus qhuas tseeb. Timthawj Paulus tsis yog qhuas kom lawv nyiam nws tiamsis nws pom qhov zoo ntawm nws cov menyuam sab ntsujplig, txawm yog yam uas lawv tabtom ua tseem muaj qee yam raug thuam tsis zoo. Cov lus qhuas tseeb ua rau muaj kev txhawb zog rau cov txais, yog lub zog pab lawv ua zoo ntxiv. Tibneeg nyiam mloog lus qhuas, txawm yog tej lus qhuas ntawd tsis muaj tseeb, tej lus qhuas dag ua si, lossis lus qhuas cuav, ua kom tau rau tus kheej xwb. Cia li ua tib zoo ceevfaj, vim qhov ntawd yog lub voj hluas ua rau peb yim hnub yim poob rau kev xav tsis muaj tseeb thiab ua neeg khavtheeb. Cov ntseeg Yexus cheemtsum qhuas kom ib leeg txhawb tau ib leeg zog, tiamsis nco ntsoov peb yog Vajtswv cov menyuam, thaum qhuas yuav tsum qhuas tej lus tseeb.
Thov Vajtswv,
Vajtswv, Koj yog tus tseeb! Koj Txojlus qhia hais tias Koj nyiam qhov tseeb, thov Koj pab nyuam yaus paub ua neej tseeb, hais tej lus tseeb rau txhua tus kom tsimnyog nyuam yaus yog Koj menyuam. Amees.
Peb tej lus qhuas lwm tus puas yog lus qhuas tseeb?
Nyeem Vajluskub hauv peb lub xyoos: Yelemis 19:1-22
Kênh Youtube BHKTHN:
