Klei Aê Diê Blŭ: II Kôrantô 7:12-16
Êlan kliăng: “Tơdah kâo bi mni leh kơ kâo pô kyua diih ti anăp ñu, kâo amâo mâo klei hêñ ôh; ƀiădah msĕ si jih jang klei hmei blŭ leh kơ diih jing sĭt, msĕ snăn mơh klei hmei bi mni kơ diih ti anăp Y‑Tit bi êdah leh jing sĭt” (II Kôrantô 7:14)
Klei êmuh ksiêm mĭn: Ya Klei Aê Diê Blŭ brei thâo kơ Y‑Tit? Si ai tiê Y‑Tit mđing dlăng kơ phung đăo Kôrantô? Mơ̆ng klei Y‑Tit hưn, ya klei Khua ƀĭng kna Y‑Pôl thâo kơ boh klei Sang Aê Diê Kôrantô? Ya klei hriăm drei mâo mơ̆ng klei Khua ƀĭng kna Y‑Pôl bi mni sĭt kơ Sang Aê Diê Kôrantô?
Trăn Klei Aê Diê Blŭ anei mñă lu kơ Y‑Tit. Ñu jing mnuih siă suôr hlăm gưl Khua ƀĭng kna Y‑Pôl hiu hưn klei đăo. Mơ̆ng klei Khua ƀĭng kna Y‑Pôl hưn mthâo hlăm hră ñu čih, drei thâo Y‑Tit jing mnuih Grĕk (Galati 2:1-3), ñu đăo kơ Aê Diê mơ̆ng Khua ƀĭng kna Y‑Pôl leh anăn mâo Khua ƀĭng kna iêô jing “anak kâo sĭt hlăm klei drei đăo” (Y‑Tit 1:4). Y‑Tit jing pô bi ala kơ Khua ƀĭng kna Y- Pôl ba kơ Sang Aê Diê Kôrantô hră ñu čih tal sa kơ digơ̆. Leh anăn ăt Y‑Tit jing pô kăp dlăng si klei phung đăo Kôrantô ngă leh diñu mă hră tal sa anăn, leh anăn bi kčah bi tuôm hŏng Khua ƀĭng kna Y‑Pôl lŏ hưn boh tŭ.
Klei mơak Y‑Tit hưn kơ Khua ƀĭng kna Y‑Pôl leh Y‑Tit ƀuh klei bi mlih, ai tiê gưt asăp phung đăo Kôrantô, leh anăn klei phung ƀuôn sang Aê Diê tinei jum phung mă bruă kơ Aê Diê hŏng phung khua kiă kriê hlăm klei hdĭp mngăt diñu, jing phung Khua ƀĭng kna Y‑Pôl tiŏ nao (êlan 13, 15). Anei jing dŭm mta phŭn bi mklă kơ klei jăk Khua ƀĭng kna Y‑Pôl lač hŏng Y‑Tit kơ phung đăo Sang Aê Diê Kôrantô jing sĭt. Wăt tơdah adôk lu klei kƀah hlăm klei hdĭp tui hlue Khua Yang, ƀiădah phung đăo Kôrantô ăt mâo klei jăk leh anăn năng dưi mâo klei bi mni sĭt mơ̆ng Khua ƀĭng kna Y‑Pôl, digơ̆ amâo ngă kơ ñu êdu ai ôh (êlan 14, 16).
Jing anak Aê Diê Sĭt Nik, phung mă bruă kơ Khua Yang brei blŭ klei sĭt nik, leh anăn klei diñu bi mni kơ grăp čô ăt brei jing sĭt. Khua ƀĭng kna Y‑Pôl amâo bi mni čiăng mjing klei hmăi ôh ƀiădah ñu ƀuh klei jăk mơak phung anak hlăm mngăt mơ̆ng pô, wăt tơdah klei digơ̆ dôk ngă năng ai mâo đa đa mnuih ƀuah. Klei bi mni sĭt ba klei mđĭ ai prŏng kơ phung hmư̆, jing klei mđĭ ai đru digơ̆ jing jăk hĭn. Anak mnuih khăp hmư̆ klei bi mni, wăt klei bi mni akâo sĭt, klei bi mni knŏng jing klei blŭ hrăm, amâodah klei bi mni mgưt, tăp năng knŏng jing klei bi mni mă ai čiăng duah klei jăk kơ pô. Brei drei răng kyua anăn jing dŭm klei mplư ngă kơ drei čhuai kơ klei pô amâo mâo ôh leh anăn mgao. Phung đăo kơ Krist brei bi mni čiăng hdơ̆ng bi mđĭ ai ƀiădah brei hdơr drei jing anak Pô Sĭt Nik anăn sĭt bi mni brei bi mni hŏng ai tiê sĭt.
Klei drei bi mni kơ pô mkăn jing klei sĭt nik mơ̆?
Wah lač: Ơ Aê Diê Sĭt Nik! Kâo dưi mñă Ih khăp nanao kơ klei sĭt nik, akâo kơ Ih đru kâo hdĭp sĭt nik nanao, blŭ klei sĭt nik hŏng grăp čô mnuih čiăng năng jing anak Ih.
Dlăng Klei Aê Diê Blŭ hlăm tlâo thŭn: Y‑Yêrêmi 19:1-22
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
