II Kevcai 6:4-6
Nqe cim:
“Nej yuav tsum nco ntsoov tej lus uas hnub no kuv qhia rau nej.” (II Kevcai 6:6).
Lus nug rau sawvdaws xav:
– Mauxes qhia cov neeg Yixalayees yam dabtsi hais txog tus Tswv?
– Lawv ua li cas rau tus Tswv?
– Ntu Vajluskub no qhia paub lub plag qhia kev ntseeg yog dabtsi?
Ua ntej cov Yixalayees mus rau hauv lub tebchaws Vajtswv coglus tseg, Mauxes qhia yam tseemceeb rau lawv: “Ib tsoom Yixalayees, nej ua tib zoo mloog, tsuas yog tus Tswv tib leeg xwb, thiaj yog peb tus Vajtswv.” (nqe 4). Qhov no yog feem qhib thawj ntawm cov lus qhia tawm kev ntseeg hauv cov nqe 4-9 uas cov neeg Yixalayees hais tias “Shema” (txhais tau hais tias “cia li mloog lossis ua tib zoo mloog”). “Shema” raug suav hais tias yog cov lus qhia tawm kev ntseeg tseemceeb ntawm cov neeg Yixalayees yuav tsum nyeem ib hnub 2 zaug rau lub sijhawm thov Vajtswv sawv ntxov thiab tsaus ntuj. Lo lus qhib thawj “Shema”, Mauxes xav kom cov Yixalayees yuav tsum mloog thiab cim rau hauv lub siab ob yam no. Tim ib, Tus Tswv yog “peb tus Vajtswv” – yog hais txog tus Tswv haivneeg, Nws coglus rau Nws haivneeg thiab nrog lawv sib raug zoo. Tim ob, tsuas muaj tus Tswv tibleeg xwb, tsis muaj dua lwm tus Tswv lawm.
Tsuas muaj tib tug Tswv thiaj yog cov Yixalayees tus Vajtswv, yog lawv yuav tsum “hlub tus Tswv kawg siab kawg ntsws, kawg plab kawg plawv” (nqe 5). Peb ua tib zoo saib lo lus “hlub” – thaum cov neeg sau Txojmoo Zoo lawv hais txog nqe Vajluskub no hauv Mathais 22:37, Malakaus 12:30, Lukas 10:27, lawv puavleej yog siv lo lus “agape” los hais lub ntsiab “hlub”; dua li ntawd yog hais txog hlub tus Tswv yog muab txojkev hlub txaus nkaus, dawbhuv thiab loj tshaj plaws. Qhov no kuj yog lo lus qhia txog Vajtswv txojkev hlub pub rau neeg (Yauhas 3:16). Cov Yixalayees yuav tsum hlub tus Tswv kom txaus nkaus hauv txhua seem, txij lub siab, kev txawj ntse, dag zog, thiab tagnrho yus kev xav. Ua lwm seem lus hais, lawv yuav tsum muab tus kheej fij tagnrho rau tus Tswv thiab nco ntsoov hauv lub siab, “tej lus uas hnub no kuv qhia rau nej” (nqe 6).
Tej lus Mauxes qhia rau cov Yixalayees kuj yog lub plag ntawm txojkev qhia kev ntseeg rau cov ntseeg. “Kev ntseeg” uas peb tabtom hais yog qhov uas paub txog tus Tswv, tus uas muaj txojkev sib raug zoo nrog cov ntseeg, tsuas muaj tib tug Vajtswv, Nws tseemceeb thiab muaj nqis rau txhua tus ntseeg lub neej. Qhov no tseemceeb kawg nkaus, zoo ib yam li Kx. A. W. Tozer hais, “Thaum kawm paub Vajtswv, tej uas peb nco cia hauv siab yog qhov tseemceeb heev hais txog peb”. Vajtswv twb qhia tshwm Nws yog leejtwg, Nws ua dabtsi, Nws xav tau dabtsi, yog li tes haujlwm qhia kev ntseeg yog pab kom tus ntseeg tus Tswv paub tseeb thiab ua tau qhov yog txhua hnub, lub neej hloov tshiab raws nraim li tus Tswv lub siab nyiam. Totaub lub plag ntawm tes haujlwm qhia kev ntseeg, peb yuav npaj tau qhov zoo rau Pawg Ntseeg, tsis yuam kev thaum pab lwm tus txojkev ntseeg.
Thov Vajtswv,
Tus Tswv, nyuam yaus ua tsaug uas Koj qhia nyuam yaus paub yam tseemceeb hauv lub neej, yog paub tus Tswv thiab hlub Koj. Thov Koj pab nyuam yaus ncaj ncees rau tes haujlwm qhia kev ntseeg rau lwm tus. Amees.
Peb puas kawm paub tus Tswv kom meej kom thaum muaj sijhawm peb qhia tau rau lwm tus paub tus Tswv thiab?
Nyeem Vajluskub hauv peb lub xyoo: Tes Haujlwm 19:8-41
Kênh Youtube BHKTHN:
