Filipis 2:1-2
Nqe cim:
“Kuv thov ntuas nej kom nej txhua tus muaj lub siab xav ib yam nkaus, muaj lub siab hlub ib yam nkaus thiab sawvdaws koom ua ib lub siab, ib tug nrog ib tug sib raug zoo. Yog nej ua li ntawd yuav ua rau kuv zoo siab kawg li” (nqe 2).
Lus nug rau sawvdaws xav:
– Timthawj Paulus hais txog lub ntsiab ntawm cov ntseeg sib koom muaj peb seem zoo licas?
– Sib koom muaj qab hau dabtsi?
– Koj twb tau txais yam zoo ntawm kev sib koom licas lawm?
Cov lus hauv nqe 2 no, Timthawj Paulus hais txog lub ntsiab ntawm cov ntseeg kev sib koom muaj peb seem ntsig txog phim rau peb lub plag ua chaw txawb ruaj khov.
Tim ib, koom ua ke yog “lub siab xav ib yam nkaus”, txhais tau hais tias kev xav, lub tswvyim koom mus tib seem. Tibneeg tsis yoojyim koom siab lossis koom tib txojkev xav vim “cuaj leeg muaj kaum txoj kev xav”. Tsuas yog thaum Vajtswv cov menyuam los nyob hauv tib qhov chaw uas yog “Yexus Khetos” (nqe 1) ces thiaj muaj “lub siab xav ib yam nkaus” txog kev ntseeg, qhov tseeb hauv Vajluskub, kev ua neej thiab kev ua haujlwm… Nqe lus “lub siab xav ib yam nkaus” rov nqua hu ib zaug ntxiv hauv Filipis 2:5: “Tsimnyog nej muaj lub siab zoo ib yam li Yexus Khetos lub”. Yuav “muaj lub siab zoo ib yam” li tus Tswv ces yuav tsum kawm kom paub Vajtswv Txojlus zoo thiab totaub thiaj paub ua neej zoo li Nws ua.
Tim ob, sib koom yog “lub siab hlub ib yam nkaus”, raws li hauvpaus lus mas yog koom txais tib txojkev hlub. Lub plag tim ob ntawm txojkev sib koom ua ke yog “nrog Vaj Ntsujplig sib raug zoo” (nqe 1), thaum los ntseeg Yexus ces Vaj Ntsujplig los nyob hauv siab thiab tau los koom tib txojkev hlub. Txojkev hlub ua kom cov ntseeg muaj kev sib koom ua ke, tsis zoo li tibneeg txojkev hlub uas tsis ruaj, tsis txaus, tiamsis yog Vajtswv txojkev hlub pub rau neeg txais kev cawm dim thiab muaj Vaj Ntsujplig ua homthawj nias rau. “Lub siab hlub ib yam nkaus” kuj txhais tau hais tias hlub txhua tus ib yam nkaus. Peb hlub lwm tus tsis yog vim peb, tiamsis vim yog peb koom Vajtswv tib txoj koob hmoov thiab “muaj lub siab zoo ib yam li Yexus Khetos lub”.
Tim peb, sib koom ua ke yog “koom ua ib lub siab, ib tug nrog ib tug sib raug zoo”, lub plag tim peb ntawm sib koom ua ke yog sab ntsujplig tau hloov dua tshiab. Sib“koom ua ib lub siab” yog tej yam tseemceeb nyob hauv cov tibneeg hloov dua tshiab lawd los koom ua ke hauv sab ntsujplig. “Ib tug nrog ib tug sib raug zoo” yog koom nrhiav qhov sib thooj ntawm sawvdaws kom muaj tib lub hom phiaj, qhov ntawd ua rau peb tso tej yam txawv lwm tus yam pov tseg.
Sib koom ua ke yuav ua rau muaj kev“zoo siab kawg li”. Dhau ntawd Pawg Ntseeg muaj kev txhim kho sab ntsujplig, ib leeg txhawb tau ib leeg, sawvdaws tiv taus dhau tej kev sim siab thiab txais kev zoo siab kawg li. Hais dua lwm seem, sib koom ua ke tsis yog kawm paub xwb tiamsis yog ua raws kom Pawg Ntseeg loj hlob.
Thov Vajtswv,
Vajtswv, thov Koj pab kom nyuam yaus niaj hnub ua tau raws li tus Tswv Koj ua hauv txojkev xav thiab kev nqis tes ua haujlwm, kom nyuam yaus nrog tau cov kwvtij ntseeg sib koom txhim tsa Pawg Ntseeg thiab tau txais txojkev zoo siab hauv qhov kev sib koom no. Amees.
Koj puas tabtom koom siab nrhiav Vajtswv lub tshwjchim thiab ua kom Nws lub Tebchaws nthuav dav?
Nyeem Vajluskub hauv peb lub xyoo: Phau Ntawv Nkauj 59:1-60:12.
Tshooj Youtube BHKTHN: https://www.youtube.com/c/bhkthn
