Klei Aê Diê Blŭ: Philip 2:1-2
Êlan kliăng: “Brei diih bi ênŭm klei mơak kâo hlăm klei diih mâo klei mĭn msĕ, klei khăp msĕ, jing sa ai leh anăn sa klei mĭn” (Philip 2:2).
Klei êmuh ksiêm mĭn: Si klei khua ƀĭng kna Y‑Pôl mblang kơ klei jing sa hlăm Krist mâo tlâo bĭt kkiêng djŏ guôp hŏng tlâo atur kơ klei jing sa? Ya boh tŭ dưn mơ̆ng klei jing sa? Si drei tuôm bi knal leh kơ mta klei anei?
Boh blŭ ruê̆ “brei diih” kčưm mŭt êlan 2 brei ƀuh klei jing sa jing boh tŭ mơ̆ng atur hlăm êlan 1 drei mrâo hriăm. Dơ̆ng mơ̆ng anăn, khua ƀĭng kna Y‑Pôl mblang kơ klei jing sa hlăm Krist mâo tlâo bĭt kkiêng djŏ guôp hŏng tlâo atur kơ klei jing sa.
Tal sa, klei jing sa jing “mâo klei mĭn msĕ”, čiăng lač klei bi mĭn amâodah klei hung mĭn amâodah mdưm klei mĭn msĕ kơ sa mta klei. Anak mnuih dleh snăk mâo ai tiê msĕ, klei mĭn msĕ kyuadah “dua păn čô mâo pluh klei mĭn”. Knŏng tơdah phung anak ƀuôn sang Aê Diê dưm mbĭt klei mĭn diñu pô hlăm sa atur mbĭt jing “Yang Krist” (êlan 1) snăn kơh dưi “mâo klei mĭn msĕ” kơ klei đăo, klei sĭt nik Klei Aê Diê Blŭ, klei mĭn kơ klei hdĭp, kơ ênoh yuôm, klei mă bruă… Boh blŭ “mâo klei mĭn msĕ” lŏ mñă klă hlăm klei iêu mthưr hlăm Philip 2:5 “Brei diih mâo klei mĭn msĕ si Krist Yêsu mâo leh”. Čiăng kơ “mâo klei mĭn msĕ” hŏng Khua Yang brei hriăm thâo săng bi kjăp leh anăn êlam Klei Aê Diê Blŭ čiăng dưi mđrăm mbĭt hdĭp tui si klei Ñu bi hmô.
Tal dua, klei jing sa jing “klei khăp msĕ”, hlăm boh blŭ phŭn jing mâo mbĭt sa klei khăp. Atur tal dua kơ klei jing sa jing “klei bi mguôp hlăm mngăt myang” (êlan 1), tơdah phung đăo mâo mbĭt sa Yang Mngăt Jăk ăt srăng mâo mbĭt sa klei khăp mơh. Klei khăp ba klei jing sa amâo djŏ msĕ si klei khăp amâo kluôm ênŭm tui si mnuih ôh, ƀiădah jing klei khăp Aê Diê brei kơ anak mnuih hŏng klei bi mtlaih leh anăn mâo Yang Mngăt Jăk dôk mbĭt. “Klei khăp msĕ” wăt čiăng lač khăp kơ jih jang mnuih msĕ sơăi. Drei khăp kơ pô mkăn amâo djŏ kyua kơ drei pô ôh, ƀiădah kyua drei hơô knuih klei khăp mơ̆ng Aê Diê leh anăn “mâo klei mĭn msĕ” si Yang Krist.
Tal tlâo, klei jing sa jing “sa ai, sa klei mĭn”, djŏ guôp hŏng atur tal tlâo kơ klei jing sa jing klei hdĭp mngăt myang mlih mrâo. “Sa ai” jing klei jing sa kluôm jih knuih hlăm sa čô mnuih mrâo. Anei jing klei jing sa hlăm djăp kdriêk klei hdĭp mâo klei bi mlih mrâo. “Sa klei mĭn” jing klei kñăm čiăng msĕ, kyuanăn drei dưi lui hĕ ya mta klei mdê mdê.
Klei jing sa djŏ srăng ba boh tŭ dưn “bi ênŭm klei mơak”. Hŏng klei anăn Phung Sang Aê Diê dưi mâo klei rŭ mdơ̆ng mngăt myang, bi mđĭ ai hdơ̆ng găp găn klei lông dlăng leh anăn mâo klei mơak kluôm ênŭm. Blŭ mdê, klei jing sa amâo djŏ knŏng jing klei thâo săng ôh ƀiădah wăt klei ngă čiăng ba boh tŭ dưn kơ Phung Sang Aê Diê.
Si ngă drei dôk mđrăm mbĭt jing sa čiăng tui duah klei bi guh kơang kơ Aê Diê leh anăn bi mđĭ kyar Ƀuôn Jăk mơ̆?
Wah lač: Ơ Khua Yang, akâo Ih đru kâo grăp hruê dưi jing msĕ si Ih hĭn hlăm klei mĭn leh anăn klei ngă čiăng kơ kâo dưi mđrăm mbĭt hŏng ayŏng amai adei rŭ mdơ̆ng klei jing sa jăk siam hlăm Phung Sang Aê Diê leh anăn bi knal klei mơak kluôm ênŭm hlăm klei bi mguôp anei.
Dlăng Klei Aê Diê Blŭ hlăm tlâo thŭn: Klei Mmuñ Hđăp 59:1-17; 60:1-12
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
