Klei Aê Diê Blŭ: II Kôrantô 11:16-33
Êlan kliăng: “Ară anei kâo hơ̆k mơak hlăm klei knap mñai kâo tŭ kyua diih, leh anăn hlăm asei mlei kâo, kâo bi ênŭm ya klei knap mñai ăt kƀah hlăm klei knap mñai Krist tŭ leh kyua asei mlei Ñu, jing Phung Sang Aê Diê” (Kôlôs 1:24)
Klei êmuh ksiêm mĭn: Si Khua ƀĭng kna Y-Pôl lŏ wĭt lač kơ klei mčeh luar leh anăn hưn kơ pô mơ̆ng phung khua pô mtô soh? Ya ngă ñu lač snăn? Si klei drei tui hriăm Khua ƀĭng kna Y-Pôl hlăm klei mă bruă kơ Aê Diê?
Dŭm klei mčeh luar mơ̆ng phung khua pô mtô soh kơ Khua ƀĭng kna Y-Pôl jing mnêč čiăng mdlưh kơhưm gơ̆ čiăng bi mpŭ kơ diñu pô. Khua ƀĭng kna Y-Pôl lač bruă hưn pô amâo djŏ knŏng jing bruă ngă hlăm kđeh ôh ƀiădah hŏng ñu anăn jing klei mluk leh anăn “…amâo lač tui si klei dưi mơ̆ng Khua Yang ôh” (êlan 17-18). Ñu brei thâo tơdah phung khua mtô soh dưi hưn kơ pô kơ amĭ ama pô amâodah găp djuê mâo leh klei đăo snăn ñu ăt dưi mơh hưn kơ pô msĕ snăn. Tơdah diñu hưn kơ klei mă bruă kơ Aê Diê snăn blŭ hlue si klei phung mluk, ñu lŏ mă bruă lu hĭn (êlan 22-23a). Khua ƀĭng kna Y-Pôl yap kơ klei dleh dlan ñu găn leh, dŭm klei dleh dlan ñu klam leh hlăk êjai ba Klei Mrâo Mrang Jăk kơ phung ƀuôn sang ti êngao: giê hnuăt, krư̆ hlăm mnă, huĭ hyưt, arăng arưp klei hdĭp, ư̆ êpa, amâo djăp pĭt, amâo djăp čhum ao hơô… lŏ rŭng răng kơ klei đăo phung đăo ti jih jang Phung Sang Aê Diê (êlan 23b-29). Dŭm klei Khua ƀĭng kna Y-Pôl lač amâo djŏ hưn kơ pô ôh ƀiădah ñu lač hlue si klei blŭ phung khua pô mtô soh, anăn jing blŭ msĕ si phung mluk, boh blŭ “mluk” čiăng lač kơ klei mluk phung khua pô mtô soh. Wăt tơdah ya klei ñu blŭ jing sĭt ƀiădah tơdah čiăng bi mni kơ pô snăn ñu srăng bi mni kơ klei bi êdah êdu awăt pô (êlan 30).
Phung “mgưt” hlăm Phung Sang Aê Diê jing phung duah djăp mta hdră čiăng duah klei tŭ dưn kơ pô, klei hing ang kơ pô, diñu “jing phung mplư luar” ƀiădah “mgưt ngă phung đru bruă kpă ênô”. Knŏng phung dĭng buăl sĭt kơ Aê Diê kơh srăng mơak klam djăp klei dleh dlan čiăng ba Klei Mrâo Mrang Jăk kơ grăp čô mnuih, kyua klei khăp Krist bi mgei ai tiê (II Kôrantô 5:14).
Grăp čô đăo kơ Krist jing phung Ñu bi tui hŏng êrah Krist ti kyâo bi kal čiăng kơ drei mơ̆ng klei jing hlŭn yang jhat jing dĭng buăl Aê Diê. Klei Khua ƀĭng kna Y-Pôl čang hmăng jing klei mđĭ ai drei mă bruă kơ Khua Yang, srăng tŭ klei dleh dlan čiăng ba Klei Mrâo Mrang Jăk Aê Diê kơ grăp čô mnuih. Êlâo hĭn thâo luă gŭ, bi ti gŭ pô hrăm mbĭt mă bruă hlăm ai tiê jing dĭng buăl amâo djŏ ôh bi mni kơ pô, hưn ktưn amâodah ngă mnêč jhat bi mdlưh kơhưm hdơ̆ng pô.
Ya klei mđĭ ai drei srăng tŭ klei dleh dlan tơdah mă bruă kơ Krist?
Wah lač: Ơ Aê Diê! Bi mni kơ Ih kyua klei găl Ih brei leh anăn klei Ih khăp mgei ai tiê kâo čiăng kâo dưi đru hlăm bruă Ih. Akâo kơ Ih đru kâo tui hriăm klei bi hmô mơ̆ng Khua ƀĭng kna Y-Pôl srăng tŭ klei dleh dlan čiăng sĭt suôr, luă gŭ hlăm bruă hiu hưn Klei Mrâo Mrang Jăk.
Dlăng Klei Aê Diê Blŭ hlăm tlâo thŭn: Y-Luk 7:18-50
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
