II Kauleethaus 11:16-33
Nqe cim:
“Nimno kuv zoo siab raug kev txomnyem pab nej. Rau qhov kuv xav kom tej kev txomnyem uas Yexus Khetos raug pab nws lub cev tiav. Yexus Khetos lub cev yog cov neeg uas ntseeg Vajtswv” (Kaulauxais 1:24).
Lus nug rau sawvdaws xav:
– Timthawj Paulus teb cov xibhwb cuav tej lus thuam thiab khavtheeb zoo li cas?
– Vim li cas Paulus hais li ntawd?
– Peb kawm tau Timthawj Paulus tus qauv twg rau txojkev ua Vajtswv haujlwm?
Cov xibhwb cuav tej lus khavtheeb thiab hais tsis tseeb rau Timthawj Paulus yog lub siab phem ua kom Paulus poob suab npe kom lawv tau qhuas. Timthawj Paulus hais tias qhov uas khavtheeb tsis yog tes haujlwm sab nqaij tawv ua xwb, tiamsis los ntawm nws xav qhov ntawd yog ruam thiab “tsis yog tej uas peb tus Tswv Yexus kom kuv hais” (nqe 17-18). Paulus qhia paub, yog cov xibhwb cuav khav txog lawv tus kheej, haivneeg lossis cajces kev ntseeg ces Paulus kuj muaj chaw khav li ntawd thiab. Yog lawv khav hais tias lawv yog cov uas ua Yexus Khetos tes haujlwm ces yog hais raws li tus neeg ruam hais, Paulus tseem ua haujlwm khwv dua lawv (nqe 22-23a). Timthawj Paulus hais txog tej kev tsimtxom nws tiv dhau, tej kev txomnyem nws raug thaum mus qhia Txojmoo Zoo rau lwm haivneeg: raug nplawm, raug kaw, ntsib kev ploj kev tuag, tshaib nqhis, tsis tau chaw zoo pw, tsis muaj ris tsho hnav… los tseem txhawj txog kev loj hlob ntawm cov Pawg Ntseeg (nqe 23b-29). Tej uas Timthawj Paulus hais tsis yog khavtheeb, tiamsis nws hais zoo li cov xibhwb cuav hais, hais zoo li tus neeg ruam hais, lo lus “ruam” tseem muaj lub ntsiab hais tias “ vwm”, lub homphiaj yog rhuav cov xibhwb cuav txojkev ruam. Tej uas Paulus hais puavleej yog qhov tseeb tagnrho, tiamsis yog cia khav mas nws yuav khav qhov uas nws ua tsis tau, tsis yog khav tej uas nws ua tau (nqe 30).
Cov neeg “cuav” hauv Pawg Ntseeg yog cov uas nrhiav txhua lub tswvyim los ua kom lawv tau koob npe rau tus kheej, lawv “ua lawv tes haujlwm ntxias sawvdaws”, los tseem “ua txuj ua li lawv yog Yexus Khetos cov timthawj”. Tsuas yog Vajtswv tus thwjtim tiag thiaj txaus siab, zoo siab hlo tiv kev txomnyem qhia Txojmoo Zoo mus rau txhua tus neeg xwb, vim Yexus Khetos txojkev hlub ua tshoov kom lawv mus (II Kauleethaus 5:14).
Tus Tswv haivneeg txhua tus puavleej yog cov neeg uas tau tus Tswv txhiv los ntawm Yexus Khetos cov ntshav uas ntws saum ntoo khaublig, peb hloov lub meejmom ua tubqhe rau dab Ntxwgnyoog los ua tubqhe rau Vajtswv. Thov kom tej lus uas Timthawj Paulus hais no ua lub chaw txhawb peb kev ua Vajtswv tes haujlwm, txaus siab hlo tiv kev txomnyem mus qhia Txojmoo Zoo rau txhua tus. Tshwjxeeb tshaj yog paub txo hwjchim, ib leeg yoog ib leeg ua haujlwm li tubqhe tsis txhob khavtheeb khav txiv lossis siv tswvyim txo lwm tus.
Thov Vajtswv,
Vajtswv tus uas muaj kev hlub! Ua tsaug Koj pub nyuam yaus muaj feem ua Koj tes haujlwm. Thov Koj pab kom nyuam yaus kawm xyaum Timthawj Paulus tus qauv, txaus siab hlo tiv kev txomnyem, ncaj ncees, txo hwjchim qhia Txojmoo Zoo. Amees.
Qhov keebtiv twg ua rau peb txaus siab hlo ua Yexus Khetos tes haujlwm?
Nyeem Vajluskub hauv peb lub xyoo: Lukas 7:18-50
Kênh Youtube BHKTHN:
