Êphêsô 2:11-18
“Kiơ̆ kơ tơdrong juăt sơ̆, dôm tơdrong rơgoh, tă rơgoh yua kơ pham. Tơ̆ng ưh kơ huach pham, ưh kơ gơh klaih đơ̆ng tơdrong yoch ôh.” (Hêbrơ 9:22)
Nơ̆r jet tơchĕng pơwao:
- Kră Yang Yêsu đei pơm tơdrong kiơ ăn kơ lu bơngai Israel hăm bơngai tơmoi ‘nguaih wă kơ gơh tơ’bưh hiôk mă Kră Yang ‘Bok Kei-Dei?
- Tơdrong ‘mêm păng tơdrong ‘lơ̆ng tơpăt đei tơ’bôh ‘bơ̆t ‘long pơglang thoi yơ?
- Yua kơ đơ̆ng ‘long pơglang Kră Yang na bơ̆n đei yua iŏk tơdrong kiơ?
Pôl đei chih kơthơ ăn kơ khŭl bơngai lui tơ pơlei Êphêsô lu sư lơ mă bơngai tơmoi. Lu sư pŭ iŏk tơdrong đơ̆ng lu bơngai Israel lăng ưh kơ rơ-a păng khan kơ lu sư “lu bơngai mă ưh kơ kăt tơdra akar’. Kơplah ‘Bok Krist ưh tam mă jur, lu sư “ưh kơ đei gơh jô̆ hơdai hăm bơngai Israel, kư̆m ưh kơ đei nơ̆r pơkă ăn kơ lu sư wă kơ đei dŏng pơklaih, păng lăm teh đak ưh kơ đei tơdrong chang sơmĕng yua kơ ưh kơ đei ‘Bok Kei-Dei”. Wă kơ tơ’bưh hiôk hăm Kră Yang ‘Bok Kei-Dei lei Kră Yang khŏm athei đei bơngai chu lôch tơplih, na bơngai mă chu lôch ‘noh kăl kơ ‘lơ̆ng rơgoh tôm tơdrong kiơ̆ thoi ‘Bok Kei-Dei wă ‘mơ̆i na gơh pơklaih tơdrong yoch (Hêbrơ 9:22). Kră Yang Yêsu đei pơm pơkeh ‘bar tơdrong ‘noh, kơ lu bơngai Israel păng lu bơngai tơmoi (trong 13). “Yêsu Krist ưh kơ đei tơdrong yoch kiơ, mă-lei ‘Bok Kei-Dei athei Sư pŭ tơdrong yoch bơ̆n. Thoi noh na bơ̆n athei gơnang kơ Yêsu, na ‘Bok Kei-Dei jô̆ kơ bơ̆n bơngai ‘lơ̆ng hăm Sư.” (II Kôrintô 5:21)
Kơpal ‘long pơglang, tơdrong ‘lơ̆ng tơpăt păng ‘lơ̆ng rơgoh Kră Yang ‘Bok Kei-Dei đei pơm keh yua kơ minh ‘nu bơngai mă arih pơm keh tôm kơ tơdrong Juăt noh jơ̆ Kră Yang Yêsu. Sư đei dŏng pơklaih keh đang kơ kon bơngai hlôi đơ̆ng Tơdrong Juăt đei jô̆ kon bơngai khan yoch “tơdrong Khôi Juăt đei chih tơblang thim lơ tơdrong juăt wă kơ hlôh”. A-nih ‘noh kư̆m tơ’bôh ăn kơ tơdrong ‘mêm Kră Yang hăm tơdrong pơm ‘bôh tơpă: “Na kơplah bơ̆n oei pơm yoch, lăp minh ‘nu Yêsu Krist đĕch lôch tang bơ̆n. ‘Noh boih bơ̆n băt kơ ‘Bok Kei-Dei ‘mêm kơ kon bơngai bơ̆n tơpă. ‘(Rôm 5:8), bơ̆t ‘long pơglang ưh kơ trŏ kơ tơdrong thuơ răm băm thoi lu bơngai ala teh âu tơchĕng ôh, mă lei tơdrong ‘lơ̆ng tơpăt hăm tơdrong ‘mêm mơnat wang tơ’bôh hơdai ba ăn tơdrong rơđah hơđăl kơ tơdrong gơh hơgei tih păng tơdrong mơsêh tih mă ưh kơ đei bu nai gơh pơting lăm Tơdrong ‘Nao ‘Lơ̆ng dŏng pơklaih!
Kră Yang Yêsu đei chu lôch wă pơrăm lê̆ tơdrong tơnăr mă pơgăn bơ̆n hăm ‘Bok Kei-Dei wă kơ bơ̆n gơh hyôk ‘lơ̆ng hăm ‘Bok Kei-Dei păng hiôk hơ iă dih băl tơduă kon bơngai, gơh hơdai kơ kuh kơ Kră Yang ‘Bă (trong 14-18). Pơma pha ra, yua kơ ‘long pơglang na đĭ đăng kon bơngai, mă khan bơngai Israel, bơngai tơmoi păng lu bơ̆n dang ei gơh hiôk tơ’bưh hăm ‘Bok Kei-Dei păng đơ̆ng tơdrong noh ba ăn tơdrong hiôk hơ iă dih băl lu bơ̆n. ‘Nâu ưh kơ trŏ hiôk hơ iă thoi kon bơngai hlôh ôh, ‘nâu tơdrong hiôk hơ iă ‘nâu lăm Yang Bơhngol ‘Lơ̆ng, “yua kơ Sư lôch tang bơ̆n tơ ‘long pơglang ăn đĭ-đăng kơ bơ̆n mă bơngai Juđê, mă bơngai nai gơh hiôk hăm ‘Bok Kei-Dei boih. Bơ̆n dang minh akâu đĕch ưh pă layơ wă tơklah băl dơ̆ng.” (Êphêsô 2:16). ‘Long pơglang Kră Yang Yêsu Krist pơm keh đang tơdrong ‘lơ̆ng tơpăt ‘Bok Kei-Dei păng ba ăn kơ đĭ đăng lu kon Sư wang hơdai kơ kuh ưh kơ đei pơdê kơ bơngai bu. Yua kơ, “Yua kơ Sư boih na đĭ-đăng kơ bơ̆n mă bơngai Juđê, mă bơngai nai băt gơnang kơ Yang Bơhngol ‘Lơ̆ng anhăk ba bơ̆n truh tơ ‘Bă bơ̆n ‘Bok Kei-Dei.” (trong 18).
Kơkuh kơ Yang ‘Bă mă ‘lơ̆ng tơpăt, Inh bơnê kơ Kră Yang Yêsu đei tuh pham tơ ‘long pơglang wă kơ inh gơh hiôk hơiă dơ̆ng hăm Ih, Apinh Ih ăn kơ inh đei jơhngơ̆m hiôk hơiă, păng minh jơ-hngơ̆m đon dih băl lăm Yang Bơhngol ‘Lơ̆ng wă kơ wang hơdai kơ kuh kơ Kră Yang păng arih yua kơ Ih. Yua anăn Kră Yang Yêsu Krist. Amen
Lu bơ̆n pơm thoi yơ wă tơ’bôh ăn jơ-hngơ̆m băt bơnê kơ tơdrong Kră Yang chu lôch tơ ‘long pơglang yua kơ tơdrong yoch lu bơ̆n?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Đaniel 9.
Kênh Youtube BHKTHN:
