Klei Aê Diê Blŭ: Êphêsô 2:11-18
Êlan kliăng: “Sĭt nik tui si klei bhiăn păt čiăng jih jang mnơ̆ng arăng bi doh hŏng êrah, leh anăn tơdah amâo mâo ôh êrah tuh, amâo mâo klei pap brei kơ klei soh ôh” (Hêbrơ 9:22)
Klei êmuh ksiêm mĭn: Ya bruă Khua Yang Yêsu ngă leh, čiăng kơ wăt phung Yuđa leh anăn phung tue dưi mâo klei bi grăng hŏng Aê Diê kpă ênô? Si klei kpă ênô leh anăn klei khăp Khua Yang bi êdah ti dlông kyâo bi kal? Ya klei drei mă tŭ mơ̆ng kyâo bi kal Khua Yang?
Khua ƀĭng kna Y-Pôl čih hră mơĭt kơ phung đăo ti ƀuôn Êphêsô mâo mbĭt hŏng lu phung ƀuôn sang tue. Digơ̆ dôk tŭ klei phung Yuđa dlăng hơăi mang leh anăn mưč, pia kơ digơ̆ “phung amâo khăt klĭt ôh”. Hlăk Yang Krist ka hriê, digơ̆ “amâo mâo klei dưi jing phung ƀuôn sang Israel, jing phung tue kơ klei bi mguôp brei klei ƀuăn, hdĭp ti lăn ala amâo mâo klei čang hmăng leh anăn amâo mâo Aê Diê ôh”. Čiăng dưi lŏ mâo klei bi grăng hŏng Aê Diê kpă ênô, Khua Yang čoh čuăn brei mâo klei săn asei mlei, klei tuh êrah mơ̆ng mnơ̆ng myơr ngă yang doh jăk kluôm dhuôm kơh dưi mâo klei pap brei klei soh (Hêbrơ 9:22). Khua Yang Yêsu ngă bi ênŭm leh bruă anăn kơ jih dua phung, kơ phung ƀuôn sang Yuđa leh anăn wăt kơ phung ƀuôn sang tue (êlan 13). “Krist amâo tuôm mâo klei soh ôh, ƀiădah Aê Diê mjing Gơ̆ soh kyua drei, čiăng kơ hlăm Gơ̆ drei dưi mâo klei kpă ênô Aê Diê” (II Kôrantô 5:21).
Ti dlông kyâo bi kal, klei kpă ênô leh anăn klei doh jăk Aê Diê dưi wĭt lač leh kyua mơ̆ng sa čô dôk hdĭp kluôm ênŭm tui si klei bhiăn, jing Khua Yang Yêsu. Ñu bi leh ênŭm jih bruă bi mtlaih phung mnuih mơ̆ng klei phat kđi tui si “klei bhiăn leh anăn klei mtă”. Klei anăn ăt jing anôk klei khăp Khua Yang bi êdah hŏng bruă ngă sĭt êmĭt: “Ƀiădah Aê Diê bi êdah klei Ñu khăp kơ drei snei, êjai drei ăt jing mnuih soh Krist djiê kyua drei.” (Rôm 5:8). Anôk kyâo bi kal amâo djŏ jing anôk dlưh lĕ tui si mnuih lăn ala mĭn ôh, ƀiădah jing anôk klei kpă ênô wăt klei khăp Aê Diê bi êdah hrăm mbĭt, brei ƀuh klei thâo mĭn leh anăn klei ktang myang amâo mâo knhal mơ̆ng Klei Mrâo Mrang Jăk Klei Bi Mtlaih!
Khua Yang Yêsu săn asei mlei leh čiăng bi klưh mnư̆ klei bi roh, čiăng kơ jih dua phung dưi mâo klei bi grăng hŏng Aê Diê leh anăn bi grăng hdơ̆ng pô, hrăm mbĭt kkuh mpŭ kơ Aê Diê Ama (êlan 14-18). Blŭ mdê, kyua hŏng kyâo bi kal yơh jih jang phung mnuih, hlăm anăn mâo phung Yuđa, phung tue leh anăn wăt phung drei hruê anei dưi lŏ bi grăng hŏng Aê Diê, leh anăn mơ̆ng anăn yơh ba klei bi grăng kơ hdơ̆ng drei. Anei amâo djŏ jing klei bi grăng tui si klei mĭn anak mnuih ôh, ƀiădah jing klei bi mguôp hlăm sa Yang Mngăt Jăk, “leh anăn dưi bi grăng jih dua phung drei hŏng Aê Diê hlăm sa asei mlei kyua kyâo bi kal. Hŏng klei anăn Ñu bi luč hĕ klei bi roh” (êlan 16). Kyâo bi kal Yang Krist bi leh ênŭm bruă klei kpă ênô Khua Yang leh anăn ba jih jang phung anak ƀuôn sang Ñu hrăm mbĭt kkuh mpŭ kơ Aê Diê, amâo lŏ mâo klei dlăng mdê mdê ôh. “Kyuadah hlăm Ñu jih dua phung drei dưi nao truh kơ Ama hlăm sa Yang Mngăt Jăk” (êlan 18).
Ya klei brei drei ngă čiăng bi êdah klei thâo hdơr knga kơ klei Khua Yang săn asei mlei ti kyâo bi kal?
Wah lač: Ơ Ama Kpă Ênô, bi mni lač jăk kơ Khua Yang Yêsu tuh leh êrah ti kyâo bi kal čiăng kơ kâo dưi lŏ bi grăng hŏng Ama! Akâo Khua Yang đru kâo bi grăng, bi mguôp sa ai hdơ̆ng pô hlăm Yang Mngăt Jăk, čiăng hrăm mbĭt kkuh mpŭ kơ Khua Yang leh anăn dôk hdĭp kơ Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Đaniel 9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
