Klei Aê Diê Blŭ: Klei Kbiă 34:1-4
Êlan kliăng: “Snăn Y‑Môis krah dua pŏk mdhă boh tâo msĕ si mdhă tal êlâo. Ñu kgŭ ưm aguah leh anăn đĭ nao čư̆ Sinai, tui si klei Yêhôwa mtă leh kơ ñu, leh anăn djă dua pŏk mdhă boh tâo” (Klei Kbiă 34:4)
Klei êmuh ksiêm mĭn: Si klei msĕ leh anăn klei mdê dua pŏk mdhă boh tâo klei bhiăn tal anei hŏng dua boh mdhă boh tâo Y‑Môis bi mčah leh? Si hnơ̆ng yuôm bhăn dua pŏk mdhă boh tâo klei bhiăn Aê Diê? Ya klei hriăm drei mâo kơ hnơ̆ng yuôm bhăn mơ̆ng Klei Aê Diê Blŭ mơ̆ng klei hriăm hruê anei?
Drei ƀuh boh phŭn dưi čih hlăm dua pŏk mdhă Y‑Môis bi mčah leh hŏng tal anei msĕ sơăi, kyua kngan Yêhôwa čih ti čŏng čư̆ Sinai (êlan 1-2). Klei mdê jing dua pŏk mdhă boh tâo klei bhiăn Y‑Môis bi mčah leh jing mnơ̆ng Aê Diê brei (Klei Kbiă 24:12, 31:18), bi dua pŏk mdhă boh tâo klei bhiăn lŏ dưi mkra mrâo jing Y‑Môis pô krah, ba ti čư̆ Sinai kơ Aê Diê čih (êlan 4).
Y‑Môis ngêñ bi mčah dua pŏk mdhă boh tâo klei bhiăn Aê Diê leh ñu ƀuh phung ƀuôn sang Aê Diê kkuh kơ êđai êmô mah, wăt tơdah anei jing klei ngêñ kpă ênô, ƀiădah Aê Diê čiăng kơ Y‑Môis hriăm klei hriăm kơ boh jhat mơ̆ng klei amâo dưi mkhư̆ klei ngêñ. Bruă lŏ mkra wĭt dua pŏk mdhă boh tâo klei bhiăn mâo lu klei kpĭ leh anăn dleh dlan snăk. Y‑Môis knŏng mâo sa hruê krah dua pŏk mdhă boh tâo leh anăn aguah ưm hruê êdei ba dua pŏk mdhă boh tâo mơ̆ng wăl sang čhiăm đĭ ti čŏng čư̆ Sinai dlông 2.285 met, ktuê êlan ñu đĭ čư̆ sui leh anăn suăi êmăn snăk. Tal êlâo, ñu mâo Y‑Yôsuê nao mbĭt sa kdrêč êlan čiăng đru, ƀiădah tal anei Y‑Môis čŏng nao hjăn pô (êlan 3). Sĭt đĭ ai ngêñ, lu mnuih biêng mčah lu mta mnơ̆ng, leh anăn diñu lŏ suăi êmăn mă bruă čiăng lŏ blei. Kjham hĭn jing klei blŭ hlăk ai ngêñ ngă bi êka ai tiê găp djuê, ƀĭng găp amâodah phung mă bruă mbĭt, leh anăn klei anei dleh snăk amâodah amâo dưi lŏ bi mguôp msĕ si hđăp ôh. Klei Aê Diê Blŭ mtô: “Ơ phung ayŏng adei kâo khăp, brei diih thâo klei anei: brei jih jang mnuih djăl hmư̆, amâo ruăt blŭ, amâo djăl ăl” (Y‑Yakơ 1:19). “Hlei pô amâo djăl ăl jing jăk hĭn kơ sa čô jhŏng ktang, leh anăn hlei pô kiă kriê ai tiê ñu pô jing jăk hĭn kơ sa čô dưi mă sa boh ƀuôn prŏng” (Klei Bi Hriêng 16:32).
Dua pŏk mdhă boh tâo klei bhiăn yuôm bhăn snăk kyua jing “Pluh Mta klei Bhiăn” dưi ktur dlông anăn. Êngao anăn, lŏ jing yuôm bhăn msĕ si tal êlâo kyua kngan Aê Diê pô čih leh. Jih jang klei bhiăn leh anăn klei hưn êlâo mơ̆ng phung ƀuôn sang Israel mơ̆ng tur knơ̆ng Pluh Mta Klei Bhiăn Aê Diê brei sơăi. Mơ̆ng anăn Klei Aê Diê Blŭ dưi čih kơ anak mnuih. Hlăm bruă lŏ tui čih Klei Aê Diê Blŭ hlăm klĭt amâodah mơar êdei anei, pô lŏ tui čih Klei Aê Diê Blŭ brei jih ai tiê răng, ksiêm dlăng wĭt lu blư̆ čiăng đăm čih soh amâodah kƀah. Hdruôm Hră Klei Aê Diê Blŭ jing Klei Blŭ Aê Diê brei phung ƀuôn sang Ñu mpŭ, răng kriê leh anăn hlue ngă bi jăk mơ̆ng ênuk anei truh ênuk êdei.
Drei knang kơ klei pap Aê Diê čiăng mkhư̆ klei ngêñ mơ̆?
Wah lač: Ơ Aê Diê, akâo kơ Ih đru kâo thâo mpŭ, tui hriăm leh anăn hlue ngă Klei Aê Diê Blŭ mtô. Akâo kơ Aê Diê bi hơô kâo klei khăp, klei êdu êun leh anăn klei thâo gĭr Ih čiăng kâo dưi mkhư̆ bruă ngă leh anăn klei blŭ kƀah thâo mĭn sĭt đĭ ai ngêñ.
Dlăng Klei Aê Diê Blŭ hlăm tlâo thŭn: Y‑Yêrêmi 49:23-39
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
