Daniyees 4:29-37
29 Tom qab ntawd kaum ob lub hlis, muaj ib hnub vajntxwv ncig mus ncig los saum nws lub tsev uas nyob hauv lub nroog Npanpiloos. 30 Vajntxwv hais tias, “Lub nroog Npanpiloos no yog lub nroog uas loj kawg Kuv tsim lub nroog no ua kuv lub tuamceeb nroog kom sawvdaws thiaj pom kuv lub hwjchim, kuv lub meejmom thiab kuv lub koob lub npe.”
31 Thaum vajntxwv tseem hais lus tsis tau xaus, txawm muaj ib lub suab hais nrov ntxhe ntws saum ntuj tuaj hais tias, “Vajntxwv Nenpukajnexales, koj cia li mloog kuv hais! Kuv twb txo koj lub hwjchim, koj yuav tsis tau ua vajntxwv kav tebchaws lawm. 32 Luag yuav muab koj ntiab tawm tsis pub koj nrog neeg nyob, koj yuav mus nrog tej tsiaj nruab nrag nyob ua ke, koj yuav noj zaub ib yam li tej nyuj mus txog xya xyoo. Tom qab ntawd koj yuav lees hais tias Vajtswv tus uas muaj Hwjchim Loj kawg nkaus yog tus kav tej tebchaws uas sawv vajntxwv kav, thiab Vajtswv tsa neeg ua vajntxwv raws li nws pom zoo.”
33 Tamsim ntawd txawm muaj raws tej lus no. Luag cia li muab Vajntxwv Nenpukajnexales ntiab khiav tsis pub nws nrog neeg nyob thiab nws mus noj zaub li nyuj noj. Nws lub cev ntub lwg ntsuav, nws cov plaubhau ntev ib yam li tis dav, thiab nws cov rau tes ntev ib yam li tej rau noog. 34 Vajntxwv hais tias, “Thaum dhau xya lub xyoo lawm, kuv tsa qhovmuag ntsia saum ntuj. Kuv rov feebmeej, kuv thiaj ua tus Vajtswv uas muaj fwjchim Loj kawg nkaus tsaug. Kuv qhuas thiab ua rau tus Vajtswv uas muaj sia nyob mus ibtxhis tau koob meej. “Vajtswv yuav kav mus ibtxhis, thiab nws lub tebchaws yuav nyob ruaj nrees mus tsis paub kawg. 35 Nws suav hais tias neeg ntiajteb tsis tseemceeb dabtsi; cov timtswv saum ntuj thiab neeg ntiajteb puavleej nyob hauv nws lub xibteg. Tsis muaj leejtwg muaj cuabkav cheem tau tsis pub nws ua raws li nws lub siab nyiam lossis nug hais tias nws ua dabtsi.
36 “Thaum kuv feebmeej lawm kuv rov tau koob meej, tau meejmom thiab rov tau kav lub tebchaws dua. Kuv cov nomtswv thiab kuv cov tubtxib puavleej zoo siab rov qab yuav kuv. Kuv rov tau ntsejmuag thiab muaj hwjchim heev dua yav tas los. 37 “Nimno kuv uas yog Nenpukajnexales thov qhuas, thov hawm thiab ua rau tus Vajntxwv uas nyob saum Ntuj tau koob meej. Ib puas tsav yam uas Vajtswv ua puavleej yog thiab ncaj ncees, thiab nws ua tau rau cov neeg khavtheeb poob ntsejmuag.”
Nqi cim:
“Nimno kuv uas yog Nenpukajnexales thov qhuas, thov hawm thiab ua rau tus Vajntxwv uas nyob saum Ntuj tau koob meej. Ib puas tsav yam uas Vajtswv ua puavleej yog thiab ncaj ncees, thiab nws ua tau rau cov neeg khavtheeb poob ntsejmuag.” (Daniyees 4:37).
Lus nug rau sawvdaws xav:
- Tomqab uas vajntxwv Nenpukajnexales raug ntiab tawm tsis pub nrog neeg nyob, muaj dabtsi tshwmsim los rau nws?
- Thaum ntawd, nws tau siv tej npe, tej lus twg coj los hais txog Vajtswv? – Raws li koj tus kheej, Vajtswv yog leejtwg tus Tswv?
Los ntawm qhov uas ntau zaus pom tej xwm tshwm tuaj rau Daniyees thiab nws cov phoojywg, ua rau vajntxwv Nenpukajnexales lees paub hais tias lawv tus Vajtswv yog “tus uas muaj fwjchim loj dua tej vajtswv, nws yog tus TSWV uas kav tagnrho tej vajntxwv”, yog tus qhia tej uas neeg tsis paub rau nws cov tubtxib (Daniyees 2:46-47), yog tus uas cawm nws cov tubtxib dim (Daniyees 3:28). Tsis tas li ntawd xwb, hauv ntu Vajluskub hnub no, peb pom hais tias vajntxwv Nenpukajnexales tau rhais ib kauj ruam ntxiv nyob hauv kev zeem paub Vajtswv.
Tomqab uas ua tiav ntau tes haujlwm, lub tebchaws muaj kev thajyeeb thiab vammeej. Vajtswv tau ceebtoom hauv zaj npau suav kom vajntxwv tsis txhob khav theeb, tiamsis thaum vajntxwv mus ncig saum nws lub tsev nyob hauv nroog Npanploos, vajntxwv kov tsis yeej nws lub siab uas khav theeb. Vajntxwv hais tias: “Lub nroog Npanpiloos no yog lub nroog uas loj kawg kuv tsim lub nroog no ua kuv lub tuamceeb nroog kom sawvdaws thiaj pom kuv lub fwjchim, kuv lub meejmom thiab kuv lub koob lub npe?” (nqi 30). Vajntxwv Nenpukajnexales tsis saib pom Vajtswv yog Vajntxwv ntawm txhua tus vajntxwv lawm, nws tsuas pom “kuv” thiab “kuv”, tsuas pom hais tias nws yog tus vajntxwv uas loj dua ntais xwb. Tamsim ntawd txawm muaj raws li Vajtswv tej lus ceebtoom pub rau vajntxwv: nws raug ntiab tawm tsis pub nrog neeg nyob (nqi 32). Tiamsis thaum dhau lub sijhawm ntawd, nws tau Vajtswv pub rov feebmeej dua (nqi 34). Thaum ntawd yog thawj zaug uas vajntxwv lees paub hais tias “neeg ntiajteb” tsis hais nws thiab lwm tus, puavleej “tsis tseemceeb dabtsi” (nqi 35). Thiab kuj yog thawj zaug uas vajntxwv rov feebmeej los piav txog tej uas Vajtswv tau ua pub rau nws. Vajntxwv cov nomtswv uas yog neeg Henpais tus Vajtswv nimno tsis yog lawv tug lawm xwb. Nws yog tus “Vajntxwv uas nyob saum Ntuj” (nqi 37). Ntawm no tsis yog thawj zaug uas Nenpukajnexales hu Vajtswv hu ua Vajntxwv (saib Daniyees 2:47), tiamsis zaum no tej zaum yog thawj zaug uas vajntxwv lees paub hais tias Vajtswv yog tus Vajntxwv ntawm tej vajntxwv, kuj yog tus Vajntxwv kav nws huv tibsi.
Peb pheej hu zaj nkauj hais tias, “Tus Tswv, uas kuv xav tau, thaum quaj thaum luag. Lubneej yog tsis muaj Koj, yuav puas, yuav ntsoog”, tiamsis qhov tseeb nyob rau hauv peb lubneej, thaum muaj kev nyuaj siab lossis kev zoo siab puas muaj Vajtswv nrog nyob qhov ntawd? Peb pheej hu zaj nkauj hais tias, “Vajtswv tus muaj fwjchim ua ib puas yamtsav”, tiamsis thaum Vajtswv lub fwjchim los kav, peb pheej xav dabtsi thiab ua li cas? Qhov tseemceeb ntawm kev zeem paub Vajtswv tsis yog los ntawm lub ncauj hais xwb tiamsis yuavtsum cia peb tus Vajntxwv yog tus uas muaj nyob hauv peb tej kev txiavtxim siab, tej kev xaiv hauv txhua txoj haujlwm uas peb yuav ua hauv lubneej txhua hnub.
Puas muaj tej zaum uas peb raug teebmeem vim peb tej kev khavtheeb tau txais? Tej teebmeem ntawd puas qhia rau koj paub yam dabtsi txog Vajtswv?
Thov Vajtswv:
Tus Tsvw, thov Koj pab nyuamyaus txo fwjchim zeem paub nyuamyaus tus kheej “tsis tseemceeb dabtsi”, tiamsis thaum muaj Koj, nyuamyaus “ua tau txhua yam”. Thov pab nyuamyaus niaj hnub cia siab rau Koj thiab ua rau Koj, tus uas yog nyuamyaus tus Vajntxwv tau ntsej muag. Ameeg.
Email: kawmvajluskubtxhuahnub@gmail.com
Kênh Youtube BHKTHN:
