Klei Aê Diê Blŭ: Y‑Đaniel 4:29-37
Êlan kliăng: “Ară anei, kâo gơ̆ Y‑Nebukatnetsar bi mni, mpŭ, leh anăn mpŭ mni kơ Mtao hlăm adiê; kyuadah jih bruă ñu jing sĭt leh anăn êlan ñu kpă; leh anăn hlei pô êbat hlăm klei mgao ñu dưi bi mdlưh hĕ” (Y‑Đaniel 4:37).
Klei êmuh ksiêm mĭn: Leh êgao dŭm hruê arăng suôt đuĕ mơ̆ng phung mnuih, ya klei truh kơ mtao Y-Nebukatnetsar? Hlăk anăn ya boh blŭ ñu yua čiăng lač kơ Aê Diê? Bi hŏng diih, Aê Diê jing Khua Yang kơ hlei pô?
Găn lu blư̆ ƀuh klă klei truh kơ khua pô hưn êlâo Y‑Đaniel mbĭt hŏng phung ƀĭng găp ñu, mtao Y-Nebukatnetsar thâo kral leh Aê Diê diñu jing “Aê Diê kơ phung yang, Khua Yang kơ phung mtao”, jing Pô bi êdah klei hgăm kơ dĭng buăl Ñu (Y‑Đaniel 2:46-47), jing Pô bi mtlaih dĭng buăl Ñu (Y‑Đaniel 3:28). Ƀiădah, mơ̆ng trăn Klei Aê Diê Blŭ hruê anei, drei ƀuh mtao Y- Nebukatnetsar đĭ hĭn leh sa knhuang hlăm klei thâo kral Aê Diê.
Leh mâo klei dưi hing ang, kluôm jih čar mâo klei êđăp ênang leh anăn đĭ kyar, leh anăn khădah hŏng klei êpei Aê Diê hưn êlâo brei răng đăm mgao ôh, ƀiădah êjai hjăn ñu êbat hlăm sang mtao kdrưh kơang, mtao Y‑ Nebukatnetsar amâo dưi ôh bi blah hŏng klei mgao ñu pô: “Amâo djŏ hĕ anei ƀuôn Ƀaƀilôn prŏng kâo pô mdơ̆ng leh hŏng klei ktang kâo, jing sang mtao dôk, hŏng klei guh kơang kơ kdrăm kâo?” (êlan 30). Mtao amâo lŏ ƀuh ôh Aê Diê jing mtao kơ jih jang mtao, ƀiădah knŏng thâo ƀuh “kâo” leh anăn “kâo”, knŏng ƀuh pô yơh jing mtao ti dlông hĭn. Snăn yơh jih jang klei Aê Diê hưn êlâo kơ mtao brei răng truh sĭt: arăng suôt ñu đuĕ mơ̆ng ti krah phung mnuih (êlan 32). Ƀiădah leh jih hruê bi kčah, Aê Diê lŏ brei ñu dưi wĭt jing msĕ êlâo (êlan 34). Tal êlâo hĭn, ñu thâo kral “Jih jang mnuih ti lăn ala”, mbĭt hŏng ñu pô, jing êdu awăt leh anăn amâo mâo klei ktang ôh, “jing msĕ si hơăi mang” (êlan 35) . Tal êlâo hĭn ñu thâo kral leh anăn lŏ yăl dliê jih klei Aê Diê ngă leh kơ ñu pô. Aê Diê kơ phung dĭng ktang mnuih Hêbrơ ară anei amâo djŏ knŏng pioh hjăn kơ diñu ôh. Ñu jing “Mtao hlăm adiê” (êlan 37). Anei amâo djŏ jing tal êlâo hĭn ôh ñu lač kơ Khua Yang jing Mtao (dlăng Y-Đaniêl 2:47), ƀiădah năng ai anei jing tal êlâo hĭn ñu thâo kral sĭt Aê Diê jing Mtao kơ jih jang mtao, amâo êngao kơ ñu ôh.
Drei khăng mmuñ, “Ơ Khua Yang, Pô kâo čiăng mâo nanao, êjai mơak amâodah ênguôt. Klei hdĭp kâo tơdah dôk ti êngao Ih, jing jhat ƀai, mtŭk mtŭl”, ƀiădah hlăm klei hdĭp sĭt, jih jang klei ênguôt klei mơak hlăm klei hdĭp drei mâo Khua Yang mbĭt mơ̆? Drei khăng mmuñ, “Klei guh kơang hlŏng lar knŏng pioh hjăn kơ Aê Diê Doh Jăk”, ƀiădah hlăk mâo klei hing ang truh, ya klei drei khăng mĭn leh anăn ngă? Klei yuôm hĭn hlăm klei thâo kral Khua Yang amâo djăp ôh knŏng ti ƀăng kƀông ƀiădah brei Mtao drei jing Pô mâo klei dưi sĭt hlăm klei hrŏng ruah grăp mta bruă hlăm klei hdĭp drei grăp hruê.
Tuôm mâo leh mơ̆ đa blư̆ drei dlưh lĕ kjham kjhuê̆ kyuadah mgao pah đah da hưn ktưn kơ pô? Ya klei mtô diih thâo kral Khua Yang mơ̆ng klei dlưh lĕ anăn?
Wah lač: Ơ Khua Yang, akâo kơ Ih đru kâo luă gŭ thâo kral kơ kâo pô jing “êdu awăt, ƀun bin, bum ală” ƀiădah mâo Ih, kâo “dưi ngă jih jang klei”, čiăng kơ kâo knang kơ Ih nanao leh anăn myơr klei guh kơang năng kơ Ih, Mtao kơ klei hdĭp kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Bruă Mtao 9:30 – 10: 17
Kênh Youtube BHKTHN:
