Chivkeeb 3:6-8
Nqe cim:
“Tus pojniam pom hais tias, tsob ntoo ntawd zoo nkauj thiab tej txiv ntxim qab kawg li, tsis yog li ntawd xwb, nws xav hais tias tej txiv ntoo ntawd tseem yuav ua rau nws muaj tswvyim thiab. Ces nws txawm cev tes mus de cov txiv los noj. Nws muab rau nws tus txiv noj thiab” (Chivkeeb 3:6)
Lus nug xav:
– Thaum raug dab ntxwgnyoog dag ntxias, tibneeg ua zoo li cas?
– Tomqab uas nkawd noj “txiv txwv”, yam dabtsi tshwmsim?
– Peb kawm tau dabtsi hais txog qhov keebtiv tibneeg kov tsis yeej kev dag ntxias?
Thaum raug dab ntxwgnyoog dag ntxias ntsig txog tsob txiv uas Vajtswv txwv noj, “Tus pojniam pom hais tias, tsob ntoo ntawd zoo nkauj thiab tej txiv ntxim qab kawg li, tsis yog li ntawd xwb, nws xav hais tias tej txiv ntoo ntawd tseem yuav ua rau nws muaj tswvyim thiab” (nqe 6a).
Nyob rau lub sijhawm ntawd, Evas tsuas ntshaw kom tau noj lub txiv ntxim qab ntawd, thiab xav kom muaj tswvyim thaum noj lub txiv ntawd thiaj paub txhij txhua. Yog li Evas thiaj ua raws li nws xav: “cev tes mus de cov txiv los noj. Nws muab rau nws tus txiv noj thiab” (nqe 6b). Yog li ntawd, Evas thiaj raug dab ntxwgnyoog ntxias tau mus ua txhaum. Adas nyob ntawm nws tus pojniam ib sab, twb tsimnyog ua thawj qhia tsevneeg, hais kom tsis txhob ua thiab qhia pojniam ua li Vajtswv siab nyiam, los Adas cia li mloog pojniam lus ua txhaum thiab.
Tom qab uas nkawd noj txiv txwv tas, “nkawd txawm pom tseeb thiab paub hais tias nkawd liabqab” (nqe 7). Ua ntej ua txhaum, nkawd liabqab tiamsis tsis txajmuag vim nkawd dawbhuv, tsis ua txhaum yog li tsis muaj dabtsi phem. Tiamsis thaum ua txhaum lawm, nkawd ntsia tus kheej txawv lawm. Ntsia qhov twg los kuj pom kev tsis zoo thiab yuav tsum nrhiav dabtsi los npog yus, ntshai lwm tus pom yus tus neeg tseeb. Twb tsimnyog nyob hauv Vajtswv qhov kev zoo, los nimno tibneeg tsuas pom tsis zoo thiab txhawj ntshai. Tsis yog ntshai thaum ntsia tus kheej xwb, nkawd kuj ntshai thaum ntsib Vajtswv thiab. Twb tsimnyog nyob hauv txojkev nrog tus Tswv sib raug zoo, los nimno hnov tus Tswv lub suab, nkawd nrhiav kev nkaum (nqe 8). Lub siab muaj kev txhaum ua rau nkawd sawv tsis taus tabmeeg Vajtswv xubntiag.
Qhov uas Adas thiab Evas kov tsis yeej kev dag ntxias ceebtoom rau peb paub tias lub neej nrog tus Tswv mus, tej kev dag ntxias hauv lub ntiajteb no puavleej ntxias kom lub siab ntshaw. Yog peb tsis pom tias txojkev sib raug zoo nrog tus Tswv txaus, thiab muaj Nws ces yog muaj txhua yam ces dab ntxwgnyoog yuav nrhiav tswvyim ntxias peb mus ua txhaum. Kiag thaum chivthawj, thaum raug dag ntxias twb tsimnyog Adas, Evas hais qhia rau Vajtswv txog qhov uas nkawd raug dab ntxias. Tiamsis nkawd cia li hais rau Xatas txog qhov uas Vajtswv hais rau nkawd, thaum kawg nkawd thiaj kov tsis yeej. Thov Vajtswv pab kom peb cia li txaus siab hauv qhov kev nrog tus Tswv sib raug zoo kom kovyeej txojkev dag ntxias.
Thov Vajtswv,
Vajtswv, ua neej ntseeg nyob nrog lub ntiajteb muaj ntau yam kev dag ntxias nyob puag ncig. Dab ntxwgnyoog nrhiav txhua lub tswvyim los ntxias kom nyuam yaus khiav tawm hauv koj mus. Thov pab nyuam yaus paub los cuag Koj, tsis ua li siab nyiam. Thov Vaj Ntsujplig pab nyuam yaus paub cia siab rau Koj, thiab vamkhom Koj lub zog thiaj kovyeej dab txojkev dag ntxias. Nyuam yaus tuav Tswv Yexus lub npe thov, Amees.
Peb yuav ua dabtsi kom thiaj tsis ua txhaum li Evas thaum raug dag ntxias?
Nyeem Vajluskub hauv peb lub xyoo: Phau Ntawv Nkauj 74-75
Kênh Youtube BHKTHN:
