Klei Aê Diê Blŭ: I Y-Pêtrôs 3:18a
Êlan kliăng: “Kyuadah Krist msĕ mơh djiê leh kyua klei soh knŏng sa blư̆ kơ jih jang, Pô kpă bi ala kơ phung amâo kpă ôh, čiăng kơ Ñu dưi atăt drei kơ Aê Diê.” (I Y-Pêtrôs 3:18a)
Klei êmuh ksiêm mĭn: Ya ngă leh anăn kyua kơ hlei pô Khua Yang Yêsu tŭ klei djiê? Ya boh tŭ dưn ba hriê mơ̆ng klei Khua Yang djiê? Ya klei đru kơ klei hdĭp myang drei mơ̆ng klei thâo kral jih klei anei?
I Y-Pêtrôs 3:8-21 jing sa trăn hră čih mơĭt bi mđĭ ai êdimima kơ Phung Sang Aê Diê tal êlâo, kơ jih jang phung dôk tlă anăp hŏng klei mtao Nêrô ngă jhat ktang tĭt. Hruê anei, lu hlăm phung drei amâo găn ôh klei bi knal djiê hdĭp msĕ si digơ̆ mphŭn dô, ƀiădah trăn hră čih anei đru drei hmiêt mkăp tŭ klei knap mñai kyuadah thâo săng klei Khua Yang Yêsu tuôm găn leh, leh anăn dưi hĭn leh hŏng klei guh kơang.
Lač kơ klei Khua Yang Yêsu săn asei mlei, ti anei khua ƀĭng kna Y-Pêtrôs knŏng lač hŏng klei êlưih thâo săng “tŭ klei djiê”, ƀiădah ñu kñăm hĭn tơdah lač “tơl djiê, wăt klei djiê ti kyâo bi kal” (Philip 2:8), sa klei djiê ruă knap leh anăn hêñ mlâo hĭn hlăk ênuk anăn. Hŏng phung dlăng hră ñu tal êlâo hĭn, jing phung dôk găn klei arăng ngă jhat, digơ̆ mâo klei bi juh leh anăn klei bi mđĭ ai tơdah thâo Khua Yang Yêsu ăt găn leh msĕ mơh klei djiê ruă knap hĭn, ƀiădah Khua Yang dưi hĭn leh guh kơang. Drei hruê anei tŭ klei knap mñai mơh ƀiădah amâo tơl djiê ôh (Hêbrơ 12:4), kyuanăn, brei drei dôk kjăp ktang leh anăn đăo knang kơ Khua Yang Yêsu tơdah tŭ klei arăng ngă jhat, klei dleh dlan.
Klei khăp leh anăn klei Khua Yang Yêsu săn asei mlei mjing prŏng prĭn hĭn tơdah khua ƀĭng kna Y-Pêtrôs dưm ti dlông knăng mkă klei ktrŏ dua nah tĭng amâo bi knar ôh, anăn jing “Pô kpă ênô [djiê] hrô brei kơ pô amâo kpă ênô ôh”. Khua Yang Yêsu djiê leh kyua kơ klei soh anak mnuih jing “pô amâo kpă ênô ôh”, amâo djŏ kyua Ñu ôh, kyuadah Ñu jing “Pô kpă ênô” leh anăn “Ñu amâo tuôm ngă soh ôh, kăn tuôm hmư̆ klei luar mơ̆ng ƀăng êgei Ñu rei” (I Y-Pêtrôs 2:22). Kdlưn hĭn kơnăn, Khua Yang Yêsu djiê leh kơ anak mnuih êjai diñu ăt dôk hlăm klei soh, amâo thâo kral Ñu ôh, tơl wăt bi kdơ̆ng hŏng Ñu leh anăn bi mdjiê Ñu (Rôm 5:6-10).
Khua Yang Yêsu tŭ klei djiê čiăng kơ phung mnuih soh tŭ ư đăo kơ Ñu srăng mâo klei pap brei klei soh (Hêbrơ 9:28), amâo lŏ djiê hlăm klei hdĭp mngăt ôh ƀiădah dưi mâo klei yap jing kpă ênô (Rôm 8:1-2), dưi jing phung anak Ñu (Y-Yôhan 1:12), Ñu srăng “atăt ba drei kơ Aê Diê!” “Atăt ba” jing sa boh blŭ bi êdah klei hưn brei thâo kral kơ sa čô mnuih amâodah brei klei dưi nao giăm hŏng sa čô mnuih. Yang Krist “atăt ba drei” jing Ñu ba phung mnuih đăo kơ Ñu nao bi tuôm hŏng Aê Diê. Anei yơh jing boh tŭ dưn mơ̆ng klei Khua Yang Yêsu tŭ klei knap mñai, klei săn asei mlei, leh anăn bi êdah klă mngač hŏng čhiăm păng hlăm Sang Kkuh Mpŭ kơhiêk mdua mơ̆ng dlông truh ti gŭ (Y-Mathiơ 27:51; Hêbrơ 10:19-22).
Klei dưi hĭn guh kơang Khua Yang Yêsu găn hŏng klei tŭ klei knap mñai amâo knŏng ba hriê kơ drei sa klei bi tui čiăng pap brei klei soh ôh, ƀiădah wăt atăt ba drei nao bi êdah hŏng Aê Diê, lŏ bi mrâo anôk drei jing anak Aê Diê, leh anăn thâo kral klei jăk mơak myang hlăm găp djuê Aê Diê (Rôm 5:1-5).
Si drei ngă čiăng dưi dôk kjăp hlăm klei đăo êjai dôk ti anăp klei dleh dlan, klei lông dlăng?
Wah lač: Ơ Khua Yang, bi mni lač jăk kơ Khua Yang kyua bi êdah leh klei khăp Ih kơ kâo hŏng klei Ih tŭ klei djiê hrô brei kơ klei soh kâo, čiăng kơ kâo dưi yap jing kpă ênô ti anăp Aê Diê leh anăn dưi jing anak Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Đaniel 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
