I Petus 3:18a
Nqe cim:
“Rau qhov Yexus Khetos tuag tib zaug xwb txhiv tau sawvdaws lub txim lawm, nws yog tus ncaj ncees, nws tuag txhiv cov uas tsis ncaj ncees, nws ua li ntawd nws thiaj coj tau nej mus cuag Vajtswv.” (I Petus 3:18a)
Lus nug xav:
– Vim licas thiab yog vim leejtwg Tswv Yexus thiaj li txaus siab tuag?
– Tswv Yexus txojkev tuag coj tau dabtsi los rau peb?
– Qhov uas zeem paub tej ntawd yuav pab tau dabtsi rau peb lubneej sab ntsujplig?
I Petus 3:8-21 yog ib ntu uas txhawb zog kawg nkaus rau cov neeg nyeem hauv Pawg Ntseeg xubthawj, lawv yog cov neeg uas ntsib kev tsimtxom hnyav heev ntawm Vajntxwv Nelaus. Niaj hnub nimno, feem ntau peb tsis ntsib kev tximtxom ntsigtxog txojsia ib yam li lawv, tiamsis ntu Vajluskub no pab peb npaj txhij tiv txojkev txomnyem vim paub hais tias Tswv Yexus twb ntsib dhau lawm thiab Nws kovyeej muaj koobmeej ci ntsa iab.
Thaum hais txog Tswv Yexus txojkev tuag, nyob ntawm no Timthawj Petus tsuas hais luv luv hais tias “tuag”, tiamsis ho hais hnyav ntxiv thaum hais tias “txawm yog neeg muab nws ntsia rau saum ntoo khaublig” (Filipis 2:8), uas yog txojkev tuag mob tshaj thiab txajmuag tshaj plaws nyob tiam ntawd. Hais txog cov neeg nyeem tiam xubthawj, yog cov neeg uas raug tsimtxom, lawv yuav tau nplig siab thiab txhawb zog thaum paub hais tias Tswv Yexus twb ntsib txojkev tuag mob tshajplaws tiamsis Nws twb kovyeej muaj koob meej ci ntsa iab lawm. Peb niaj hnub nimno txawm yog ntsib kev txomnyem los yeej tsis tau txog qib uas tuag (Henplais 12:4), li ntawd, peb yuav tsum tau khov kho dua qub thiab tso siab rau Tswv Yexus thaum ntsib kev tsimtxom thiab teebmeem.
Tswv Yexus txojkev hlub thiab kev tuag txhiv dhau los ua yam loj kawg nkaus thaum Timthawj Petus muab ob yam tsis sib txig los sib ntsuas, ntawd yog “Nws yog tus ncaj ncees, nws tuag txhiv cov uas tsis ncaj ncees”. Tswv Yexus tuag vim tibneeg tej kev txhaum, lawv yog “cov uas tsis ncaj ncees”, tsis yog tuag vim Nws tus kheej, rau qhov Nws yog “tus ncaj ncees” thiab “Yexus tsis tau ua ib qho txhaum, thiab tsis muaj leejtwg hnov nws hais ib lo lus dag li” (I Petus 2:22). Tshaj qhov ntawd, Tswv Yexus tuag rau tibneeg thaum lawv tseem yuamkev hauv txojkev txhaum, tsis zeem paub Nws, thiab tseem tawmtsam ntxeev siab tua Nws thiab (Loos 5:6-10).
Tswv Yexus txaus siab tuag kom cov neeg txhaum uas txais yuav Nws tau zam txim (Henplais 9:28), tsis tuag sab ntsujplig ntxiv lawm tiamsis tau suav hais tias ncaj ncees (Loos 8:1-2), tau los ua Nws cov menyuam (Yauhas 1:12), tau Nws “coj” peb “mus cuag Vajtswv!” “Coj” yog ib lo lus qhia txog ib tug neeg uas tau piav qhia txog lossis tau pub cai mus ze ib tug neeg twg. Khetos “coj” peb yog Nws coj cov neeg ntseeg Nws mus cuag Vajtswv. Qhov no ntag yog qhov txiajntsig ntawm Tswv Yexus txojkev txomnyem, tuag txhiv thiab tau qhia tshwm meej heev dhau ntawm daim ntaub hauv lub Tuamtsev raug ntuag ua ob sab (Mathais 27:51; Henplais 10:19-22).
Tswv Yexus txojkev kovyeej uas muaj koob meej ci ntsa iab dhau ntawm txojkev txomnyem tsis tsuas yog pub rau peb ib qho khoom theej txhoj kom tau zam txim xwb tiamsis tseem coj peb mus cuag Vajtswv, kho peb meejmom rov tau ua Vajtswv menyuam, thiab tau txais tej koob hmoov sab ntsujplig hauv Nws tsev neeg (Loos 5:1-5).
Thov Vajtswv,
Tus Tswv, ua Koj tsaug vim Koj tau qhia tshwm Koj txojkev hlub rau nyuam yaus dhau ntawm kev tuag txhiv nyuam yaus tej kev txhaum, kom nyuam yaus tau suav hais tias ncaj ncees tabmeeg Vajtswv thiab tau los ua Koj cov menyuam. Nyuam yaus tuav Tswv Yexus Khetos lub npe thov, Amees.
Yuav ua li cas peb thiaj muaj txojkev ntseeg ruaj khov tabmeeg tej kev txomnyem thiab sim siab?
Nyeem Vajluskub hauv peb lub xyoos: Daniyees 6
Kênh Youtube BHKTHN:
